ဝၼ်းတီႈ 29/10/2025 ယၢမ်းၵၢင်ၼႂ် ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ ဢွၵ်ႇၶၢဝ်းတၢင်းႁွတ်ႈထိုင် တီႈမိူင်း ၶူဝ်ႊရီႊယိူဝ်ႊၸၢၼ်း တႃႇၶဝ်ႈႁူမ်ႈၸွမ်း ပၢင်ၵုမ်ၸၼ်ႉသုင် ၸုမ်းႁူမ်ႈသၢင်ႈၵၢၼ်ပၢႆးမၢၵ်ႈမီး ဢေႊသျႃႊ – ပၸိၾိၵ်ႉ (APEC) ။
ပၢင်ၵုမ်ၼႆႉ တႄႇၸတ်းႁဵတ်း ဝၼ်းတီႈ 29/10/2025 တေႃႇထိုင် ဝၼ်းတီႈ 1/11/2025 တီႈဝဵင်း ၵျွင်ႊၵျူႊ(Gyeongju)၊ မိူင်းၶူဝ်ႊရီႊယိူဝ်ႊၸၢၼ်း။
ၽွင်းမိူဝ်ႈႁွတ်ႈထိုင်ဝႆႉတီႈ မိူင်းၶူဝ်ႊရီႊယိူဝ်ႊၸၢၼ်း၊ ၼႂ်းဝၼ်းတီႈ 30/10/2025 ၼႆႉ ၸွမ်ၸိုင်ႈ ထရႅမ်ႉ ႁူပ်ႉဢုပ်ႇၵၼ်တင်း ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင် ၵဵဝ်ႇလူၺ်ႈၵၢၼ်ၵပ်းသိုပ်ႇၵႃႉၶၢႆ တင်းမိူင်းၶႄႇ။
လိူဝ်ၼၼ်ႉ ၼႂ်းဝၼ်းပၢင်ၵုမ် APEC ဝၼ်းတီႈ 29 ၼႆႉ ႁူပ်ႉၵၼ်တင်း ၸွမ်ၸိုင်ႈ မိူင်းၶူဝ်ႊရီႊယိူဝ်ႊ ၸၢၼ်း လီႇၵျေႇမျွင်ႇသေ ဢုပ်ႇၵုမ်ၵၼ် လွင်ႈလူင်းတိုၼ်းလၢင်း၊ ၵၢၼ်ၵပ်းသိုပ်ႇၵႃႉၶၢႆ၊ လွင်ႈၶွၼ်ႇ၊ လွင်ႈႁူမ်ႇလူမ်ႈလႄႈ လွင်ႈၵပ်းသိုပ်ႇၵႄႈၵၢင်ပဵၼ်မိူင်းဢူၺ်းလီၵၼ် ၸဵမ်ၸိူဝ်းၼႆႉ – သိုဝ်ႇၶၢဝ်ႇမိူင်းၶူဝ်ႊရီႊယိူဝ်ႊၸၢၼ်း ႁၢႆးငၢၼ်းဝႆႉၼင်ႇၼႆ။
ၼႂ်းၶၢဝ်းယၢမ်း ၸွမ်ၸိုင်ႈထရႅမ်ႉ ထိုင်မိူင်း ၶူဝ်ႊရီႊယိူဝ်ႊၸၢၼ်းၼၼ်ႉ တပ်ႉသိုၵ်း မိူင်းၶူဝ်ႊရီႊယိူဝ်ႊႁွင်ႇ ၸၢမ်းယိုဝ်းၶိူင်ႈၵွင်ႈလူင် ဢၼ်သႂ်ႇပႃးလႆႈ ၶိူင်ႈၼိဝ်ႊၵလီႊယိူဝ်ႊ ဝႃႈၼႆ။
ၵၢၼ်ဢွၵ်ႇၶၢဝ်းတၢင်း ၸွမ်ၸိုင်ႈမိူင်းဢမေႊရိၵၼ်ႊ မႃးၼႂ်းၵုၼ်ၶဵဝ်ဢေးသျႃးပွၵ်ႈၼႆႉ ၵႂႃႇထိုင်တီႈမိူင်းမလေးသျႃး လႄႈ ၵျပၼ်ႊသေ မိူင်းၵူဝ်ႊရီႊယိူဝ်ႊၸၢၼ်းၼႆႉ ပဵၼ်ၶၢဝ်းတၢင်းၵမ်းလိုၼ်းသုတ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ