ၸဝ်ႈၸူႇရႃႇမၼိ မင်းရၢႆး ဢၼ်တၢင်းၼမ်ႁူႉၸၵ်းဝႃႈ ၸဝ်ႈၼုမ်ႇမင်းရၢႆး ဢႃယုၸဝ်ႈ 79 ပီ ၽူႈဢွၼ်ႁူဝ်ၸုမ်း “တပ်ႉသိုၵ်းႁူမ်ႈပွင်း” SUA လႄႈ ပဵၼ်သၢႆသိုပ်ႇၸိူဝ်ႉငိူၼ်ႈၶိူဝ်း ၸဝ်ႈၾႃႉၵဵင်းတုင် ၸၢမ်ႇပူႈၼွၼ်းၽေး မိူဝ်ႈဝၼ်းတီႈ 1 လိူၼ်ၼူဝ်ႊဝႅမ်ႊပိူဝ်ႊ ပီ 2025 တီႈႁူင်းယႃ ဝဵင်းၵဵင်းႁၢႆး ၸိုင်ႈထႆး သေ လုၵ်ႈလၢင်းၵူၼ်းႁိူၼ်းၸဝ်ႈ လႆႈၸတ်းပၢင်ၸႃပၼ လုမ်းလႃးၶၢပ်ႈတူဝ်ၵႂႃႇၼႂ်းဝၼ်းမိူဝ်ႈၼႆႉ ဝၼ်းတီႈ 6/11/2025 ။

ၸဝ်ႈၼုမ်ႇမင်းရၢႆးၼႆႉ ပဵၼ်ၵူၼ်းၸႃႇတိ ဝဵင်းလွၵ်ႉၸွၵ်ႇ ၵိူတ်ႇမိူဝ်ႈပီ 1946 ပဵၼ်လုၵ်ႈၸၢႆး ၸဝ်ႈၵႅဝ်ႈမိူင်း လႄႈ ၸဝ်ႈၼၢင်းၸိင်ႇမျႃႉ။

မီးပီႈၼွင်ႉႁူမ်ႈတွင်ႉၵၼ်တင်းသဵင်ႈ 5 ၵေႃႉ။

1- ၸဝ်ႈသီႇရိ မင်းရၢႆး (ၸဝ်ႈဢွတ်ႉ)
2- ၸဝ်ႈၸူႇရႃႇမၼိ မင်းရၢႆး (ၸဝ်ႈၼုမ်ႇ)
3-ၸဝ်ႈၽွင်းၼူၼ်း မင်းရၢႆး (ၸဝ်ႈတွင်ႇ- တိုၵ်ႉမီးဝႆႉတီႈမိူင်းဢမႄႊရိၵၼ်ႊ (USA)
4-ၸဝ်ႈၽွင်းၵႅဝ်ႈ မင်းရၢႆး (ၸဝ်ႈဢုၺ်ႉ တိုၵ်ႉမီးဝႆႉတီႈမိူင်းဢမႄႊရိၵၼ်ႊ (USA)
5- ၸဝ်ႈၸၢႆးၼွႆႉ မင်းရၢႆး (ၸဝ်ႈၼွႆႉ- သဵင်ႈၼႂ်းပီ 2022 တီႈဝဵင်းၵဵင်းမႂ်ႇ)

ၶဝ်ၸဝ်ႈၼႆႉ ပဵၼ်လၢၼ်ၸၢႆး ၸဝ်ႈၵွၼ်းၵႅဝ်ႈ ဢိၼ်းထလႅင် ၸဝ်ႈၾႃႉၵဵင်းတုင် ။

ၸဝ်ႈၼုမ်ႇတႄႇၼႃႈႁိူၼ်းၸွမ်း ၼၢင်းၸၼ်ႁွမ်၊ ဝၢႆးမႃးပဵၼ်ႁေႃပဵၼ်ႁိူၼ်းၸွမ်းၵၼ်တင်း ၼၢင်းၼွႆႉ။

မိူဝ်ႈပီ 1973 ၸဝ်ႈၼုမ်ႇမင်းရၢႆး လႆႈၶဝ်ႈႁူမ်ႈၵၢၼ်လုၵ်ႈၽိုၼ်ႉ ၼႂ်းတပ်ႉသိုၵ်းတႆးႁူမ်ႈပွင်း SUA ႁပ်ႉၸၼ်ႉပဵၼ် ၶုၼ်ႁၢၼ်၊ ပီ 1974 ပဵၼ်ၸၼ်ႉၶုၼ်သိုၵ်း ၼႂ်းတပ်ႉၸဝ်ႈၾႃႉလင်၊ ပီ 1976 ႁပ်ႉပဵၼ်ၸၼ်ႉၶုၼ်သိုၵ်းလူင် ႁဵတ်းၽူႈၵွၼ်းႁွင်ႈၵၢၼ်ႁူင်းၸၢၵ်ႈ၊ ပီ 1978 ပဵၼ်ၽူႈၵွၼ်းႁွင်ႈၵၢၼ်ႁူင်းၸၢၵ်ႈ လႄႈ ႁူင်းၽိမ်း၊ ပီ 1984 ပဵၼ်ၽူႈဢွၼ်ႁူဝ်ၸုမ်း တပ်ႉသိုၵ်းတႆးႁူမ်ႈပွင်း SUA သေ လႆႈၵႂႃႇတိတ်းတေႃႇၵၼ်တင်း ၸုမ်းယၢင်းလႅင် KNPP၊ ပီ 1985 မိူဝ်ႈပၢၼ် TRC/TRA ႁပ်ႉပုၼ်ႈၽွၼ်းပဵၼ် ၽူႈၵွၼ်းႁူင်းၸၢၵ်ႈ တီႈပဵင်းလူင်၊ ပီ 1988 ပၢၼ်တပ်ႉသိုၵ်းမိူင်းတႆး MTA ႁပ်ႉပုၼ်ႈၽွၼ်းပဵၼ် ၽူႈၵွၼ်းႁူင်းၸၢၵ်ႈတီႈႁူဝ်မိူင်း၊ ဝၢႆးလင် တပ်ႉသိုၵ်း မိူင်းတႆး MTA ဝၢင်းၶိူင်ႈၵွင်ႈၵၢင်ႇပၼ် တပ်ႉသိုၵ်းမၢၼ်ႈၼၼ်ႉ ၸဝ်ႈၼုမ်ႇမင်းရၢႆး ဢမ်ႇယွမ်းဝၢင်းၶိူင်ႈၸွမ်းသေ ဢွၵ်ႇၵႂႃႇယူႇသဝ်း တၢင်းမိူင်းလၢဝ်း။ ပီ 1998 ၸင်ႇလႆႈၶၢႆႉၶဝ်ႈမႃးယူႇ ၼႂ်းမိူင်းထႆး ႁၢၼ်ႉတေႃႇထိုင်ပေႃးၸၢမ်ႇပူႈၼွၼ်းၽေးၵႂႃႇ ယွၼ်ႉတၢင်းပဵၼ် ၵူၼ်းထဝ်ႈၵူၼ်းၵႄႇ ။