ဝၼ်းတီႈ 05/04/2025 ၼႆႉ ၵူၼ်းမိူင်းဢမေႊရိၵၼ်ႊ ၸတ်းႁဵတ်းပၢင်ၼႄၵၢင်ၸႂ် “Hand Off” ၼႂ်း 50 ၸႄႈတွၼ်ႈ တူဝ်ႈမိူင်းဢမေႊရိၵၼ်ႊပတ်းပိုၼ်ႉ မီးၵူၼ်းၶဝ်ႈႁူမ်ႈၼႄၵၢင်ၸႂ် 1,400 ပၢႆ။

ပၢင်ၼႄၵၢင်ၸႂ်ၼႆႉ ပဵၼ်ဢၼ်ယႂ်ႇလိူဝ်ပိူၼ်ႈ ဝၢႆးလင် ၻူဝ်ႊၼေႃႊ ထရမ်ႉ ႁပ်ႉတၼ်းႁဵင်း ပဵၼ်ၸွမ်ၸိုင်ႈ ၼႂ်းလိူၼ်ၵျႅၼ်ႊၼိဝ်ႊရီႊ ႁူဝ်ပီ 2025 မႃးၼႆႉ။

ၵူၼ်းမိူင်း ဢွၼ်ၵၼ်သၢၼ်ၶတ်း လွင်ႈႁဵတ်းသၢင်ႈ/ ပေႃႇလသီႇ ဢၼ်ၸုမ်းလူင်ပွင်ၸိုင်ႈ ၻူဝ်ႊၼေႃႊ ထရမ်ႉ ဢွၼ်ႁူဝ်။ ယွၼ်ႉဢဝ်ပိူင် (ဝႃႇတ) ၽူႈမၢၵ်ႈမီးပဵၼ်ယႂ်ႇသေ ပူၼ်ႉပႅၼ် မူႇဝႃႇတ တူၺ်းလူလွမ်ၸုမ်းတူင်ႇဝူင်းၵူၼ်း၊ သုၼ်ႇလႆႈသုၼ်ႇပဵၼ်ၵူၼ်းလႄႈ ပိူင်တီႇမူဝ်ႇၶရေႇၸီႇ (ဒီမိုကရေစီ အခြေခံစံနှုန်းများ) ၸိူဝ်းၼႆႉ။  

ၻူဝ်ႊၼေႃႊ ထရမ်ႉ ၶိုၼ်ႈမႃးပဵၼ် ၸွမ်ၸိုင်ႈမိူင်းဢမေႊရိၵၼ်ႊ ၵမ်းထူၼ်ႈ 2 ၼႆႉ ပဵၼ်ၵေႃႉယိပ်းၵမ် ဢႃႇၼႃႇႁၢဝ်ႈႁႅင်းလိူဝ်ပိူၼ်ႈ ၼႂ်းပိုၼ်းပၢၼ်မႂ်ႇ မိူင်းဢမေႊရိၵၼ်ႊ။ ထရမ်ႉ ႁူမ်ႈၵၼ် တင်းၽူႈမၢၵ်ႈမီး ဢီႊလုၼ်ႊမၢၵ်ႉသ်သေ မွတ်ႇယႃႉပႅတ်ႈ ၸုမ်းၾၢႆႇႁူမ်ႇလူမ်ႈ ၊ ၾၢႆႇၸွႆႈထႅမ် ၊ ၾၢႆးယႃႈယႃလႄႈ ၸုမ်း (ဢေႇၵျႅၼ်ႇၸီႇ) လူင်ပွင်ၸိုင်ႈၸိူဝ်းၼႆႉ တင်းၼမ်။

လိူဝ်ၼၼ်ႉ ပူတ်းဢွၵ်ႇပႅတ်ႈ ၽူႈႁၢပ်ႇၵၢၼ် လူင်ပွင်ၸိုင်ႈ၊ ၵိုတ်းလိုဝ်ႈ လွင်ႈၵၢၼ်ၸွႆႈထႅမ်ၵူၼ်းၼင်ႇၵၼ် ၵူႈမိူင်းမိူင်း၊ တိူဝ်းၵဵပ်းၶွၼ်ႇၼိူဝ်ၶူဝ်းၵုၼ်ႇ ၵူႈမိူင်းမိူင်း ၸိူဝ်းၼႆႉ။

ပၢင်ၼႄၵၢင်ၸႂ်ၼႆႉ လိူဝ်သေ ၸတ်းႁဵတ်းၼႂ်းမိူင်းဢမေႊရိၵၼ်ႊယဝ်ႉ ဝဵင်းယႂ်ႇဝဵင်းလူင် ၼႂ်းၸိုင်ႈမိူင်း ယူႊရူပ်ႊ မိူၼ်ၼင်ႇ – လၼ်ႊတၼ်ႊလႄႈ ပႄးရိတ်ႉ ၸိူဝ်းၼႆႉၵေႃႈ ၸတ်းႁဵတ်း။ လွင်ႈၼႆႉ ပဵၼ်ၵၢၼ်ၶဵင်ႇ တႃႉယႂ်ႇလူင် တႃႇၻူဝ်ႊၼေႃႊ ထရမ်ႉ တေသိုပ်ႇႁပ်ႉတၼ်းႁဵင်းပဵၼ် ၸွမ်ၸိုင်ႈၵႂႃႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။