ဝၼ်းတီႈ 4 လိူၼ်ဢေႊပရိူဝ်ႊ သိုၵ်းထႆးပလိၵ်ႈထႆး ၸဝ်ႈၼႃႈတီႈ ၽူႈၵွၼ်ႊၸႄႈဝဵင်း ပွၵ်ႉယွမ်ႇ ၶဝ်ႈၵူတ်ႇထတ်းတီႉၺွပ်းလႆႈၵူၼ်းမိူင်းႁူမ်ႈတုမ် 123 ၵေႃႉ ဢၼ်ၶဝ်ႈလိုဝ်ႈသဝ်း မႅပ်းဝႆႉ ၼႂ်းႁိူၼ်းလင်ၼိုင်ႈ တီႈပွၵ်ႉၼွင်ပူဝ်ႊ ဝဵင်း ၵၢၼ်ႊၶျၼပူႊရီႊ။
ပဵၼ်ၵူၼ်းၸၢႆး 94 ၵေႃႉလႄႈ ၵူၼ်းယိင်း 29 ၵေႃႉ ။ ၸိူဝ်းၶဝ်လၢတ်ႈဝႃႈ ဢိင်ၼိူဝ်ၶၢဝ်း တၢင်း ဢၼ်တေၵႂႃႇၼၼ်ႉသေ လႆႈပၼ်ၼၢႆးၼႃႈ (ၵူၼ်းႁပ်ႉၸၢင်ႈ) ႁဵတ်းၵိၼ်ၵၢင် ၼိုင်ႈ ၵေႃႉ 15,000 တေႃႇထိုင် 30,000 ဝၢတ်ႇ၊ ၸိူဝ်းၶဝ်ပႆလတ်း လႅၼ်လိၼ်ၶဝ်ႈမိူင်းထႆးသေ မႃးၶီႇ ၵႃး ဢၼ်မႃးႁပ်ႉတၢင်းၾင်ႇ ဝဵင်းၵၼ်ႊၶျၼပူႊရီႊ။ ဝၢႆးၼၼ်ႉဢဝ်ၶဝ်ၵႂႃႇၶီႇႁိူဝ်း ၶၢမ်ႈၼႂ်း ၾၢႆႇဢၼ်ၼိုင်ႈ၊ ၶိုၼ်းမႃးၶိုၼ်ႈၵႃးၶိုၼ်း ထႅင်ႈၵမ်းၼိုင်ႈသေ ၸင်ႇလႆႈမႃးယူႇပႂ်ႉဝႆႉ တီႈ ႁိူၼ်းႁၢမ်းလင်ၼႆႉ ဝႃႈ ၼႆ။
တီႈႁိူၼ်းႁၢမ်း ဢၼ်ၸုမ်းၵူၼ်းမိူင်းမၢၼ်ႈ ၺႃးတီႉၼၼ်ႉ ၸဝ်ႈၼႃႈတီႈႁၼ်ပႃးၵႃး ဢီႊၸူႊသူႊ 4 လမ်း။ ၵူၼ်းႁေႃႈရူတ်ႉတႄႉဢမ်ႇႁၼ် လႅပ်ႈတေပၢႆႈပႅတ်ႈယဝ်ႉ ၶၢဝ်ႇထႆး ပိုၼ်ႉတီႈ တႅမ်ႈတၢင်ႇဝႆႉၼင်ႇၼႆ။
ယၢမ်းလဵဝ် ၵူၼ်းမိူင်းမၢၼ်ႈဢၼ်ၺႃးတီႉဝႆႉ 123 ၵေႃႉၼၼ်ႉ ထုၵ်ႇသူင်ႇတူဝ်ၵုမ်းၶင်ဝႆႉ တီႈႁူင်းပလိၵ်ႈၵၼ်ႊၶျၼပူႊရီႊသေ တေထတ်းထွင်ပၼ်တူတ်ႈတၢမ်ႇယဝ်ႉ တေသူင်ႇ ပွၵ်ႈၶိုၼ်းမိူင်း ဝႃႈၼႆ။
ဢၢင်ႈဢိင် – DVB
