ၵၢၼ်ပၢႆးမွၼ်းၽဵင်းၵႂၢမ်း ၼႂ်းၵၢပ်ႈပၢၼ်ဝၼ်းမိူဝ်ႈၼႆႉ မီးၼမ်မီးလၢႆ ။ ၵမ်ႈၽွင်ႈၵေႃႈ ထုၵ်ႇၸႂ် ၽဵင်းၵႂၢမ်းၵဝ်ႇ ဢၼ်မီးမႃးၸဵမ်လႂ် ၊ ဢၼ်ၵူၼ်းၼမ်ထွမ်ႇငိၼ်းလိုၼ်ႈႁူယဝ်ႉၸိူဝ်းၼၼ်ႉ ၶိုၼ်းမႃးႁဵတ်း Cover သေႁွင်ႉ လဵၼ်ႈပဵၼ်တၢင်းမူၼ်ႈ၊ ၵမ်ႈၽွင်ႈၵေႃႈၶိုၼ်းႁဵတ်းသဵင်တွႆႇတိုင်ႈ Version မႂ်ႇသေ လဵၼ်ႈသဵင်ႁွင်ႉ လၢၵ်ႇလၢႆးပဵၼ်ထႅင်ႈၼႅဝ်းၼိုင်ႈ။ ၵမ်ႈၽွင်ႈၵေႃႈ တႅမ်ႈမႂ်ႇ သၢင်ႈသဵင်တွႆႇမႂ်ႇမႂ်ႇသေႁဵတ်းဢွၵ်ႇမႃးပဵၼ်ၽဵင်းၵႂၢမ်းပဵၼ်သဵင်ၶွင်တူဝ်ၵေႃႈမီးတင်းၼမ်။ ၼႂ်းၵႃႈပၢႆးမွၼ်းၽဵင်းၵႂၢမ်းတႆးဢွၵ်ႇမႃးတင်းၼမ်တင်းလၢႆၼႆႉ မီးၽဵင်းၵႂၢမ်းသႅၼ်းၼိုင်ႈ ဢၼ်ႁဵတ်းဢွၵ်ႇမႃးသေ ႁဵတ်းႁႂ်ႈၸၼ်ၸႂ်ၵူၼ်းထွမ်ႇ။ ပဵၼ်ၽဵင်းၵႂၢမ်းတႆးၵဝ်ႇ ဢၼ်ၸိုဝ်ႈသဵင်လိုဝ်းလင်ဝႆႉၼၼ်ႉ မၼ်းၸၢႆးဢဝ်မႃးတႅမ်ႈပဵၼ်ၾၢႆႇမၢၼ်ႈပႃးသေ ႁွင်ႉလေႃးၵၼ်ဝႆႉၶိုင်ႈတေႃႇၶိုင်ႈ။ ႁဵတ်းႁႂ်ႈၵူၼ်းတႆးၸိူဝ်းယူႇႁၢင်ႇယၢၼ်မိူင်းတႆး၊ ၵူၼ်းတႆးၸိူဝ်းဢမ်ႇမေႃလိၵ်ႈတႆး ဢမ်ႇသူင်ထွမ်ႇၽဵင်းၵႂၢမ်းတႆးၸိူဝ်းၼၼ်ႉၵေႃႈ ပေႃးလႆႈငိၼ်းၵႂၢမ်းမၼ်းၸၢႆးႁွင်ႉဝႆႉၼၼ်ႉၼႆဢွၼ်ၵၼ်ႁႄႈႁူ သူၼ်ၸႂ်ၶႂ်ႈထွမ်ႇၶႂ်ႈငိၼ်းမႃး -ၵေႃႈမီး။ ပေႃးလၢတ်ႈၸိူင်ႉၼႆၵေႃႈ ၵမ်ႈၼမ်တေလၢမ်းႁူႉၸၵ်းယဝ်ႉၶႃႈၼေႃႈ ဝႃႈတေပဵၼ်ၽႂ်ၼႆ။ ၼၢင်းငိုၼ်းႁွမ် ၵပ်းသိုပ်ႇတွင်ႈထၢမ်ဝႆႉ ၸၢႆးတီႇမွႆး ၽူႈၶိုၼ်းမႄး ၶူင်သၢင်ႈၽဵင်းၵဝ်ႇ ႁွင်ႉဢွၵ်ႇၼႅဝ်းမႂ်ႇမႂ်ႇဝႆႉၶႃႈဢေႃႈ ။

ထၢမ် – မႂ်ႇသုင်ၶႃႈ … ဢွၼ်တၢင်းသုတ်း ၵပ်းသိုပ်ႇၼႄႉၼမ်းပၼ် ၸိုဝ်ႈသဵင် လႄႈ တီႈယူႇဢိတ်ႉၼိုင်ႈ ၶႃႈ။

တွပ်ႇ – မႂ်ႇသုင်ၵူႈၵေႃႉၶႃႈ…ၸိုဝ်ႈၶႃႈပဵၼ် ၸၢႆးတီႇမွႆး (ၸိုဝ်ႈတေႉတႄႉဢမ်ႇၸႂ်ႈ) ယွၼ်ႉဝႃႈ ၸိုဝ်ႈၶႃႈ မၼ်းၼမ်ၼႃႇ။ ယွၼ်ႉသင်လႄႈႁွင်ႉၸၢႆးတီႇမွႆးၼႆ ဝဵင်းဢၼ်ၶႃႈယူႇဝႆႉတေႃႈလဵဝ်ၼႆႉ ပဵၼ်ဝဵင်း Des Moines မီးၼႂ်း Iowa State မိူင်းဢမေႊရိၵၼ်ႊဢေႃႈ။ ၶႃႈယူႇဝႆႉတီႈဝဵင်းၼႆႉသေ ႁဵတ်းၵၢၼ် ပၢႆးမွၼ်း လႄႈ ၸင်ႇလႆႈၸႂ်ႉဝႆႉၸိုဝ်ႈဝဵင်းဢၼ်ၼႆႉၶႃႈ။ မိူၼ်ၼင်ႇ လႃႈသဵဝ်ႈ တဵင်းဢွင်ႇ၊ တေးယေး ၵူဝ်ႇဢွင်ႇ တွင်ႇၵျီး ၸိူင်ႉၼၼ်ၶႃႈ။ ၶႃႈတႄႉယွၼ်ႉပဵၼ်တႆးလႄႈ သႂ်ႇဝႆႉပႃးၸၢႆးၼႆဢေႃႈ…ၸၢႆးတီႇမွႆး ၼႆၶႃႈ။

ထၢမ် – ၼႂ်းမိူင်းတႆးႁဝ်းၶႃႈလူး ယူႇသဝ်းတၢင်းဝဵင်းလႂ်ၶႃႈ။ ဢၼ်ၶၢႆႉၵႂႃႇယူႇသဝ်း တီႈမိူင်းဢမေႊရိၵၼ်ႊ ၼႆႉလူး ႁိုင်ယဝ်ႉၶႃႈႁႃႉ။

တွပ်ႇ – ၶႃႈပဵၼ်တႆး ၼႂ်းတိူင်းပႃႇၵိူဝ် (ပဲခူးတိုင်း) ဢေႃႈ။  တီႈဢၼ်ၶႃႈယူႇတႄႉ တေတူၵ်းၼႂ်းထိူၼ်ႇ ဢိတ်းၼိုင်ႈ ပဵၼ်ၼႂ်း ၸႄႈဝဵင်းၵျွၵ်ႉၵျီး၊ တိူင်းပႃႇၵိူဝ်၊ မီးယၢင်း၊ ယၢင်းၽိူၵ်ႇ၊ တႆး လႄႈ မၢၼ်ႈ ၸိူဝ်းၼႆႉ ယူႇသဝ်းဝႆႉၸွမ်းၵၼ်။ ၶႃႈဢမ်ႇယူႇၼႂ်းမိူင်းတႆး၊ ၶႃႈပဵၼ်တႆး ဢၼ်ယူႇၼႂ်းမိူင်းမၢၼ်ႈဢေႃႈ။

မိူဝ်ႈပီ 1995 ၼၼ်ႉၶႃႈလႆႈၶၢႆႉၵႂႃႇယူႇသဝ်းတီႈ မိူင်းမလေးသျႃး၊ ပူၼ်ႉမႃး 15 ပီၼႆႉၸင်ႇၶၢႆႉမႃးယူႇတီႈ မိူင်းဢမေႊရိၵၼ်ႊဢေႃႈ။

ထၢမ် – လႆႈတႄႇႁွင်ႉၽဵင်းၵႂၢမ်းမႃး မိူဝ်ႈလႂ်ၶႃႈၼေႃ ။

တွပ်ႇ –  မိူဝ်ႈယူႇၼႂ်းမိူင်းႁဝ်း ၼႆသေၶႃႈလႃႈ၊ မိူဝ်ႈၵေႃႉလဵၵ်ႉၼႆ တွႆႇတိင်ႇႁွင်ႉၵႂၢမ်း ၸွမ်းၵိဝ်ႇၸွမ်းငွၼ်ႈ ယူႇတႃႇသေႇၶႃႈၼႃႇၼေႃႈ … ႁႃး…ႁႃး…။ ပႆႇႁိုင်ၼင်ႇၵွၼ်ႇၶႃႈ၊ တေလႆႈဝႃႈ ဝၢႆးသေတၢင်းပဵၼ် covid 19 ၽႄႈလၢမ်း ဝၢႆး 2022 ၼၼ်ႉလႆႈတႄႇႁဵတ်းၽဵင်းၵႂၢမ်းတၢင်ႇတီႈၼႂ်း YouTube မႃးဢေႃႈ။

ထၢမ် – ၽဵင်းၵႂၢမ်း ဢၼ်ပီႈႁဝ်းႁွင်ႉသေတၢင်ႇဝႆႉ တီႈၼႂ်း YouTube ၸိူဝ်းၼၼ်ႉ လႆႈႁၼ်မီးပႃး ၾၢႆႇ ၽႃသႃတႆး လႄႈ မၢၼ်ႈ သွင်ဢၼ်လေႃးၵၼ်ဝႆႉၶႃႈၼေႃ။ ထွႆႈၵႂၢမ်းဢၼ်ပိၼ်ႇႁွင်ႉဝႆႉၾၢႆႇမၢၼ်ႈ ၸိူဝ်း ၼၼ်ႉၵေႃႈၶိုၵ်ႉၶႅမ်ႉတေႉၶႃႈ။ တီႈၼႆႈၵေႃႈၶႂ်ႈထၢမ်ဝႃႈ မီးယိူင်းဢၢၼ်းၸိူင်ႉႁိုဝ်သေလႄႈ လႆႈႁွင်ႉ ၽဵင်း ၵႂၢမ်းဢွၵ်ႇမႃးၸွမ်းၵၼ် သွင်ၽႃသႃၸိူင်ႉၼၼ်ၶႃႈၼေႃ။

တွပ်ႇ – ဢွၼ်တၢင်းသုတ်းတႄႉ ဢူၺ်းၵေႃႉၶႃႈၵေႃႉၼိုင်ႈ ႁဝ်းၶႃႈလႆႈထူပ်းၵၼ်ၼိူဝ်ဢွၼ်ႊလၢႆႊ… မၼ်းတႄႉ ပဵၼ်ၽူႈႁွင်ႉၽဵင်းၵႂၢမ်း ၸၢႆးလႅင်းပၢင်ႇဢေႃႈ။ မၼ်းၵေႃႈယူႇဝႆႉတီႈ မိူင်းဢမေႊရိၵၼ်ႊ၊ ၵူၺ်းၵႃႈ ဝဵင်းဢၼ်ႁဝ်းၶႃႈယူႇၼႆႉသမ်ႉ ၵႆၵၼ်၊ ႁဝ်းၶႃႈလႆႈႁၼ်ၵၼ် ဢုပ်ႇၵၼ်ၼိူဝ်ဢွၼ်ႊလၢႆႊသေ မၼ်းၸွႆႈ ထႅမ်(support) ပၼ်ႁႅင်းၶႃႈတေႉတေႉ။ တႃႇတေဢဝ်ၽဵင်းၵႂၢမ်းတႆး ပိၼ်ႇပဵၼ်ၵႂၢမ်း မၢၼ်ႈ ၼႆႉတႄႉ ၶႃႈတိုၼ်းမီးယိူင်းဢၢၼ်းဝႆႉၸဵမ်လႂ်ယူႇ။ ၵူၺ်းၵႃႈ ဢမ်ႇပႆႇမီးတိုဝ်ႉတၢင်းလႄႈ ဢမ်ႇပဵၼ် ႁဵတ်း မႃး။ ထႅင်ႈလွင်ႈၼိုင်ႈသမ်ႉ လိၵ်ႈလၢႆးတႆးၼႆႉ ၶႃႈဢမ်ႇယၢမ်ႈလႆႈသွၼ်မႃးသေတူဝ်၊ လႆႈၵိူတ်ႇ မႃးၼႂ်း တူင်ႇဝူင်းမၢၼ်ႈၼႆလႄႈ ဢၼ်လႆႈလၢတ်ႈၵႂၢမ်းတႆးတေႃႇၵၼ်ၼႆႉ မီးၵူၼ်းၼႂ်းႁိူၼ်းၵူၺ်း ပေႃး လူင်း ႁိူၼ်းၵႂႃႇၵေႃႈ ပဵၼ်ယၢင်း၊ မၢၼ်ႈ လႄႈ မီးတႆးၵမ်ႈၽွင်ႈသေတႃႉ ၵမ်ႈၼမ်ၸႂ်ႉၵႂၢမ်း မၢၼ်ႈသေ လၢတ်ႈ တေႃႇၵၼ်ၵူၺ်း။

ႁဵတ်းႁိုဝ်သေႁူႉလိၵ်ႈတႆးမႃးလႃႇၼႆ ၶႃႈလႆႈလဵပ်ႈႁဵၼ်းမႃးလွႆးလွႆးဢေႃႈ။ ၶႃႈယူႇတီႈ ၼွၵ်ႈမိူင်းႁိုင်ၶၢဝ်း တၢင်း 30 ပီသေတႃႉ ၼႂ်းၸႂ်ၶႃႈတႄႉတိုၵ်ႉပဵၼ်တႆး၊ ၶႃႈဝူၼ်ႉတႃႇတႆးယူႇတႃႇသေႇ။ ပေႃးမိူဝ်းၵႂႃႇတီႈ ဝၢၼ်ႈၼႆ ပီႈၼၢင်း၊ ၼွင်ႉယိင်းၶဝ်ၸိူဝ်းၼႆႉတႄႉ ဢၢၼ်ႇလိၵ်ႈတႆးဢေႃႈ၊ ၶႃႈသမ်ႉဢမ်ႇပေႃး လႆႈယူႇ ၼႂ်းဝၢၼ်ႈတႆးႁဝ်း လႆႈပၢႆႈၽေးယူႇတႃႇသေႇလႄႈ ဢမ်ႇလႆႈႁဵၼ်းလီလီၶႃႈ။ တူဝ်မႄႈလိၵ်ႈတႆးၸိူဝ်းၼႆႉ သမ်ႉ ၶႂ်ႈငၢႆးၵၼ်တၢင်းလိၵ်ႈမၢၼ်ႈလႄႈ ၶႃႈၵေႃႈလႆႈလဵပ်ႈႁဵၼ်းဢဝ်လွႆးလွႆး၊ ၶႃႈသမ်ႉပဵၼ်ၵူၼ်းၵႆႉ ဢၢၼ်ႇလိၵ်ႈဢေႃႈ။

မိူဝ်ႈတေတႄႇႁဵတ်းၵၢၼ်ပၢႆးမွၼ်း တေႁွင်ႉၵႂၢမ်းတႆး၊ တေပိၼ်ႇၵႂၢမ်းမၢၼ်ႈယဝ်ႉၼႆ ၶႃႈလႆႈႁဵတ်းၵေႃႉ ၵၼ်တၢင်း ၸၢႆးလႅင်းပၢင်ႇ။ ၸၢႆးလႅင်းပၢင်ႇၼႆႉ ၶႃႈၶႂ်ႈယုၵ်ႉယွင်ႈၼမ်ႉၸႂ်မၼ်းတေႉတေႉ၊ မၼ်းပဵၼ် လုၼ်ႈပီႈ (senior musician) သေတႃႉၵေႃႈ မိူဝ်ႈၶႃႈလၢတ်ႈဝႃႈၶႂ်ႈၶဝ်ႈၼႂ်းတူင်ႇဝူင်းပၢႆးမွၼ်းၼႆၼၼ်ႉ မၼ်းၵေႃႉသွၼ်ပၼ်ၶႃႈလိၵ်ႈတႆး ၸဵမ်ဢဝ်ထွႆႈၵႂၢမ်းၸိူဝ်းၼႆႉ။ ၵွပ်ႈၼႆလႄႈ ၶႃႈၶႂ်ႈငိၼ်းၸူမ်းမၼ်းၸၢႆး တေႉတေႉ။ မိူဝ်ႈၼၼ်ႉမၼ်းလၢတ်ႈပၼ်ႁႅင်းၸႂ်ၶႃႈဝႃႈ တၢင်းႁူႉၾၢႆႇလိၵ်ႈမၢၼ်ႈၵႂၢမ်းမၢၼ်ႈၸိူဝ်းၼႆႉ ၶႃႈၵတ်ႉၶႅၼ်ႇမိူၼ်ၼင်ႇမၢၼ်ႈသေတႃႉ ၼႂ်းဢွၵ်းဢေႃပၢႆးဝူၼ်ႉၶႃႈတႄႉပဵၼ်တႆး ၵွပ်ႈၼၼ်လႄႈ ႁႂ်ႈ သိုပ်ႇႁဵတ်းၵႂႃႇ ၶႂ်ႈႁူႉသင်ၵေႃႈ ႁႂ်ႈထၢမ်ၵႂႃႇတီႈမၼ်းၼႆဢေႃႈ။ မိူၼ်ၼင်ႇ ၶေႃႈၵႂၢမ်းဢၼ်ဝႃႈ “ မၢင်ၽဝ်ႇ မၢင်လႂ်ပေႃးၼႆၸိုင်” ၼႆၼၼ်ႉ “ၸိုင်”ၼၼ်ႉ ၶႃႈဢမ်ႇတွၼ်ႉယၢမ်ႈၸႂ်ႉမႃးသေပွၵ်ႈ ၵွပ်ႈၼၼ်လႆႈထၢမ် ၵႂႃႇတီႈမၼ်းသေ ႁႂ်ႈမၼ်းၸွႆႈသပ်းလႅင်းၼႄဢေႃႈ။

ၸၢႆးလႅင်းပၢင်ႇၼႆႉ ၸွႆႈထႅမ်ပၼ်ႁႅင်းၸႂ်ၶႃႈတေႉတေႉ၊ ၶႃႈၵေႃႈသမ်ႉႁတ်းႁဵတ်း၊ ၸႂ်ႉၶၢဝ်းယၢမ်းဢၢၼ်ႇ လိၵ်ႈ လဵပ်ႈႁဵၼ်းဢဝ်လႄႈ ၸွင်ႇၵွႆႈပဵၼ်မႃးဢေႃႈ၊ ၼမ်ႉၵတ်ႉၶႃႈၵေႃႉလဵဝ်ၵူၺ်းတႄႉဢမ်ႇၸႂ်ႈ ယွၼ်ႉ လႆႈတၢင်းၸွႆႈထႅမ် တီႈၽူႈႁွင်ႉၽဵင်းၵႂၢမ်းၸၢႆးလႅင်းပၢင်ႇပႃး ၶႃႈဢေႃႈ။

ထၢမ် – ယၢမ်းလဵဝ်တႄႉ မေႃလိၵ်ႈတႆးႁဝ်းၶႃႈလီလီယဝ်ႉၶႃႈၼေႃႈ။

တွပ်ႇ – မိူဝ်ႈၽွင်းတိုၵ်ႉလဵပ်ႈႁဵၼ်းယူႇၼႆႉ မေႃယဝ်ႉၼႆတႄႉပႆႇၶႂ်ႈလၢတ်ႈၶႃႈ။ ၵူၺ်းၵႃႈ ၵႂၢမ်းႁူဝ်လႂ်ႁူဝ် ၼၼ်ႉတႄႉ ၶတ်းၸႂ်ၵႂႃႇသေ မေႃမႃးယူႇၶႃႈ။ ႁႂ်ႈပေႃးတႅမ်ႈလႆႈၽဵင်းၵႂၢမ်းႁၢင်းၵူၺ်းၼႆတႄႉ ပႆႇငၢႆႈငၢႆႈ ၶႃႈ။ ဢမ်ႇပဵၼ်လႆႈၼႆၵေႃႈဢမ်ႇဝႃႈ၊ ပဵၼ်လႆႈဢိူဝ်ႈၼႆၵေႃႈ ပႆႇႁတ်းလၢတ်ႈၶႃႈ။

ထၢမ် – မိူဝ်ႈဢဝ်ၽဵင်းၵႂၢမ်းတႆးသေ ၶိုၼ်းပိၼ်ႇၽႃသႃပဵၼ် ၾၢႆႇမၢၼ်ႈၼၼ်ႉ ၼင်ႇႁိုဝ်ငဝ်ႈတိုၼ်းၽဵင်း ၵႂၢမ်းတေဢမ်ႇႁၢႆ ဢမ်ႇႉပိူင်ႈၵႂႃႇၼၼ်ႉ မီးလွင်ႈယၢပ်ႇၽိုတ်ႇၸိူင်ႉႁိုဝ်ၽွင်ႈၶႃႈ။

တွပ်ႇ – ယၢပ်ႇတေႉဢေႃႈ…ယၢပ်ႇတေႉယၢပ်ႇဝႃႈၶႃႈ။ မိူၼ်ၼင်ႇၽဵင်းၵႂၢမ်းဢၼ်ၸၢႆးလၢဝ်ပိူင်းႁွင်ႉဝႆႉဝႃႈ “ပၢင်ႇလၢႆႇ” ၼႆၼၼ်ႉ ၶႃႈလႆႈၸႂ်ႉၶၢဝ်းယၢမ်း 6 လိူၼ်သေပိၼ်ႇတႅမ်ႈဝႆႉဢေႃႈ။ ၵွပ်ႈသင်ၼႆ ၶေႃႈၵႂၢမ်းမၢင် ဢၼ်မၢင်တူဝ်ၼႆႉ မၼ်းလိုၵ်ႉႁႅင်းၼႃႇ လူဝ်ႇလႆႈထၢမ်ၸၢႆးလႅင်းပၢင်ႇ။ပေႃးၸၢႆးလႅင်းပၢင်ႇ သပ်းလႅင်း ၼႄယဝ်ႉၵေႃႈ ၸင်ႇၶိုၼ်းမႃးတႅမ်ႈ script မၼ်း ႁႂ်ႈမၼ်းမႅၼ်ႈၵၼ်တၢင်း notes ၊ bead ၊ bar မၼ်း၊ တႃႇတေပိၼ်ႇၶိုၼ်းၵႂၢမ်းမၢၼ်ႈၼၼ်ႉဢမ်ႇငၢႆႈၶႃႈ လူဝ်ႇလိူၵ်ႈတူဝ်မၼ်းသေ သႂ်ႇၵႂႃႇၵမ်းဢၼ်ဢၼ်။ မိူၼ်ၼင်ႇ သဵင်ဢၼ်ၸၢႆးလၢဝ်ပိူင်းႁွင်ႉဝႆႉဝႃႈ “ဢိူဝ်ႈ” ၼႆၼၼ်ႉ ၾၢႆႇမၢၼ်ႈသမ်ႉပေႃးသႂ်ႇ “-း” ၼႆ တေပဵၼ် “ဢိူဝ်း” ပႅတ်ႈ၊ မၼ်းဢမ်ႇမႅၼ်ႈၵၼ်ၵမ်းသိုဝ်ႈ လႆႈသုတ်ႉၶၢႆႉႁႃၵၼ်ဢဝ်၊ ၵွပ်ႈၼႆ တေလႆႈဝႃႈ ယၢပ်ႇတေႉယၢပ်ႇဝႃႈဢေႃႈ။ လႆႈဝူၼ်ႉတၢင်းဝၼ်းတၢင်းၶိုၼ်းယဝ်ႉ ၸင်ႇပဵၼ်မႃးၶႃႈဢေႃႈ။

ၼႂ်းလိၵ်ႈမၢၼ်ႈ “မြန်မာစာပေ” ၼၼ်ႉႁဝ်းလူဝ်ႇလႆႈႁူႉလိုၵ်ႉဢေႃႈ။ ပေႃးႁူႉလိုၵ်ႉၸင်ႇမိူၼ်ၼင်ႇ ၽူႈ  တႅမ်ႈၵႂၢမ်း၊ ၽူႈတႅမ်ႈလိၵ်ႈ ၶဝ်ၸိူဝ်းၼႆႉ ၶဝ်ၸင်ႇမီး ပရိယႄႇၶဝ်။ ၼႂ်းလိၵ်ႈလၢႆးၼႆႉလူဝ်ႇၸႂ်ႉပရိယႄႇ ဢေႃႈ။ ပေႃးဢမ်ႇၸႂ်ႉပရိယႄႇ ၼႆႉမၼ်းတေဢမ်ႇၵႂႃႇတိူဝ်ႉၼိူဝ်ႉမၼ်းလႆႈၶႃႈ။ မိူၼ်ၼင်ႇ ပၢႆးဝူၼ်ႉ ၶူးၸၢႆးၶမ်းလဵၵ်းၼႆႉ မၼ်းလိုၵ်ႉၵႃႈႁိုဝ်ၼႆ ၵႂၢမ်းၾၢႆႇမၢၼ်ႈႁူဝ်ၼိုင်ႈဢၼ်ဝႃႈ “အ‌ရေခွံခွာရင် ရင်ထဲ ကတောင်   ပေါ်သားပါ” ၼႆၼၼ်ႉ တီႈထႅဝ်လိၵ်ႈဢၼ်ဝႃႈ “ခေါင်ရည်ချိုမြ တစ်ခွက်ထဲလက်ပြောင်း သောက်ရတဲ့အရသာ မမေ့နိုင်ဘူး” မၼ်းတႅမ်ႈဝႆႉၸိူင်ႉၼၼ် ႁၢင်ႈလီၼႃႇၶႃႈ။ ပေႃးပဵၼ် ၾၢႆႇတႆးသမ်ႉ “ၵိၼ်လဝ်ႈၼိုင်ႈၵွၵ်း ၼိုင်ႈၵေႃႉၼိုင်ႈၵမ်း တၢင်းမဝ်းလူၺ်ႈႁုၼ်ႉၶူဝ်တေဢမ်ႇလိုမ်း” ၼႆၶႃႈႁိုဝ်။ တီႈတေႉမၼ်း ၾၢႆႇတႆးပဵၼ်လဝ်ႈ ၵူၺ်းၵႃႈမိူဝ်ႈပိၼ်ႇၵႂႃႇၾၢႆႇမၢၼ်ႈၼၼ်ႉ မၼ်းဢမ်ႇၸႂ်ႉလဝ်ႈယဝ်ႉ။ ယွၼ်ႉၼၼ်လႄႈ မၼ်းဢမ်ႇငၢႆႈ၊ လူဝ်ႇလႆႈဝူၼ်ႉလိုၵ်ႉလိုၵ်ႉ၊ ၸႂ်ႉတၢင်းႁူႉႁဝ်းသေႁဵတ်းၵႂႃႇလႄႈ ယၢပ်ႇ တေႉဢေႃႈ။  

ထၢမ် – ယိၼ်းၸူမ်းဢဝ်ၵုင်ႇမုၼ်ၸွမ်း တၢင်းၶတ်းၸႂ်တေႉတေႉၶႃႈ။ ၽဵင်းၵႂၢမ်း ၸိူဝ်းၶိုၼ်းမႄးႁွင်ႉဝႆႉ ၼၼ်ႉ ၵမ်ႈၼမ်လႆႈႁၼ်ပဵၼ်ၽဵင်းၵႂၢမ်း ၸၢႆးလၢဝ်ပိူင်းၶႃႈၼေႃ မိူၼ်ၼင်ႇ “ပၢင်ႇလၢႆႇ” ၊ “ဢၢမ်း”၊ “သၢဝ်ၼမ်ႉၶူင်း” ၸိူဝ်းၼႆႉ လႆႁၼ်ၵူၼ်းပၼ်ႁႅင်းၼမ်ဝႆႉၶႃႈၼေႃႈ။ ၼႂ်းၽဵင်းၵႂၢမ်းတႆး မီးဝႆႉတၢင်းၼမ် ၼၼ်ႉ ယွၼ်ႉသင်လႄႈ  လႆႈလိူၵ်ႈဢဝ်ၽဵင်းၵႂၢမ်း ၸၢႆးလၢဝ်ပိူင်း ၶႃႈ။

တွပ်ႇ – ၶေႃႈထၢမ်ၼႆႉၶႅမ်ႉတေႉၶႃႈ။ ထီႉၼိုင်ႈတႄႉ ဝၢႆးသေၸၢႆးလၢဝ်ပိူင်း  ဢမ်ႇမီးယဝ်ႉၼၼ်ႉ မီး ၸၢႆးထုၼ်းလႃႉ ဢၼ်ပဵၼ်ပီႈၼွင်ႉၶဝ် ၵေႃႈတင်ႈဝႆႉ “ၸၢႆးလၢဝ်ပိူင်းၾွၼ်ႊတေႊသျိၼ်း” ဢၼ်ၸွႆႈ ထႅမ် ပၼ်ၵူၼ်းၸိူဝ်း ၵႂႃႇႁဵၼ်းလိၵ်ႈလၢႆးတၢင်ႇမိူင်း ဢမ်ႇၼၼ်ၵေႃႈ ၵူၼ်းၸိူဝ်းသွၼ်ပၢႆးပၺ်ႇၺႃႇတႃႇ ၶိုၼ်ႈ ယႂ်ႇၸိူဝ်းၼႆႉ။ ၶႃႈသမ်ႉၶႂ်ႈလူႇငိုၼ်းလႄႈ လႆႈလူႇပၼ်ၵႂႃႇၸွမ်းၼင်ႇၶဝ်မၵ်းမၼ်ႈဝႆႉ။ ထႅင်ႈလွင်ႈၼိုင်ႈ သမ်ႉ သဵင်ၸၢႆးလၢဝ်ပိူင်းၼႆႉ ပေႃးၶႃႈႁွင်ႉ မၼ်းမႃးမႅၼ်ႈၵၼ်တၢင်းၵူင်ၶေႃႈၶႃႈ ၸဵမ်ဢဝ် vocal culture ၊tone လႄႈ melody ၸိူဝ်းၼႆႉမႃးမႅၼ်ႈႁူၶႃႈ။ ၵူၺ်းၵႃႈ ဢၼ်ၶႃႈၶိုၼ်းမႄးႁွင်ႉဢွၵ်ႇတႄႉ ပဵၼ် သတၢႆႇ ၶႃႈၼၼ်ႉၼႃႇၼေႃႈ၊ ၶႃႈၵေႃႈဢမ်ႇယိူင်ႈမၼ်းလႆႈ။

ထႅင်ႈဢၼ်ၼိုင်ႈသမ်ႉ ၵႂၢမ်းၸၢႆးလၢဝ်ပိူင်းၼႆႉ မၼ်းမီး သီႇၸဵင်ႇပႅတ်ႇၼႃႈ၊ ၼႂ်းၵႂၢမ်း ၼိုင်ႈႁူဝ်ၼႆႉ မီးပၢႆးဝူၼ်ႉတႃႇၽူႈထွမ်ႇၵႂၢမ်းၼမ် ၶႂ်ႈဝူၼ်ႉၾၢႆႇတၢင်းႁၵ်ႉၵေႃႈလႆႈ၊ ၾၢႆႇၵၢၼ်မိူင်းၵေႃႈလႆႈ၊ ၶႂ်ႈဝူၼ်ႉၾၢႆႇ လႂ်ၵေႃႈလႆႈ၊ ၶေႃႈမၼ်း ၵေႃႈလိုၵ်ႉ။ ယွၼ်ႉၼၼ်လႄႈ ၶႃႈလႆႈလိူၵ်ႈႁွင်ႉၶိုၼ်း ၽဵင်းၵႂၢမ်း ၸၢႆးလၢဝ်ပိူင်း။ မိူဝ်ႈၼႃႈမႃးတႄႉ မၢင်ၽဝ်ႇတေၸၢင်ႈလိူၵ်ႈပႃး ၽဵင်းၵႂၢမ်းတၢင်ႇၵေႃႉယူႇၶႃႈ ။ ၽဵင်းၵႂၢမ်းတၢင်ႇၵေႃႉႁွင်ႉ    ဝႆႉ ဢမ်ႇလိုၵ်ႉႁႃႉၼႆတႄႉဢမ်ႇၸႂ်ႈ လိုၵ်ႉယူႇ ၵူၺ်းၵႃႈၶႃႈဢမ်ႇၶိုတ်းထိုင်လႆႈ ဢမ်ႇၵပ်းသိုပ်ႇလႆႈငၢႆႈ ဢေႃႈ။ မိူၼ်ၼင်ႇၽဵင်းၵႂၢမ်း ၸၢႆးသၢႆလႅင်းၵေႃႈ ၶႃႈလႆႈပိၼ်ႇတႅမ်ႈဝႆႉယူႇ ဢေႃႈ။

ထၢမ် – ၼႂ်းၽဵင်းၵႂၢမ်းတၢင်းႁၵ်ႉ၊ ၾၢႆႇၵၢၼ်ပၢႆးမိူင်း ၊ လွင်ႈပၼ်ႁႅင်းၸႂ်လႄႈ လၢႆလၢႆဢၼ်ၼၼ်ႉ လႆႈၸႂ် ႁွင်ႉၾၢႆႇလႂ်လိူဝ်ပိူၼ်ႈၶႃႈ။

တွပ်ႇ – ၶႃႈတႄႉ လႆႈၸႂ်ႁွင်ႉတၢင်းမူတ်းယဝ်ႉၶႃႈ။ ၵႂၢမ်းသင် ၾၢႆႇလႂ်သေဢမ်ႇဝႃႈ ပေႃးၼိူဝ်ႉၵႂၢမ်းမၼ်း လိုၵ်ႉၼႆ သူၼ်ၸႂ်ၵူႈဢၼ်ယူႇၶႃႈ။

ထၢမ် – ၽဵင်းၵႂၢမ်း ဢၼ်တႅမ်ႈႁွင်ႉဝႆႉႁၢင်းၵူၺ်း ၸိူဝ်းၼႆႉၵေႃႈလႆႈႁၼ်မီးဝႆႉ လၢႆဢၼ်ယူႇၶႃႈၼေႃ။ ၽဵင်းၵႂၢမ်းမႂ်ႇ ဢၼ်ႁၢင်ႈႁႅၼ်းတေႁဵတ်းဢွၵ်ႇထႅင်ႈၶႃႈလူး ၸွင်ႇမီးဝႆႉယူႇၶႃႈႁႃႉ။

တွပ်ႇ – မီးယူႇၶႃႈ။ ၵူၺ်းၵႃႈ ၶႃႈယူႇတီႈမိူင်းဢမေႊရိၵၼ်ၼႆႉသမ်ႉ ဢမ်ႇၸႂ်ႈဝႃႈယူႇတီႈႁိူၼ်းသေ တွႆႇတိင်ႇႁဵတ်းၵႂၢမ်းမဵဝ်းလဵဝ်ၶႃႈၼႃႇၼေႃႈ။ ၼိုင်ႈဝၼ်းၼႆႉၶႃႈလႆႈႁဵတ်းၵၢၼ်ယူႇ 9 ၸူဝ်ႈမူင်း၊ ၶၢဝ်း ယၢမ်းႁဵတ်းၵၢၼ်ဢၼ်ဢမ်ႇလႆႈၼပ်ႉပႃးၵေႃႈမီး။ ယွၼ်ႉၼၼ်ႉလႄႈ ၵႂၢမ်းမႂ်ႇဢၼ်တိုၵ်ႉတႅမ်ႈ တိုၵ်ႉ ႁဵတ်းဝႆႉသေပႆႇယဝ်ႉတႄႉ မီးၼမ်ယူႇၶႃႈ၊ တေသိုပ်ႇႁဵတ်းၵႂႃႇထႅင်ႈယူႇၶႃႈ။

တီႈၼႆႈၶႃႈၶႂ်ႈၶႆႈထိုင်ၸိုဝ်ႈ ၽူႈႁွင်ႉၵႂၢမ်း ၸၢႆးသၢႆၾူၼ် ဢိတ်ႉၼိုင်ႈ။ မၼ်းၼႆႉၵေႃႈ ပဵၼ်သြႃႇၶႃႈၵေႃႉ ၼိုင်ႈဢေႃႈ။ ၵွပ်ႈသင်ၼႆ ၾိင်ႈထုင်းၵႂၢမ်းတႆး မိူၼ်ၼင်ႇ melody မၼ်း၊ music foundation ၊ music arrangement မၼ်း၊ ပေႃးၶႃႈႁွင်ႉဢမ်ႇမႅၼ်ႈၸိူဝ်းၼႆႉ မၼ်းပဵၼ်ၵေႃႉသွၼ်၊ မူၼ်ႉမႄးပၼ်ၶႃႈ။ ၵွပ်ႈၼႆ ၶႃႈငိၼ်းၸူမ်းၶွပ်ႈၸႂ်ၼိူဝ် မၼ်းၸၢႆးတေႉၶႃႈ။ ပေႃးၶႃႈဢမ်ႇလႆႈထူပ်းၵၼ်တၢင်း ၸၢႆးသၢႆၾူၼ်၊ ၸၢႆး လႅင်းပၢင်ႇၶဝ်ၼႆ ၶႃႈတေဢမ်ႇပဵၼ်မႃးၽူႈႁွင်ႉၵႂၢမ်း၊ ၽူႈတႅမ်ႈၵႂၢမ်းၵေႃႉၼိုင်ႈၶႃႈ။

 ဢၼ်မႂ်ႇမႂ်ႇလိုၼ်းသုတ်းၼႆႉၶႃႈႁဵတ်းဢွၵ်ႇ ၽဵင်းၵႂၢမ်းထႅင်ႈႁူဝ်ၼိုင်ႈ။     ပဵၼ်ၵႂၢမ်းၸၢႆးၶမ်းၵိုင်ႇဢေႃႈ “ယႃႇႁႂ်ႈပီႈမွင်းႁိုင်” ၼႆၶႃႈ၊  ႁဵတ်းပဵၼ် ၾၢႆႇတႆးလႄႈ ၾၢႆႇမၢၼ်ႈသေဢွၵ်ႇဝႆႉ MV ယဝ်ႉၶႃႈ။ ယဝ်ႉၵေႃႈ ၶႃႈသမ်ႉမေႃ တႅမ်ႈၾၢႆႇမၢၼ်ႈလႄႈ မီးဝႆႉၵႂၢမ်းမၢၼ်ႈႁူဝ်ၼိုင်ႈ “မနက်ဖြန်အတွက် သီချင်းတစ်ပုဒ်” ၼႆၶႃႈ ပဵၼ်ၽဵင်း ၵႂၢမ်းဢၼ်ပၼ်ႁႅင်းၸႂ်ဢေႃႈ။

ထၢမ် – သင်ၶႂ်ႈပႂ်ႉပၼ်ႁႅင်းထွမ်ႇငိၼ်းၽဵင်းၵႂၢမ်းပီႈႁဝ်းၼႆၸိုင် တေလႆႈပႂ်ႉပၼ်ႁႅင်းတီႈလႂ်ၽွင်ႈၶႃႈ။

တွပ်ႇ – ပၼ်ႁႅင်းလႆႈတီႈ YouTube လႄႈ Facebook ၸိုဝ်ႈ “Sai De Moine” ၼႆၶႃႈ။ Facebook တႄႉပဵၼ်ဢၵွင်ႉသုၼ်ႇတူဝ်ၵူၺ်းၶႃႈ၊  Page တႄႉတေဢမ်ႇပေႃးပဵၼ်ၸႂ်ႉ။  ၽဵင်းၵႂၢမ်းၼႆႉ  တၢင်ႇဝႆႉတၢင်းတီႈ YouTube  လႄႈၼႂ်း Facebook ယဝ်ႉၶႃႈ။

ထၢမ် – ယၢမ်းလဵဝ် တီႈၼႂ်းမိူင်းႁဝ်းၶႃႈၵေႃႈ ပဵၼ်ပၢင်တိုၵ်းသိုၵ်းသိူဝ်ဝႆႉ၊ ၵူၼ်းၼုမ်ႇၵူၼ်းမိူင်းလႆႈပၢႆႈ လႆႈၼီ ဢမ်ႇၸၢင်ႈႁဵတ်းၵၢၼ်ငၢၼ်းဢၼ်ၸဝ်ႈၵဝ်ႇပႃးဝႃႇသၼႃႇ။ ၵွပ်ႈၼၼ်လႄႈ ယူႇတီႈပီႈႁဝ်းသေ တေၶႂ်ႈပၼ်ႁႅင်းၸႂ် ၵူၼ်းၼုမ်ႇတႆးႁဝ်းၸိူင်ႉႁိုဝ်ၽွင်ႈၶႃႈ။

တွပ်ႇ – ၶေႃႈထၢမ်ၶႅမ်ႉတေႉၶႃႈ။ မိူဝ်ႈႁဝ်းၶႃႈတႄႇတွင်ႈထၢမ်ၵၼ်ၼၼ်ႉ ၶႃႈလႆႈလၢတ်ႈၼႄဝႃႈ ၶႃႈလုၵ်ႉ တီႈလႂ်မႃးၼႆၶႃႈၼေႃႈ။ ဝဵင်းတၢႆႉၵျီး၊ တိူင်းပႃႇၵိူဝ် ဢၼ်ဝႃႈၼႆႉ ၸဵမ်မိူဝ်ႈပၢၼ်လႂ်ပူၼ်ႉမႃး မၼ်းတိုၼ်း ပဵၼ်ယူႇဝႆႉၼႂ်း ၼႃႈတီႈမီးၽေး(အနက်ရောင်နယ်မြေ) ၶႃႈဢေႃႈ။ ၵူၼ်းၼုမ်ႇတႆးႁဝ်း မၢင်ၸိူဝ်းတိုၵ်ႉ လႆႈပၢႆႈၽေးယၢမ်းလဵဝ်ၵူၺ်း၊ ၶႃႈတႄႉလႆႈပၢႆႈၽေးမႃးၸဵမ်မိူဝ်ႈဝၼ်းၼၼ်ႉဢေႃႈ။ မိူဝ်ႈၶႃႈပၢႆႈဢွၵ်ႇမႃး တီႈဝၢၼ်ႈၼၼ်ႉ ၶႃႈလႆႈၵႂႃႇယူႇသဝ်းၸွမ်းႁိူၼ်းပီႈၼွင်ႉ တီႈတွင်ႇဢူႇ၊ ၽိဝ်း၊ မိတ်ႉထီႇလႃႇ ၊ မၢၼ်း တလေး ၊ တႃႈၵုင်ႈ ၸိူဝ်းၼႆႉ ၶႃႈဢမ်ႇတွၼ်ႉလႆႈယူႇတီႈႁိူၼ်းသေပွၵ်ႈၶႃႈ။ ၼႂ်းႁဝ်းၶႃႈပီႈၼွင်ႉ သမ်ႉ ၵူၼ်းၸၢႆးလၢႆ လၢႆၵူၺ်းမီး 7 ၵေႃႉဢေႃႈ ၼၢင်းယိင်းမီး 3 ၵေႃႉ။ ၵွပ်ႈၼၼ်လႄႈ ႁဝ်းပီႈၼွင်ႉလႆႈ ၽႄၵၼ်သေပၢႆႈ။ ပေႃးပိူၼ်ႈဢမ်ႇၺွပ်းၶျေႃးယဝ်ႉၼႆၵေႃႈ ပွၵ်ႈမိူဝ်းႁိူၼ်းၶိုၼ်း။ မိူဝ်ႈပၢၼ်ၼၼ်ႉသမ်ႉ ယၢင်းၽိူၵ်ႇၶဝ် ၶႂ်ႈႁၢႆႉ ဢိၼ်ႉၼိုင်ႈ ပေႃးႁၼ်လုၵ်ႈဢွၼ်ႇၸၢႆးမၢဝ်ႇဢွၼ်ႇ ဢႃယုမွၵ်ႈ 14-15 ၼႆ ၶဝ်တေ ဢဝ်ၵႂႃႇဢေႃႈ။ ယွၼ်ႉၼၼ် လွင်ႈလႆႈပၢႆႈၽေးပၢႆႈသိုၵ်းၼႆႉ ၶႃႈယၢမ်ႈၺႃးမႃး ၸဵမ်ဝၼ်းၼၼ်ဢေႃႈ။

ၶႃႈတေၶႂ်ႈၶႆႈၼႄလွင်ႈၶႃႈ ႁႂ်ႈပေႃးၸၢင်ႈဢဝ်ၵႂႃႇပဵၼ်ႁႅင်းၸႂ်ၶႃႈၼေႃႈ။ မိူဝ်ႈတႄႇပၢႆႈဢွၵ်ႇဝၢၼ်ႈ ၵႂႃႇ ၼၼ်ႉ ၶႃႈလႆႈၵႂႃႇႁဵတ်းၵၢၼ် ႁဵတ်းၵူၼ်းလၢင်ႉထၢင် ပတ်းၽဵဝ်ႈတီႈတွင်ႇဢူႇ။ ႁူင်းႁဵၼ်းၵေႃႈတၼ်းလႆႈ ၶိုၼ်ႈထိုင်ၸၼ်ႉၸဵတ်းၵူၺ်း။ ၵူၺ်းၵႃႈၶႃႈသမ်ႉၵၢမ်ႇလီ ပေႃးလဵင်ႉတီႈဢၼ်ၶႃႈၵႂႃႇႁဵတ်းၵၢၼ်ၼၼ်ႉ သွၼ်ပၼ်ၶႃႈလိၵ်ႈမၢၼ်ႈ လိၵ်းဢင်းၵိတ်း။ ယဝ်ႉၵေႃႈ ၶႃႈသိုပ်ႇၵႂႃႇတီႈတႃႈၵုင်ႈ ၺႃးသထေးထႅင်ႈ ၵေႃႉၼိုင်ႈ။ ၶႃႈသမ်ႉပဵၼ်ၵူၼ်းၵႆႉဢၢၼ်ႇလိၵ်ႈ၊ ပေႃးႁဵတ်းၵၢၼ်ၵေႃႈ ၶႃႈဢမ်ႇလႃႈလီႁဵတ်း၊ ၶႃႈပဵၼ် ၵူၼ်းႁဵတ်းၵၢၼ်တႅတ်ႈတေႃး၊ ၶႃႈဢမ်ႇဢုပ်ႇလိူဝ်ဢၼ်ၶႃႈႁူႉ၊ ၶႃႈၶတ်းၸႂ်လဵပ်ႈႁဵၼ်း ဢၼ်လူဝ်ႇႁဵၼ်း၊ ၶႃႈထွမ်ႇၼမ်ၼမ် လၢတ်ႈဢေႇဢေႇ။ ၵွပ်ႈၼၼ်လႄႈ ႁဝ်းပဵၼ်ၵူၼ်းပၢႆႈၽေးၼႆသေတႃႉ ဢမ်ႇလူဝ်ႇ လႆႈၸႂ်လဵၵ်ႉ ပေႃးႁဝ်းလၵ်းလႅမ်၊ ဢမ်ႇၵိၼ်လဝ်ႈတေႃႇလွင်း၊ ဢမ်ႇႁဵတ်းလွင်ႈ ဢၼ်ဢမ်ႇလီၼႆၵေႃႈ ၵူၼ်းႁၵ်ႉႁဝ်းတေၼမ်။ ၵႆႉဢၢၼ်ႇလိၵ်ႈ၊ ႁႃတၢင်းႁူႉၼမ်ၼမ်၊ ၶတ်းၸႂ်ႁဵတ်းၵၢၼ်ၼႆ ပေႃႈလဵင်ႉမႄႈ လဵင်ႉႁဝ်းၵေႃႈ တေတူၺ်းထိုင်ၸွႆႈထႅမ်ႁဝ်းမႃး။

ထႅင်ႈလွင်ႈၼိုင်ႈသမ်ႉ ၽႅဝ်ၵႂႃႇတီႈလႂ်ၵေႃႈ ႁဝ်းယႃႇပေလိုမ်းၸိူဝ်ႉၶိူဝ်း ဝၢၼ်ႈမိူင်းပီႈၼွင်ႉႁဝ်း။ ပႃးဝႃႇသ ၼႃႇဢၼ်လႂ်ၵေႃႈ ႁႂ်ႈၽိုၵ်းဝႆႉယူႇတႃႇသေႇ။ မိူၼ်ၼင်ႇၶႃႈၼႆႉ ပႃးဝႃႇသၼႃႇတွင်ႇတိင်ႇႁွင်ႉၵႂၢမ်း မႃး ၸဵမ်မိူဝ်ႈၼၼ်ႉ မႄႈႁဝ်းပေႃးပွင်ႉၶႃႈဢေႃႈ၊ ပေႃးမိူင်းလႅင်းလုၵ်ႉမႃးပႆႇလႆႈသုၵ်ႈၼႃႈသီၶဵဝ် သမ်ႉပေႃး တွႆႇတိင်ႇႁွင်ႉၵႂၢမ်းယဝ်ႉ။ ၶႃႈၵႂႃႇထိုင်ဝဵင်းလႂ် မိူင်းလႂ်ၵေႃႈ သိုဝ်ႉတိင်ႇဢွၼ်တၢင်း၊ ဢမ်ႇၼၼ်ၵေႃႈ ပႃး ၵႂႃႇၵမ်းလဵဝ်။ မိူဝ်ႈပၢၼ်ၶႃႈႁဝ်းၶဝ်ၼၼ်ႉ တႃႇတေလဵပ်ႈႁဵၼ်းတၢင်းႁူႉၼႆႉဢမ်ႇငၢႆႈ၊ YouTube ၊Facebook ၸိူဝ်းၼႆႉၵေႃႈဢမ်ႇပႆႇမီး။

ၶႂ်ႈသင်ႇထိုင် ၵူၼ်းၼုမ်ႇႁဝ်းၶဝ်တႄႉ ယႃႇပေလိုမ်းၽဝၸဝ်ႈၵဝ်ႇ လုၵ်ႉတီႈလႂ်မႃးၵေႃႈ ႁဝ်းလူဝ်ႇတွင်း ဝႆႉတႃႇသေႇ၊ မိူဝ်းၼႃႈ ႁဝ်းၶႂ်ႈပဵၼ်သင်ၼႆၵေႃႈ ႁဝ်းလူဝ်ႇမီးယိူင်းဢၢၼ်းဝႆႉယူႇတႃႇသေႇ။ ယွၼ်ႉ ႁဝ်း ပၢႆႈ ဢွၵ်ႇမိူင်းႁဝ်းမႃးလႄႈ မၼ်းဢမ်ႇၸႂ်ႈသူၼ်ႁႆႈၼႃးႁိူၼ်းယေးႁဝ်း ၵွပ်ႈၼၼ်လူဝ်ႇ လႆႈမႄး တူဝ်ၸႂ် ႁဝ်း။ ၶႃႈတႄႉယုမ်ႇယမ်ဝႃႈ ပေႃးႁဝ်းႁၢင်ႈႁႅၼ်းတူဝ်ဝႆႉၸိုင် သင်တိုဝ်ႉတၢင်းထိုင်မႃး ႁဝ်းတေ ဝၵ်ႉ တၢဝ်းဢဝ်တိုဝ်ႉတၢင်းၼၼ်ႉလႆႈဢေႃႈ။  ဢၼ်လႆႈငိၼ်းၶၢဝ်ႇငဝ်း မိူင်းႁဝ်းၶႃႈဢမ်ႇၵတ်းယဵၼ်ၼႆ ၵေႃႈ ပဵၼ်ၸႂ်ဢမ်ႇလီၸွမ်းယူႇၶႃႈ။

ထၢမ် – ၶေႃႈၵႂၢမ်းၸိူဝ်းၶႂ်ႈၾၢၵ်ႇတွၼ်ႈထိုင် ပီႈၼွင်ႉၽူႈပၼ်ႁႅင်းလူး တေမီးၸိူင်ႉႁိုဝ်ၽွင်ႈၶႃႈ။

တွပ်ႇ – မိူဝ်ႈၼႆႉၶႃႈၸႂ်ဢမ်ႇပေႃးလီ။ ယွၼ်ႉဢမ်ႇလႆႈလၢတ်ႈၵႂၢမ်းတႆး ၼမ်ၼမ်ၵူႈဝၼ်းလႄႈ ၵႂၢမ်း တႆးၶႃႈၼႆႉ ပီႈၼွင်ႉၽူႈပၼ်ႁႅင်းၶႃႈလႄႈ ၽူႈပၼ်ႁႅင်းတီႈ ၽူႈတွႆႇႁွၵ်ႈတေလႆႈထွမ်ႇယၢပ်ႇ။ ယွၼ်ႉ ၼၼ်လႄႈ ၶႃႈၶႂ်ႈယူႇတီႈၼႆႈသေ ယွမ်းၼွမ်းယူႇၶႃႈ။ ယဝ်ႉၵေႃႈ သင်ပီႈၼွင်ႉႁဝ်းၶဝ် မီးၽဵင်းၵႂၢမ်းဢၼ် ၶႂ်ႈႁႂ်ႈၶႃႈႁဵတ်းပၼ် ပိၼ်ႇပၼ်ၼႆၵပ်းသိုပ်ႇမႃးတီႈၶႃႈ လႆႈယူႇဢေႃႈ။ ၶႃႈတေၶိုၼ်းၵပ်းသိုပ်ႇၵႂႃႇပၼ်တီႈ ၸဝ်ႈၶွင်မၼ်း။ ၵူၺ်းၵေႃႈ ယွၼ်ႉမီးလွင်ႈလႆႈၸႂ်ႉၸၢႆႇငိုၼ်းၽွင်ႈလႄႈ ၶႃႈတေဢမ်ႇႁဵတ်းပၼ် လႆႈ ၼမ် ၶႃႈ။ ပေႃးဝႃႈလႆႈႁဵတ်းပၼ် ၽဵင်းၵႂၢမ်းဢၼ်ယွၼ်းမႃးၸိူင်ႉၼၼ်ၼႆ ၶႃႈပျေႃႇသိူဝ်းၸႂ်လႄႈ မီး လွင်ႈ ယုမ်ႇယမ်တူဝ် ၼမ်ၶိုၼ်ႈမႃး။ ၶႃႈလႆႈၸႂ်ႁဵတ်းမဵဝ်းဢၼ်တေမီးလွင်ႈၶဵင်ႇတႃႉ ၼၼ်ႉဢေႃႈ။ ၵူၺ်းၵႃႈ ပေႃးပဵၼ်ၽဵင်းၵႂၢမ်း ၶူးၸၢႆးၶမ်းလဵၵ်းတႄႉ ၶႃႈဢမ်ႇႁတ်းတိူဝ်ႉၶႃႈ၊ ယွၼ်ႉမၼ်းသုင်ႁႅင်းတွၼ်ႈၼႃႇၶႃႈ။ လိုၼ်းသုတ်းတႄႉၵေႃႈ ႁႂ်ႈၸုမ်းၶၢဝ်ႇၽူႈတွႆႇႁွၵ်ႈၶိုၼ်ႈယႂ်ႇမႂ်ႇသုင် ႁဵတ်းလိူဝ်ၶႅမ်ႉလိူဝ်သေၼႆႉထႅင်ႈၶႃႈ။ မႂ်ႇသုင်ၶႃႈ…။