မိူဝ်ႈၼႆႉ ဝၼ်းတီႈ 20 လိူၼ်ၼူဝ်ႊဝႅမ်ႊပိူဝ်ႊ ပီ 2025 တူၵ်းမႅၼ်ႈပီတႆး 2120 ၼီႈ လိူၼ်ၸဵင်မႂ်ႇ 1 ၶမ်ႈ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD) ဢွၵ်ႇလိၵ်ႈပိုၼ်ၽၢဝ်ႇ တူင်ႉတၵ်ႉထိုင် ပီႈၼွင်ႉၸိူဝ်ႉၶိူဝ်းတႆး လႄႈ ပီႈၼွင်ႉၵူႈၸၢဝ်းၶိူဝ်း ၼႂ်းမိူင်းၼွၵ်ႈမိူင်းတင်းသဵင်ႈသေ တိုၵ်းသူၼ်းႁႂ်ႈႁူမ်ႈၵၼ်မုင်ႈၼႃႈၸူး လွင်ႈလွတ်ႈလႅဝ်းထၢင်ႇ ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ၸီႉၸမ်ႈဝႆႉဝႃႈ – “ၸိူဝ်ႉၸၢတ်ႈၸၢဝ်းၶိူဝ်းတႆး ဢၼ်ၶိုၼ်ႈယႂ်ႇႁိူင်းထႃးယိုင်ႈယႂ်ႇမႃး ပၢၼ်ၸဝ်ႈဝူင်ႉႁေႃသႅင် ၸဝ်ႈၶုၼ်ႁေႃၶမ်းၸိူဝ်းၼႆႉ ယၢမ်းလဵဝ် ထိုင်ပၢၼ်မိူင်းၸမ်ႁၢမ်း ၶိူဝ်းၸမ်ႁၢႆယဝ်ႉ။ ပဵၼ်ယွၼ်ႉပိူဝ်ႈ ႁဝ်းႁႃး လူင်လိုမ်းလွင်ႈၾိုၵ်းၵမ်လူၺ်ႈတၢင်းၸိုဝ်ႈၸႂ်ႈ- ၼၼ်ႉၵေႃႈပဵၼ်ပိူင်လူင်ဢၼ်ၼိုင်ႈ”– ဝႃႈၼႆ။

လိူဝ်ၼၼ်ႉ SNLD တိုၵ်းသူၼ်းထိုင် ၸၢဝ်းၶိူဝ်းတႆး ၵူၺ်းဢမ်ႇၵႃး ထိုင်ပႃးၵူႈၸၢဝ်းၶိူဝ်း ၼႂ်းမိူင်းႁူမ်ႈ တုမ်တင်းသဵင်ႈဝႃႈ- “ လုၵ်ႉတီႈ ပၢင်ပွႆးႁပ်ႉၸဵင် ၵေႃႇၸဵင် ၵိၼ်ၸဵင် ပႂ်ႉၸဵင် ပၢႆႈ ၸဵင် ပီ 2120 ၼီႈၼႆႉသေ တုၵ်းယွၼ်းထိုင် ၵူႈၸိူဝ်ႉၸၢတ်ႈၸၢဝ်းတႆးၸမ်ၵႆတင်းသဵင်ႈ ၶႅၼ်းတေႃႈဢွၼ်ၵၼ် ၾၢင်ႉၼပ်ႉပႆယၢင်ႈ ၽိုၵ်းၵမ်ဝူၼ်ႉသၢၼ် တႅပ်းတတ်း ႁဵတ်းၸွမ်း လၢႆး ၸိုဝ်ႈၸႂ်ႈတၢင်းၸိုဝ်ႈၸႂ်ႈသေ ႁူမ်ႈမုင်ႈၼႃႈၸူး လွင်ႈလွတ်ႈလႅဝ်းထၢင်ႇႁၢင်ႈၸိုဝ်ႈၸႂ်ႈ၊ မိူင်းႁူမ်ႈတုမ် ၽဵင်ႇပဵင်းၸိုဝ်ႈၸႂ်ႈ၊ ၵၢၼ်ပူၵ်းပွင်တွမ်းၶိူဝ်း တူၵ်းထုၵ်ႇၸိုဝ်ႈၸႂ်ႈၼၼ်ႉသေၵမ်း ” ဝႃႈၼႆဝႆႉ။

သူင်ႇသင်ႇပီၵဝ်ႇ ႁပ်ႉတွၼ်ႈပီမႂ်ႇ 2120 ၼီႈပီၼႆႉ ၼႂ်းမိူင်းတႆးလၢႆလၢႆဝဵင်း ၸတ်းႁဵတ်းပွႆးပီမႂ်ႇတႆးယႂ်ႇလူင်ၵိုၼ်းၶွၼ်ႈ။