ၼႂ်းႁၢင်ပီ 2025 ၼႆႉ ၶွမ်ႊပၼီႊ ႁဵတ်းဢွၵ်ႇၶိူင်ႈၸႂ်ႉတိုဝ်း ဢီႊလထရေႃႊၼိၵ်ႉသ် (Samsung) ၵပ်းသိုပ်ႇပိုတ်ႇၼႄ ၾူၼ်းမႂ်ႇ သႅၼ်း Galaxy Z TriFold ဢၼ်တူပ်ႉလႆႈ သၢမ်တူပ်ႉ ပဵၼ်ပွၵ်ႈၵမ်းႁႅၵ်ႈ မိူဝ်ႈဝၼ်းတီႈ 2 လိူၼ်တီႊသႅမ်ႊပိူဝ်ႊၼႆႉ။
ၽူႈလဵပ်ႈႁဵၼ်းၶဝ်တႄႉ ထတ်းသၢင်လၢတ်ႈဝႃႈ – ယၢမ်းလဵဝ် ၼႂ်းလွၵ်းၵၢတ်ႇၾူၼ်းဢၼ်တူပ်ႉလႆႈၼႆႉ မိူင်းၶႄႇ ယူႇၾၢႆႇပေႉပုၼ်ႈဝႆႉ။ ယိူင်းဢၢၼ်းတႃႇတေဢဝ်တီႈယူႇလႆႈၶိုၼ်း ၼႂ်းလွၵ်းၵၢတ်ႇသေ ၸင်ႇႁဵတ်းဢွၵ်ႇမႃး ၼႆယဝ်ႉ။
ၵူၺ်းၵႃႈ ယွၼ်ႉၵႃႈၸႂ်ႉၸၢႆႇသုင်လႄႈ မီးလွင်ႈယၢပ်ႇၽိုတ်ႇ ၼႂ်းၶၵ်ႉတွၼ်ႈ ၵၢၼ်ႁဵတ်းဢွၵ်ႇသေ တေႃႇထိုင်ယၢမ်းလဵဝ် လွၵ်းၵၢတ်ႇၾူၼ်း ဢၼ်တူပ်ႉလႆႈၼၼ်ႉ ယင်းတိုၵ်ႉၼိမ်ယဵၼ်ဝႆႉယူႇ ဝႃႈၼႆ။
ၾူၼ်းမႂ်ႇ သႅၼ်း Galaxy Z TriFold ၼႆႉ ၵႃႈၶၼ်ၵိုင်ႇ ငိုၼ်းၶူဝ်ႊရီႊယိူဝ်ႊၸၢၼ်း 3.59 ဝမ်ႊ (ငိုၼ်းဢမေႊရိၵၼ်ႊ တေႃႊလႃႊ 2,440)။ သင်ပိုတ်ႇၵီႈတူၺ်းၸိုင် တၢင်းၵႂၢင်ႈၼႃႈၾူၼ်း မီးထိုင် 10 ၼိဝ်ႉ၊ ၵႂၢင်ႈလိူဝ်သေၾူၼ်းတူပ်ႉ သႅၼ်း Galaxy Z Fold 7 ယၢမ်းလဵဝ်ၼႆႉ 25%။
ၾူၼ်းမႂ်ႇ Galaxy Z TriFold ၼႆႉ တေတႄႇၶၢႆပဵၼ်တၢင်းၵၢၼ်ၵႂႃႇ ၼႂ်းမိူင်းၶူဝ်ႊရီႊယိူဝ်ႊၸၢၼ်း ၼႂ်းဝၼ်းတီႈ 12/12/2025 ၼႆယဝ်ႉ။
မိူၼ်ၼင်ႇ တီႈမိူင်းၶႄႇ၊ သိင်ႊၵပူဝ်ႊ၊ ထႆႇဝၼ်း လႄႈ UAE ၸိူဝ်းၼႆႉတႄႉ တေတႄၶၢႆၵႂႃႇ ၵွၼ်ႇပီၼႆႉသဵင်ႈတီႈၼႂ်းလွၵ်းၵၢတ်ႇ မိူင်းဢမေႊရိၵၼ်ႊသမ်ႉ တေပိုၼ်ၽႄၶၢႆၵႂႃႇ ၼႂ်းႁူဝ်ပီ 2026 ဝႃႈၼႆ။
ၶၢဝ်ႇ- ၼၢင်းငိုၼ်းႁွမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ