ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ဢွၵ်ႇလိၵ်ႈပိုၼ်ၽၢဝ်ႇ လွင်ႈဢၼ်လႆႈၸွႆႈထႅမ်ၸၢႆးသၢင်ႇယဵၼ်ႇ ႁႅင်းၵၢၼ်တႆးဢၼ်ၺႃးပေႃႈလဵင်ႉထႆးၶႃႈႁႅမ်ယဝ်ႉၾင်လိၼ်ပႅတ်ႈ တီႈမႄႈၸႅမ်ႇ ၵဵင်းမႆႇ ၸိုင်ႈထႆးၼၼ်ႉသေဢမ်ႇၵႃး တေသိုပ်ႇၸွႆႈထႅမ်ၵႂႃႇထႅင်ႈမိူဝ်းၼႃႈ။
ဝၼ်းတီႈ 29/08/2018 ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ဢွၵ်ႇလိၵ်ႈပိုၼ်ၽၢဝ်ႇလွင်ႈဢၼ်လႆႈၸွႆႈထႅမ် ၸၢႆးသၢင်ႇယဵၼ်ႇ ႁႅင်းၵၢၼ်တႆးဢၼ်ၺႃးၶႃႈတၢႆၼၼ်ႉသေ ဢမ်ႇၵႃး တေၸွႆႈထႅမ်ပၼ်ပႃးပီႈၼွင်ႉလုၵ်ႈမေး ၸၢႆးသၢင်ႇယဵၼ်ႇ ႁႂ်ႈလႆႈလွင်ႈၽဵင်ႇပဵင်းပဵၼ်ထမ်း ႁႂ်ႈလႆႈႁပ်ႉလွင်ႈၵမ်ႉၸွႆႈၶိုၼ်းတႃႇယူႇတႃႇၵိၼ်ၵႂႃႇမိူဝ်းၼႃႈ။ လိူဝ် ၼၼ်ႉ ၵေႃႉပူၼ်ႉပႅၼ်ႁဵတ်းၽိတ်းၵေႃႈ ၼင်ႇႁိုဝ်တေလႆႈႁပ်ႉတူတ်ႈၼင်ႇပၵ်းပိူင်မၢႆမီႈမီးဝႆႉၼၼ်ႉ HRDF တေႁူမ်ႈမိုဝ်းတင်းၸဝ်ႈၼႃႈတီႈပလိၵ်ႈသေ ၶတ်းၸႂ်ႁဵတ်းသၢင်ႈၵႂႃႇ ဝႃႈၼႆ။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ် ႁဝ်းၶႃႈဢွၵ်ႇလိၵ်ႈၼၼ်ႉ ပိူဝ်ႈႁႂ်ႈၸဝ်ႈၼႃႈတီႈ လူင်ပွင်ၸိုင်ႈမိူင်းထႆးႁူႉဝႃႈ ၸုမ်းႁဝ်းၶႃႈတိုၵ်ႉတိတ်း တၢမ်ၶၻီးလွင်ႈၼႆႉယူႇ ၾၢႆႇၼိုင်ႈၵေႃႈ တေႁၢင်ႈႁႅၼ်းသၢၵ်ႈသေႇ လၵ်းထၢၼ်မၼ်းသေ တေဢွၼ် ၵၼ်ၵႂႃႇတုၵ်းယွၼ်းၵႃႈသၢႆႈတႅၼ်းတီႈလုမ်းတူၺ်းထိုင်လွင်ႈၽဵင်ႇပဵင်းပဵၼ်ထမ်းလႄႈ တေပၵ်းတႃပႂ်ႉ တူၺ်းလွင်ႈႁဵတ်းၵၢၼ်ၸဝ်ႈၼႃႈတီႈၶဝ်ဝႃႈ ၶဝ်ပၼ်တူတ်ႈတၢမ်ႇ ၵူၼ်းႁဵတ်းၽိတ်းၼၼ်ႉထိုင် ၶၵ်ႉတွၼ်ႈလႂ်ၸိူဝ်းၼႆႉ ” ဝႃႈၼႆ။
ပူၼ်ႉမႃးမိူဝ်ႈဝၼ်းတီႈ 08/08/2018 ပေႃႈလဵင်ႉ ၸႂ်လမ်တေႃႇလုၵ်ႈလဵင်ႉႁႅင်းၵၢၼ်တႆး ဢၼ်ၵႂႃႇႁႃ ႁဵတ်း ၵၢၼ် (ပိူၼ်ႈ)တၢင်းၼွၵ်ႈလႄႈ လမ်းၵႂႃႇၸွမ်းယိုဝ်းထိုင်တီႈပေႃးတၢႆ သိုပ်ႇၼၼ်ႉ ဢဝ်ၵႂႃႇၾင် လိၼ်ပႅတ်ႈ တီႈၼႂ်းပႃႇႁိမ်းသူၼ်မၢၵ်ႇၸွၵ်း။ ဝၼ်းတီႈ 17/08/2018 ၸဝ်ႈၼႃႈတီႈ ၸင်ႇႁူမ်ႈၵၼ် ၵႂႃႇတီႉၺွပ်းလႆႈ တူဝ်ပေႃႈလဵင်ႉလႄႈ ႁူမ်ႈ ၵၼ်ၶုတ်းဢဝ်ၶၢပ်ႈတူဝ်တၢႆၸၢႆးသၢင်ႇယဵၼ်ႇ ၵေႃႉပဵၼ် လုၵ်ႈလဵင်ႉၼၼ်ႉ သူင်ႇႁူင်းယႃသူၼ်ၻွၵ်ႇ ပိူဝ်ႈၵူတ်ႇထတ်း ႁႃလွင်ႈတၢင်းၵၢၼ်တၢႆ။ သိုပ်ႇၼၼ်ႉ ယူႇတီႈႁူင်းယႃ သူၼ်ၻွၵ်ႇသေ လုမ်းလႃးသၢင်းၵဵဝ်ႇၽဝ်ၶၢပ်ႈတူဝ်မၼ်းၸၢႆးၵႂႃႇ မိူဝ်ႈဝၼ်းတီႈ 19/08/2018။
