ဝၼ်းတီႈ 4/10/2025 ယၢမ်းႁူဝ်ၶမ်ႈ သၢင်ႇသီႈတူဝ်ၼိုင်ႈၸိူၵ်ႈမတ်ႉမၼ်းလုတ်ႈသေ ဢွၵ်ႇႁိူၼ်းမႃးၶူပ်းလုၵ်ႈဢွၼ်ႇၸၢႆးၵၢင်ၵိဝ်ႇ ဝၢၼ်ႈမူႇ 8 ဢိူင်ႇၼွင်ၵုမ်ႉ ၸႄႈဝဵင်းပေႃႇၽလွႆး ၸႄႈတွၼ်ႈ ၵၢၼ်ႊၵျၼပူႊရီႊ ၸိုင်ႈထႆး။
သၢင်ႇသီႈၼၼ်ႉပဵၼ်သၢင်ႇသီႈတူဝ်မႄႈ၊ ၸိုဝ်ႈႁွင်ႉ “မႁေႇသီႇ” ဢႃယုလႆႈမွၵ်ႈ 1 ၶူပ်ႇ၊ ၵူၼ်းဝၢၼ်ႈလဵင်ႉမၼ်းဝႆႉၵိုၵ်းႁိူၼ်း ၼႂ်းဝၢၼ်ႈ။
ဝၼ်းတီႈ 4/10/2025 ၼၼ်ႉယၢမ်းႁူဝ်ၶမ်ႈ ၸဝ်ႈၶွင်သၢင်ႇသီႈၼၼ်ႉ ဢဝ်သၢင်ႇသီႈဢွၵ်ႇၶွၵ်ႈမႃးမတ်ႉဝႆႉၵၢင်ဝၢင်းသေ မႄးၶွၵ်ႈသၢင်ႇသီႈပႆႇတၼ်းယဝ်ႉ၊ လုၵ်ႈဢွၼ်ႇၼႂ်းဝၢၼ်ႈသမ်ႉလႅၼ်ႈလဵၼ်ႈၼႂ်းၵိဝ်ႇၼႃႈႁိူၼ်းၶဝ်။ သၢင်ႇသီႈဝႅၼ်ပုင်ႈထိုင်တီႈၸိူၵ်ႈၶၢတ်ႇသေ လမ်းၶူပ်းလုၵ်ႈဢွၼ်ႇၸၢႆးဢွၼ်ႇ ဢႃယု 11 ၶူပ်ႇမၢတ်ႇၸဵပ်းၵေႃႉၼိုင်ႈ။ ၺႃးသၢင်ႇသီႈၶူပ်းတီႈၵုမ်ႇၵူၼ်ႈ။
ၽွင်းလုၵ်ႈဢွၼ်ႇႁွင်ႉႁႆႈ- ၵူၼ်းႁိမ်းႁိူၼ်းဢွၵ်ႇမႃးလိုပ်ႈသၢင်ႇသီႈ။ သၢင်ႇသီႈၶူပ်းယၢႆးၺႃးသႂ်ႇၵူၼ်းဝၢၼ်ႈၽူႈၸၢႆးထႅင်ႈ 2 ၵေႃႉ။ ဝၢႆးၼၼ်ႉသၢင်ႇသီႈၶိုၼ်းလႅၼ်ႈၶဝ်ႈဝၢင်းႁိူၼ်းသေၵႂႃႇယူႇၼႂ်းသူၼ်လင်ႁိူၼ်းၸဝ်ႈၶွင်မၼ်း။ ၸဝ်ႈၶွင်မၼ်းၶိုၼ်းတီႉၺွပ်းၵုမ်းၶင်ဝႆႉၶိုၼ်းၼႂ်းၶွၵ်ႈ။
လုၵ်ႈဢွၼ်ႇၸၢႆးဢၼ်မၢတ်ႇၸဵပ်းၺႃးသၢင်ႇသီႈၶူပ်းၵူၼ်ႈလႄႈၵူၼ်းဝၢၼ်ႈ 2 ၵေႃႉၼၼ်ႉတႄႉ လႆႈဢဝ်သူင်ႇႁူင်းယႃ။ လုၵ်ႈဢွၼ်ႇၸၢႆးလႆႈယဵပ်ႈတီႈၵုမ်ႇၵူၼ်ႈ 4 ၶဵမ်။
ၸဝ်ႈၶွင်သၢင်ႇသီႈၼၼ်ႉပဵၼ် ၸၢႆးပရိၼ်ႊယႃႊ ၽၢၵ်ႉၽုမ်ႊ ဢႃယု 32 ပီ။ ပဵၼ်ဢိၼ်ႊၾလူႊဝႅၼ်ႊသိူဝ်ႊ ၵူၼ်းလဵၼ်ႈထိၵ်ႊထွၵ်ႊ – ၾဵတ်ႉသ်ပုၵ်ႉယူႊထုပ်ႉ ၸိုဝ်ႈလင်။ ၵႆႉဢဝ်လွင်ႈသၢင်ႇသီႈမၼ်းမႃးဢွၵ်ႇၸွမ်းယူႇ။
ဝၢႆးလင်သၢင်ႇသီႈမၼ်းၸၢႆးဢွၵ်ႇၵႂႃႇၶူပ်းၵူၼ်းဝၢၼ်ႈယဝ်ႉမၼ်းၸၢႆးလႆႈၵႂႃႇယွၼ်းၼွမ်းထိုင်ၵူၼ်းဝၢၼ်ႈသေ ယွမ်းႁပ်ႉဝႃႈတေၸွႆႈထႅမ်ၶိုၼ်းၵႃႈယူတ်းယႃတင်းမူတ်း။ လိူဝ်ၼၼ်ႉတေယွမ်းႁပ်ႉၸွမ်းၼင်ႇပၵ်းပိူင်ဝၢၼ်ႈမိူင်းတႅပ်းတတ်း ဝႃႈၼႆ။
လူင်ပွင်ၸိုင်ႈထႆးၼႆႉ ပၼ်ဢၼုယၢတ်ႈ လဵင်ႉသတ်းႁၢႆႉ/လိူင်း ၼႂ်းႁိူၼ်းၸဝ်ႈၵဝ်ႇယူႇသေတႃႉ သင်ဝႃႈသတ်းၼၼ်ႉလွတ်ႈဢွၵ်ႇၶွၵ်ႈမႃးၸိုင် ၸဝ်ႈၶွင်တၵ်းလႆႈႁပ်ႉတူတ်ႈတၢမ်ႇငိုၼ်း 5 မိုၼ်ႇဝၢတ်ႇ ဢမ်ႇၼၼ် တူတ်ႈတၢမ်ႇၶွၵ်ႈထိုင် 6 လိူၼ် ဢမ်ႇၼၼ်တူတ်ႈတၢမ်ႇတင်း 2 ယၢင်ႇ။
လိုၼ်းသုတ်းလႆႈယိၼ်းဝႃႈ ၸဝ်ႈၼႃႈတီႈတႅပ်းတတ်းယိုတ်းဢဝ်သၢင်ႇသီႈမႄႈ – မႁေႇသီႇ ၼၼ်ႉသေ တေဢဝ်ၵႂႃႇဝႆႉၼႂ်းသူၼ်သတ်း တီႈၸႄႈတွၼ်ႈ သူႇၽၼ်းပူႊရီႊ ယဝ်ႉၼႆ ၽိုၼ်ၶၢဝ်ႇ ပၢင်ႊၵွၵ်ႇၽူတ်ႉသ်တႅမ်ႈတၢင်ႇႁၢႆးငၢၼ်းဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ