ပၢင်ယုၵ်ႉယွင်ႈတွၼ်ႈသူး ၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ ဢၼ်ၸုမ်းမၢၵ်ႇၼင်လုမ်ႈၾႃႉယိုၼ်ႈတွၼ်ႈပၼ်မႃးၵူႈပီပီၼၼ်ႉ တႃႇပီၼႆႉ ၸတ်းႁဵတ်းၵႂႃႇ ၼႂ်းဝၼ်းတီႈ 22/09/2025 ဝၼ်းၸၼ်ၵၢင်ၶမ်ႈ တီႈ Theatre du Chatelet ဝဵင်းပႄႊရီႊ မိူင်းၾရင်ႇသဵတ်ႈ (France) ။
Ousmane Dembele ၽူႈလဵၼ်ႈမၢၵ်ႇၼင် ၸုမ်း PSG – Paris Saint – Germain (ၵူၼ်းၸၢႆး) လႄႈ Aitana Bonmati ၽူႈလဵၼ်ႈမၢၵ်ႇၼင် ၸုမ်း Barcelona (ၼၢင်းယိင်း) လႆႈသူး Ballon d’Or တႃႇပီ 2025 ။
Dembele ဢႃယု 28 ပီ ပဵၼ်ၵူၼ်းမိူင်းၾရင်ႇသဵတ်ႈ ၊ ပဵၼ်ၽူႈလဵၼ်ႈမၢၵ်ႇၼင် ၼႂ်းၸုမ်း PSG သေပိတ်ႉၶဝ်ႈလႆႈ 35 ၵူဝ်း၊ ၼႂ်းၶၢဝ်းလဵၼ်ႈမၢၵ်ႇၼင်ၼိုင်ႈပီၼႆႉ ၸုမ်းမၢၵ်ႇၼင် PSG ဢဝ်လႆႈ UEFA Champions League၊ Ligue လႄႈ Coupe de France ၸိူဝ်းၼႆႉ။
ၵွၼ်ႇပႆႇထိုင် ပၢင်ယိုၼ်ႈမွပ်ႈတွၼ်ႈသူး Ballon d’Or ၼႆႉ မီးၶၢဝ်ႇလိုဝ်းဢွၵ်ႇဝႆႉဝႃႈ Lamine Yamal ၼႂ်းၸုမ်းမၢၵ်ႇၼင် Barcelona တေလႆႈသူး ဝႃႈၼႆသေတႃႉ ၼႂ်းပၢင်တွၼ်ႈသူးၼႆႉ မၼ်းၸၢႆး လႆႈၵႂႃႇသူး ၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ သႅၼ်းၵူၼ်းၼုမ်ႇ (Kopa Trophy)ၵူၺ်း။
ၼႂ်းပိုၼ်း ၽူႈယၢမ်ႈလႆႈသူး Ballon d’Or ၼႆႉ Ronaldo တင်း Messi ၶႃသွင်ၵေႃႉ ယၢမ်ႈလႆႈတၢမ်းၵၼ်မႃး ႁိုင်ၶၢဝ်းတၢင်း 10 ပီ။ ၼႂ်းၶၢဝ်းတၢင်းလၢႆပီမႃးၼႆႉ ၼေႃႇတႅၼ်းၶိူဝ်း ၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ ၸင်ႇၶိုၼ်ႈမႃးလႆႈသူးဢၼ်ၼႆႉ။ မိူဝ်ႈပီၵၢႆတႄႉ ရူဝ်ႊတရီႊ Rodri ၽူႈလဵၼ်ႈမၢၵ်ႇၼင် ၸုမ်း Man City လႆႈၵႂႃႇ။
သူး Ballon d’Or Ferminin တႃႇၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ (ၼၢင်းယိင်း)ၼႆႉသမ်ႉ Aitana Bonmati ၸုမ်းမၢၵ်ႇၼင် Barcelona လႆႈၵႂႃႇထႅင်ႈ။ သူး Ballon d’Or တႃႇၽူႈလဵၼ်ႈမၢၵ်ႇၼင် ၼၢင်းယိင်းၼႆႉ တႄႇပၼ်မႃး မိူဝ်ႈပီ 2018 ၵူၺ်းသေ မၼ်းၼၢင်းလႆႈ သၢမ်ပီထပ်းၵၼ် ပဵၼ်ၵေႃႉႁႅၵ်ႈ။
Aitana Bonmati ၼႆႉ မီးဢႃယု 27 ပီ ပဵၼ်ၵူၼ်းမိူင်း သပဵင်ႇ (Spain)။
သူး Ballon d’Or တႃႇၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ ၵူၼ်းၸၢႆးၼႆႉ ၸွမ်းၼင်ႇၸုမ်းမၢၵ်ႇၼင်လုမ်ႈၾႃႉ FIFA မၵ်းမၼ်ႈ ၸၼ်ႉဝႆႉ ၼၼ်ႉသေ သိုဝ်ႇၶၢဝ်ႇ (Journalist) တီႈ 100 မိူင်း လႆႈဢွၼ်ၵၼ်လိူၵ်ႈပၼ်ၶႅပ်းၵၢင်ၸႂ်၊ တႃႇၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ ၼၢင်းယိင်းသမ်ႉ သိုဝ်ႇၶၢဝ်ႇ (Journalist) တီႈ 50 မိူင်း လႆႈလိူၵ်ႈသႂ်ႇၶႅပ်းၵၢင်ၸႂ်ပၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ