ၽူႈလဵၼ်ႈမၢၵ်ႇၼင်ၸိုဝ်ႈလိုဝ်းလင် ၼႂ်းၸုမ်းဢိၼ်ႊၵလႅၼ်ႊၵေႃႉၵဝ်ႇ တေႊဝိတ်ႊ ပႅၵ်ႊၶမ်ႊ (David Beckham) လႆႈႁပ်ႉၸုမ်ႈၶူး သႃႊ (Sir) ဝႃႈၼႆ။ သူးၼႆႉ ၶုၼ်ႁေႃၶမ်းမိူင်းပရိတ်ႊထဵင်ႊ ယုၵ်ႉယွင်ႈတွၼ်ႈပၼ်မၼ်းၸၢႆး ၼႂ်းဝၼ်းတီႈ 4 လိူၼ်ၼူဝ်ႊဝႅမ်ႊပိူဝ်ႊ ဝၼ်းဢၢင်းၵၢၼ်း တီႈႁေႃ ပႃႊၵိၼ်ႊႁႅမ်ႊ မိူင်းပရိတ်ႊထဵင်ႊ။
တီႈပၢင်ႁပ်ႉသူးၼၼ်ႉ တေႊဝိတ်ႊ ပႅၵ်ႊၶမ်ႊ လႄႈ မေးၼၢင်းမၼ်း ဢိၵ်ႇပႃး ပေႃႈမႄႈသွင်ၸဝ်ႈၵေႃႈ ၶဝ်ႈႁူမ်ႈၸွမ်း။
တေႊဝိတ်ႊ ပႅၵ်ႊၶမ်ႊ (David Beckham) ၼႆႉ ပဵၼ်ၵူၼ်းမိူင်း ဢိၼ်ႊၵလႅၼ်ႊသေ လႆႈၶဝ်ႈပႃးပိတ်ႉၶႅင်ႇ တီႈပၢင်ႁိမ်သူးလုမ်ႈၾႃႉ လႄႈ သူးၶျႅၼ်ႊပီႊယႅၼ်ႊသျိတ်ႉ ယူႊရူပ်ႊ။ တီႈၶလပ်ႉမၢၵ်ႇၼင် မိူၼ်ၼင်ႇၸုမ်းၸိုဝ်ႈသဵင်ယႂ်ႇ Manchester United တင်း Real Madrid ၸိူဝ်းၼႆႉၵေႃႈ လႆႈၶဝ်ႈပႃးပိတ်ႉၶႅင်ႇၸွမ်း။
မၼ်းၸၢႆး တႄႇၶဝ်ႈၼႂ်းတူင်ႇဝူင်း ပိတ်ႉၶႅင်ႇမၢၵ်ႇၼင် ၸဵမ်မိူဝ်ႈပီ 1992 တီႈႁူင်းႁဵၼ်းၾၢႆႇလဵၼ်ႈႁႅင်း မၼ်ႊၶျႅတ်ႊသတႃႊ ယူႊၼၢႆႊတႅတ်ႊ (Manchester United)။ ဝၢႆးၼၼ်ႉ လႆႈႁူမ်ႈၸွမ်းၸုမ်းယႂ်ႇသေ ပိတ်ႉၶႅင်ႇမၢၵ်ႇၼင်မႃး ၶၢဝ်းတၢင်း 11 ပီ။ ထိုင်မႃးပီ 2003 လုၵ်ႉတီႈမိူင်းဢိၼ်ႊၵလႅၼ်ႊ ၶၢႆႉၵႂႃႇတီႈၸုမ်း ရီႊရႄႊမႅတ်ႉတရိတ်ႊ (Real Madrid) ဢၼ်ပဵၼ်ၶလပ်ႉမၢၵ်ႇၼင် မိူင်းသပဵၼ်ႊ။
ၵွၼ်ႇမၼ်းၸၢႆး ပႆႇလိုဝ်ႈ လွင်ႈပိတ်ႉၶႅင်ႇမၢၵ်ႇၼင်ၼၼ်ႉ လႆႈၵႂႃႇႁူမ်ႈၸွမ်းထႅင်ႈ ၸုမ်း ဢေႊသီႊမီႊလႅၼ်ႊ AC Milan လႄႈ LA Galaxy ၸိူဝ်းၼႆႉထႅင်ႈလူးၵွၼ်ႇ။ ပီ 2013 တေႊဝိတ်ႊ ပႅၵ်ႊၶမ်ႊ (David Beckham) ပိုၼ်ၽၢဝ်ႇၵိုတ်းလိုဝ်ႈ လွင်ႈပိတ်ႉၶႅင်ႇမၢၵ်ႇၼင်။
ၼႂ်းပီ 2004 တေႃႇထိုင် 2015 လႆႈႁူမ်ႈႁဵတ်းၵၢၼ်ၸွမ်း ၸုမ်းၾၢႆႇၵမ်ႉၸွႆႈတူၺ်းထိုင် ၵူၼ်းၼင်ႇၵၼ် Unicef သေ ပီ 2024 ပဵၼ်မႃးၽူႈတႅၼ်း ၸုမ်းၾွင်ႊတေႊသျိၼ်ႊ ၶွင်ၶုၼ်ႁေႃၶမ်း မိူင်းပရိတ်ႊထဵမ်ႊ။ လႆႈၵမ်ႉၸွႆႈပၼ်ပႃး ၽႅၼ်ၵၢၼ်ပၢႆးပၺ်ႇၺႃႇ ၶုၼ်ႁေႃၶမ်းလႄႈ ၾၢႆႇၶတ်းၸႂ် ႁႂ်ႈပွင်ႇၸႂ်ၼိူဝ်သၽႃႇဝၵူၼ်းၼုမ်ႇ ၸဵမ်ၸိူဝ်းၼႆႉ။
တေႊဝိတ်ႊ ပႅၵ်ႊၶႅမ်ႊ (David Beckham) ၼႆႉ မိူဝ်ႈပီ 2003 ပူၼ်ႉမႃးၼၼ်ႉၵေႃႈ ယၢမ်ႈလႆႈၸုမ်ႈၶူး OBE တီႈၼၢင်းႁေႃၶမ်းလူင် ဢႄႊလီႊသပၢတ်ႊ မိူင်းပရိတ်ႊထဵမ်ႊ။
ယၢမ်းလဵဝ် David Beckham ပဵၼ်ၽူႈႁူမ်ႈၽၢၵ်ႈၸဝ်ႈၶွင် ၸုမ်းမၢၵ်ႇၼင် Inter Miami ဢၼ်ၽူႈလဵၼ်ႈမၢၵ်ႇၼင်ၸိုဝ်ႈလိုဝ်းလင် Leo Messi ၶဝ်ႈပႃးပိတ်ႉၶႅင်ႇဝႆႉ။ လိူဝ်ၼၼ်ႉ ပဵၼ်ပႃးထႅင်ႈ ၽူႈႁူမ်ႈၽၢၵ်ႈၸဝ်ႈၶွင် ၸုမ်းမၢၵ်ႇၼင် Salford City ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ