ဝၼ်းတီႈ 14/12/2025 (မိူဝ်ႈသိုၼ်း) ဝၢႆးဝၼ်းၼႆႉ မီးၵူၼ်းယိပ်းၵွင်ႈ 2 ၵေႃႉ ၶဝ်ႈယိုဝ်း ၵူၼ်းမႃးၶဝ်ႈႁူမ်ႈပၢင်ပွႆး ႁႃႊၼုၵႃႊ တီႈၾင်ႇပၢင်ႇလၢႆႇ ပုၼ်ႊတီႊ (Bondi Beach) ဝဵင်းၸိတ်ႊၼီႊ (Sydney) မိူင်းဢေႃႊသတေႊလီႊယိူဝ်ႊ မီးၵူၼ်းလူႉတၢႆ 16 ၵေႃႉ၊ ၸိူဝ်းမၢတ်ႇၸဵပ်းသေ လႆႈၶိုၼ်ႈႁူင်းယႃဝႆႉသမ်ႉ မီး 40 ၵေႃႉ၊ ၼႂ်းၵူၼ်းမၢတ်ႇၸဵပ်းၼၼ်ႉ ပလိၵ်ႈၾၢႆႇႁူမ်ႇလူမ်ႈ ပႃးဝႆႉ 2ၵေႃႉ ဝႃႈၼႆ။

ၼႂ်းၵူၼ်း ဢၼ်ၺႃးယိုဝ်းသေလူႉတၢႆၼၼ်ႉ ပႃးဢွၼ်ႇယိင်းဢႃယု 10 ၶူပ်ႇၵေႃႉၼိုင်ႈ။ လိူဝ်ၼၼ်ႉ ပဵၼ်သႅၼ်းၵူၼ်းၼုမ်ႇၵူၼ်းထဝ်ႈ ဢႃယု 10 ၶူပ်ႇ ၼႂ်းၵႄႈ 87 ပီ ၸိူဝ်းၵႂႃႇဢႅဝ်ႇလႄႇတီႈၾင်ႇပၢင်ႇလၢႆႇ။

ၵူၼ်းၵေႃႉႁၼ်ၸွမ်းပိူင်ပဵၼ်ၼၼ်ႉ ၵေႃႉၼိုင်ႈ လၢတ်ႈဝႃႈ – ”မိူဝ်ႈတႄႇမၼ်း ထၢင်ႇဝႃႈ ပဵၼ်ပိူၼ်ႈၸုတ်ႇမူၵ်ႇၾႆးတႅၵ်ႇ၊ ဝၢႆးႁူႉဝႃႈပဵၼ်လွင်ႈပိုတ်းယိုဝ်းၼႆၵေႃႈ ၼႅတ်ႈဢွၼ်ၵၼ် လႅၼ်ႈပႅပ်ႉၵမ်းလဵဝ်” ဝႃႈၼႆ။

လွင်ႈပိုတ်းယိုဝ်းၼႆႉ ၵဵဝ်ႇၶွင်ႈၵၼ်တင်း ၽႃႇသႃႇလွင်ႈၵိူဝ်းယမ်။ ယွၼ်ႉၼၼ် တူင်ႇဝူင်းၵူၼ်းမိူင်းမၢၼ်ႈ ၸိူဝ်းယူႇသဝ်းဝႆႉတီႈ ဝဵင်းသိတ်ႊၼီႊ (Sydney)ၵေႃႈ တိုၵ်းသူၼ်းၵၼ်ဝႃႈ ႁႂ်ႈငိူင်ႉဝႄႈဢွၼ်တီႈၵူၼ်းၵိုၼ်း၊ ငိူင်ႉဝႄႈလွင်ႈတႅမ်ႈတၢင်ႇ သျႄးၾူတ်ႊ (Share Post) ၸိူဝ်းၵဵဝ်ႇၶွင်ႈလွင်ႈၼႆႉ တီႈၼိူဝ် သူဝ်ႊသျႄႊမီႊတီႊယိူဝ်ႊ (Social Media) ဝႃႈၼႆ။

ၵူၼ်းယိပ်းၵွင်ႈ 2 ၵေႃႉၼၼ်ႉ ပဵၼ်ပေႃႈလုၵ်ႈၵၼ်။ ၵေႃႉပဵၼ်ပေႃႈ ဢႃယု 50 ပီ ထုၵ်ႇပလိၵ်ႈၾၢႆႇႁူမ်ႇလူမ်ႈ ယိုဝ်းတၢႆတီႈ ဢွင်ႈတီႈပဵၼ်လွင်ႈပိုတ်းယိုဝ်းၵၼ်၊ ၵေႃႉပဵၼ်လုၵ်ႈၸၢႆးသမ်ႉ ဢႃယု 24 ပီ ၺႃးယိုဝ်းမၢတ်ႇၸဵပ်းသေ လႆႈသူင်ႇယူတ်းယႃတူဝ်ဝႆႉတီႈႁူင်းယႃ။

ဝၼ်းၼၼ်ႉ ပဵၼ်ဝၼ်းပွႆး ႁႃႊၼုၵႃႊ ဢၼ်ၸုမ်းၸၢဝ်းၶိူဝ်း ၵျူးၶဝ် ၸတ်းႁဵတ်းတီႈၾင်ႇပၢင်ႇလၢႆႇ၊ မီးၵူၼ်းၶဝ်ႈႁူမ်ႈၸွမ်း မွၵ်ႈ 1000 ၵေႃႉၼႆ ၸဝ်ႈၼႃႈတီႈ လၢတ်ႈၼင်ႇၼႆ။

မိူၼ်ၼႆ မိူဝ်ႈဝၼ်းတီႈ 13 ဝၼ်းသဝ် ပူၼ်ႉမႃးၼႆႉၵေႃႈ ၵူၼ်းၸၢႆးၵေႃႉၼိုင်ႈ လၢၵ်ႈၵွင်ႈယိုဝ်း ၼႂ်းဝၢင်းၸၼ်ႉၸွမ် ပရွင်ႊ တီႈဝဵင်း ပရူဝ်ႊပီးတၢၼ်ႉသ် မိူင်းဢမေႊရိၵၼ်ႊ။ မႅၼ်ႈမိူဝ်ႈလုၵ်ႈႁဵၼ်းၶဝ်တိုၵ်ႉတွပ်ႇလိၵ်ႈ။ လုၵ်ႈႁဵၼ်း တၢႆထင်တီႈ 2ၵေႃႉ မၢတ်ႇၸဵပ်းထႅင်ႈ 9ၵေႃႉ။ ၵူၼ်းယိပ်းၵွင်ႈၼၼ်ႉ မီးဢႃယု မွၵ်ႈ 30 ပီ ပူၵ်ႉၼႃႈ ၼုင်ႈၶူဝ်းလမ်ဝႆႉတင်းတူဝ်။ ဝၢႆးပိုတ်းယိုဝ်းလုၵ်ႈႁဵၼ်းၶဝ်ယဝ်ႉ မၼ်းၸၢႆး လႅၼ်ႈပၢႆႈ၊ လွတ်ႈဝႆႉ။ ပလိၵ်ႈၾၢႆႇႁူမ်ႇလူမ်ႈဝဵင်းၶဝ် တိုၵ်ႉလိုပ်ႈလမ်းတီႉၺွပ်းမၼ်းၸၢႆးယူႇ ဝႃႈၼႆ။