ၸွမ်ၸိုင်ႈ တေႃႊၼႄႊလ်ထရမ်ႉ လၢတ်ႈဝႃႈ တေမႄးၵူတ်ႇထတ်းၶိုၼ်း ၵူၼ်းမိူင်း 19 မိူင်း ၸိူဝ်းယိပ်းဝႂ်သီၶဵဝ် Green Card သေ ၶၢႆႉၵႂႃႇယူႇသဝ်းဝႆႉ တီႈၼႂ်းမိူင်းဢမေႊရိၵၼ်ႊ ဝႃႈၼႆ။

ၼႂ်း 19 မိူင်းၼၼ်ႉ ပႃးဝႆႉမိူင်းႁူမ်ႈတုမ်မၢၼ်ႈ။ လိူဝ်ၼၼ်ႉ ပဵၼ်မိူင်း ဢႃႇၾၵၼ်ႊၼိသတၼ်ႊ၊ မိူင်းၶျႅတ်ႉ၊ ၵုၼ်ႊၵူဝ်ႊ၊ ဢီႊၵူၺ်ႊတူဝ်ႊၼီႇယႄႇၵီႇၼီႇ၊ ဢီႊရီႊထရီးယႃး၊ ႁေႇတီႇ၊ ဢီႇရၢၼ်ႇ၊ လိတ်ႉပျႃး၊ သူဝ်ႇမႃႇလီႇယႃႇ၊ သူႇတၼ်ႇ၊ ယီႇမိၼ်ႇ၊ ပူႇရုၼ်ႇတီႇ၊ ၵျူးပႃး၊ မိူင်းလၢဝ်း၊ သီႇယႃႇလီႇယုၼ်ႇ၊ တူဝ်ႇၵူဝ်ႇ၊ တၢၵ်ႉမိၼ်ၼိတ်ႉသတၼ်ႇ လႄႇ မိူင်းပိၼ်ႇၼီႇၸွႆးလႃး ၸိူဝ်းၼႆႉ။ၵူၼ်းမိူင်းတႆး မိူင်းမၢၼ်ႈ ၸိူဝ်းႁွတ်ႈထိုင်မိူင်းဢမေႊရိၵၼ်ႊ တႄႉ ပဵၼ်ဢၼ်မႆႈၸႂ်သေ ပႂ်ႉထွမ်ႇပႂ်ႉတူၺ်းဝႆႉယူႇ။

ၼႂ်းဝၼ်းပုတ်ႉ ဝၼ်းတီႈ 26/11/2025 ၼႆႉ ၵူၼ်းမိူင်း ဢႃႇၾၵၼ်ႇ ၼိတ်ႊသတၢၼ်ႊၵေႃႉၼိုင်ႈ လၼ်ႇၵွင်ႈယိုဝ်းၽူႈၶဝ်ႈၸုမ်းတပ်ႉပႂ်ႉႁူမ်ႇလူမ်ႈ 2 ၵေႃႉ ႁိမ်းႁိူၼ်းႁေႃၶၢဝ် တီႈဝဵင်းလူင် ဝႃႇသျိၼ်ႇတၢၼ်ႇတီႇၸီႇ မိူင်းဢမေႊရိၵၼ်ႊ။ ဝၢႆးလင်ၼၼ်ႉ ၸွမ်ၸိုင်ႈထရမ်ႉ ပိုၼ်ၽၢဝ်ႇဢွၵ်ႇမႃးဝႃႈ တေမႄးၵူတ်ႇထတ်းၶိုၼ်း ၵူၼ်းၸိူဝ်းယိပ်းဝႂ်သီၶဵဝ် Green Card ။ ၵူၺ်းၵႃႈ တေမႄးၵူတ်ႇထတ်းၶိုၼ်းၸိူင်ႉႁိုဝ်ၼႆတႄႉ ဢမ်ႇလၢတ်ႈဝႆႉပႃး လၢႆးႁူဝ်ယွႆႈမၼ်း။

ၼႂ်းပလိၵ်ႈၾၢႆႇႁူမ်ႇလူမ်ႈ 2ၵေႃႉ ဢၼ်ၺႃးယိုဝ်းၼၼ်ႉ ၵေႃႉၼိုင်ႈ လူႉတၢႆၵႂႃႇယဝ်ႉသေ ထႅင်ႈၵေႃႉၼိုင်ႈၵေႃႈ မၢတ်ႇၸဵပ်းႁၢဝ်ႈႁႅင်းဝႆႉ။

ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉလၢတ်ႈဝႃႈ – လွင်ႈပိုတ်းယိုဝ်းၼႆႉ ပဵၼ်လွင်ႈလွၵ်ႇငိုတ်ႈတေႃႇၵၢၼ်ႁူမ်ႇလူမ်ႈၸိူဝ်ႉၸၢတ်ႈ ဢၼ်ၼိုင်ႈ။ မိူဝ်ႈပၢၼ်လူင်ပွင်ၸိုင်ႈ ၵေႃႉၵဝ်ႇၼၼ်ႉ ဢမ်ႇႁဵတ်းၵၢၼ်ၵူတ်ႇထတ်းလီလီသေ ပၼ်ၶႂၢင်ႉၵူၼ်းၼွၵ်ႈမိူင်း မွၵ်ႈ 20 လၢၼ်ႉၵေႃႉ ၶဝ်ႈယူႇၼႂ်းမိူင်းဢမေႊရိၵၼ်ႊဝႆႉ ဝႃႈၼႆ။

မိူဝ်ႈဝူင်ႈပူၼ်ႉမႃးၼႆႉ ႁွင်ႈၵၢၼ် USCIS ဢၼ်ႁဵတ်းသၢင်ႈၵူတ်ႇထတ်း ဝႂ်သီၶဵဝ် Green Card ၼၼ်ႉ ပိုၼ် ၽၢဝ်ႇဝႃႈ – တေမႄးၵူတ်ႇထတ်းၶိုၼ်းၵူၼ်းပၢႆႈၽေး ၸိူဝ်းၶဝ်ႈၵႂႃႇယူႇသဝ်းၼႂ်းမိူင်းဢမေႊရိၵၼ်ႊ မိူဝ်ႈပၢၼ် ၸွမ်ၸိုင်ႈၵျူဝ်းပၢႆႊတၼ်ႊၼၼ်ႉ တၢင်းသဵင်ႈ ဝႃႈၼႆ။

လိူဝ်ၼၼ်ႉ ဝၼ်းပုတ်ႉပူၼ်ႉမႃးၼႆႉ ဢမေႊရိၵၼ်ႊ လႆႈယင်ႉၵိုတ်းပႅတ်ႈ ၶၵ်ႉတွၼ်ႈၵၢၼ်ငၢၼ်း ဢၼ်ၵူၼ်းမိူင်း ဢႃႊၾၵၼ်ႊၼိတ်ႊသတၢၼ်ႊၶဝ် တၢင်ႇယိုၼ်ႈယွၼ်း တႃႇၶၢႆႉၵႂႃႇယူႇသဝ်း ၼႂ်းမိူင်းဢမေႊရိၵၼ်ႊၼၼ်ႉတၢင်းသဵင်ႈ ၼႆယဝ်ႉ။