ၼႂ်းပီ 2025 တႄႇလိူၼ် ၵျႅၼ်ႊၼိဝ်ႊရီႊ ထူၼ်ႈၼိုင်ႈ တေႃႇထိုင် လိူၼ်သႅပ်ႊထႅမ်ႊပိူဝ်ႊ ထူၼ်ႈၵဝ်ႈ ၶၢဝ်းတၢင်း 9 လိူၼ်ၼႆႉ ယွၼ်ႉသိုၵ်းမၢၼ်ႈယိုတ်းမိူင်း ယိုဝ်းတိုၵ်းႁဵတ်းႁၢႆႉသေ ၵူၼ်းမိူင်းၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉ လူႉတၢႆၵႂႃႇ 890 ၵေႃႉ ဝႃႈၼႆ။
သဵၼ်ႈမၢႆၸိူဝ်းၼႆႉ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း AAPP ၵဵပ်းၶေႃႈမုၼ်းႁၢႆးငၢၼ်းဢွၵ်ႇဝႆႉ ၼႂ်းဝၼ်းတီႈ 1/10/2025 ၼႆႉ။
ၼႂ်းမိူင်းယၢင်းလႅင်ၼၼ်ႉ ၶၢဝ်းတၢင်း 9လိူၼ် သိုၵ်းမၢၼ်ႈၸႂ်ႉႁိူဝ်းမိၼ် ပွႆႇမၢၵ်ႇယိုဝ်းတိုၵ်း 328 ၵမ်း ၵူၼ်းမိူင်းလူႉတၢႆ 110ၵေႃႉၼႆ ၸုမ်းႁႅင်းၵူၼ်းမိူင်းယၢင်းလႅင် PKPF ၵေႃႈ ၵဵပ်းၶေႃႈမုၼ်းႁၢႆးငၢၼ်းဝႆႉ။
မိူၼ်ၼႆ ၶၢဝ်းတၢင်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး 4 ပီပၢႆၼႆႉ ၵူၼ်းႁဵတ်းၵၢၼ်မိူင်း ဢိၵ်ႇပႃးၵူၼ်းမိူင်း ၺႃးၸုမ်းသိုၵ်းမၢၼ်ႈႁဵတ်းႁၢႆႉၶႃႈတၢႆ 7300 ပၢႆ၊ ၺႃးတီႉၺွပ်းဝႆႉ 2မိုၼ်ႇပၢႆ၊ ၼႂ်းၼၼ်ႉ 11000 ပၢႆ ၺႃးပူင်တၢမ်ႇၶွၵ်ႈဝႆႉၼႆ AAPP ႁၢႆးငၢၼ်းဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ