ၶွမ်ႊမသျိၼ်ႊၵမ်ၵၢၼ် ပၢင်လိူၵ်ႈတင်ႈ ပိုၼ်ၽၢဝ်ႇႁွင်ႉ ၵူၼ်းၼႂ်းမိူင်းၼွၵ်ႈမိူင်း ၵေႃႉလႂ် ၸုမ်းလႂ် သူၼ်ၸႂ်ပႂ်ႉတူၺ်းပၢင်လိူၵ်ႈတင်ႈ ၶဝ်ၵေႃႈ ႁႂ်ႈတၢင်ႇၾွမ်ႊ ယိုၼ်ႈယွၼ်းၶႂၢင်ႉဢၼုၺၢတ်ႈ လႆႈယဝ်ႉ ဝႃႈၼႆ။

ဝႂ်ယိုၼ်ႈယွၼ်း(ၾွမ်ႊ) ၼႆႉ တေလႆႈယိုၼ်ႈတၢင်ႇ တႄႇဝၼ်းတီႈ 16 လိူၼ်သႅပ်ႊထႅမ်ႊပိူဝ်ႊ တေႃႇထိုင် ဝၼ်းတီႈ 5 လိူၼ်တီႊသႅမ်ႊပိူဝ်ႊၼႆ ၶွမ်ႊမသျိၼ်ႊပၢင်လိူၵ်ႈတင်ႈ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

 “သင်ၽူႈလႂ်ၽႂ် မီးၵၢင်ၸႂ် ၶႂ်ႈလူင်းလဵပ်ႈႁဵၼ်း ပၵ်းတႃပႂ်ႉတူၺ်းၸွမ်း ပၢင်လိူၵ်ႈတင်ႈၸိုင် ႁဵတ်းၽိုၼ်လိၵ်ႈလၢႆး ယိုၼ်ႈတၢင်ႇ  လႆႈတီႈ ၵိင်ႇၽႄၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈဝဵင်း၊ ၸႄႈတွၼ်ႈ၊ ၸႄႈမိူင်း လႄႈ ၸႄႈတိူင်း ႁင်းၽႂ်မၼ်းလႆႈယဝ်ႉ”  – ဝႃႈၼႆဝႆႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ သပ်းၸႅင်ႈပိူင်းၼႄပႃးဝႆႉထႅင်ႈဝႃႈ မုၵ်ႉၸုမ်း ဢမ်ႇၼၼ် ၵူၼ်းၵေႃႉဢၼ်တေၵႂႃႇလူင်းလဵပ်ႈႁဵၼ်းၸွမ်း ၶၵ်ႉၵၢၼ် ပၢင်လိူၵ်ႈတင်ႈၼႆႉ တေလႆႈၸွမ်း ၶေႃႈတိုဝ်းၵမ် ၸွမ်းၼင်ႇပၵ်းပိူင်/ၽိုၼ်ၶေႃႈပူင် မၢႆလိၵ်ႈ (68/2025) မီးဝႆႉၼၼ်ႉၵူၺ်း ဢမ်ႇ ၵႃး တေလႆႈႁဵတ်းသၢင်ႈၸွမ်း ပၵ်းပိူင်/ၽိုၼ်ၶေႃႈပူင် မၢႆလိၵ်ႈ (69/2025) ၼၼ်ႉထႅင်ႈ။

သင်ပူၼ်ႉပႅၼ်ႁဵတ်းၽိတ်းမႅၼ်ႈ ပၵ်းပိူင်/ၶေႃႈတိုဝ်းၵမ် ၼင်ႇၶွမ်ႊမသျိၼ်ႊပၢင်လိူၵ်ႈတင်ႈ တမ်းဝၢင်းဝႆႉၼၼ်ႉၸိုင် တေထုၵ်ႇၺႃး ထွၼ်ဢွၵ်ႇ ယႃႉပႅတ်ႈသဵၼ်ႈၸိုဝ်ႈၸဝ်ႈၵဝ်ႇၵမ်းသိုဝ်ႈ ဝႃႈၼႆ။

ၶေႃႈတိုဝ်းၵမ် ဢမ်ႇၼၼ် ပၵ်းပိူင် ဢၼ်ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈတမ်းဝၢင်းဝႆႉပၼ်ၼၼ်ႉ “ၵူၼ်းၵေႃႉ တေၵႂႃႇလဵပ်ႈႁဵၼ်း ပၵ်းတႃပႂ်ႉတူၺ်းၸွမ်းပၢင်လိူၵ်ႈတင်ႈၼၼ်ႉ တေဢမ်ႇလႆႈပဵၼ်ၵူၼ်း ဢၼ်ႁၼ်လီ ၸပ်းၾၢႆႇ ပူၵ်ႉၵူဝ်ႇ/ မူႇၸုမ်း/ပႃႇတီႇ ဢၼ်လႂ်ဢၼ်ၼိုင်ႈ  ”  – ဝႃႈၼႆပႃး။

လိူဝ်ၼၼ်ႉ တေဢမ်ႇလႆႈပၼ်ႁႅင်းၵမ်ႉထႅမ်ပၼ် ၼေႃႇတႅၼ်းၽွင်း၊ ပႃႇတီႇၵၢၼ်မိူင်း ၸိူဝ်းတေၶဝ်ႈပၢင်လိူၵ်ႈတင်ႈ၊ တေဢမ်ႇလႆႈ သၢၼ်ၶတ်းၵၢၼ်လိူၵ်ႈတင်ႈ၊ တေဢမ်ႇလႆႈႁဵတ်းၵၢၼ်တူင်ႉၼိုင် ႁႂ်ႈမိူၼ်ၵၢၼ်သူၼ်းတုမ်လႃးလႃး မိူၼ်ၼင်ႇ သႂ်ႇသိူဝ်ႈၶူဝ်း ႁႂ်ႈပဵၼ်မိူၼ် တၢင်းၵမ်ႉထႅမ်ပႃႇတီႇ၊ မၢတ်ႇၶဵမ်မဵတ်ႇမၢႆပႃႇတီႇ၊ ႁဵတ်းၼႄၾၢင်ႁၢင်ႈပႃႇတီႇၸဵမ်ၸိူဝ်းၼႆႉ။

ၼႂ်းဝၼ်းပၼ်သဵင်ၵၢင်ၸႂ်ၼၼ်ႉ ၵူၼ်းၵေႃႉႁပ်ႉပုၼ်ႈၽွၼ်းၵႂႃႇလဵပ်ႈႁဵၼ်း ပၵ်းတႃပႂ်ႉတူၺ်းၸွမ်း ၵၢၼ်ပၼ်သဵင်ၼႆႉ တေလႆႈယူႇႁၢင်ႇ ၵႆၵၼ်တင်း ၵူၼ်းပၼ်သဵင်တီႈၵႄႇသုတ်း သၢမ်သွၵ်ႇ ( 15 ကိုက်) – ၼိုင်ႈဝႃးၸိူဝ်းၼႆႉသေ တိုၼ်းတေဢမ်ႇလႆႈထၢမ်ဝႃႈ ပၼ်ၶႅပ်းၵၢင်ၸႂ်ၽႂ် ၸုမ်းလႂ်  ၸဵမ်ၸိူဝ်းၼႆႉ  ။

လႆႈႁူႉဝႃႈ ယူႇတီႈၶွမ်ႊမသျိၼ်ၵၢၼ်လိူၵ်ႈတင်ႈမိူင်းႁူမ်ႈတုမ် တႂ်ႈသိုၵ်းမၢၼ်ႈၵုမ်းၵမ် လႆႈသူင်ႇလိၵ်ႈမွၵ်ႇပဵၼ်တၢင်းၵၢၼ်ၵႂႃႇထိုင် ၸုမ်း တူဝ်တႅၼ်းၸိုင်ႈမိူင်း ၸိူဝ်းၵဵဝ်ႇၶွင်ႈၸွမ်း မိူင်းႁူမ်ႈတုမ် (မိူင်းမၢၼ်ႈ) ၊ ႁွင်ႈၵၢၼ်လုမ်းၽွင်းတၢင်မိူင်းၼွၵ်ႈ ဢၼ်ၵဵဝ်ႇၶွင်ႈၸွမ်း သိုၵ်း မၢၼ်ႈ၊ ႁွင်ႈၵၢၼ်ၽွင်းလူင်မိူင်းၼွၵ်ႈ ၾၢႆႇတိတ်းတေႃႇၵပ်းသၢၼ်တင်းသိုၵ်းမၢၼ်ႈ ၸဵမ်ၸိူဝ်းၼႆႉသေ ပိုတ်ႇႁပ်ႉႁႂ်ႈၶဝ်ႈမႃးလဵပ်ႈႁဵၼ်း ၸွမ်းၶၵ်ႉၵၢၼ်ပၢင်လိူၵ်ႈတင်ႈ ၵမ်းၼႆႉယူႇ ဝႃႈၼႆ။

သိုၵ်းမၢၼ်ႈယိုတ်းမိူင်း ဢၼ်လႅၵ်ႈသိူဝ်ႈၶူဝ်းသိုၵ်း ၼုင်ႈၶူဝ်းၵူၼ်းႁိူၼ်း ၶၢႆႉႁွင်ႈၵၢၼ်ပဵၼ် ၶွမ်ႊမသျိၼ်ႊသိုၵ်းၼၼ်ႉ ႁၢင်ႈႁႅၼ်းတႃႇႁပ်ႉမွၵ်ႇ မုၵ်ႉၸုမ်းၸိူဝ်းၸမ် ၸႂ်ၵၼ်တင်းၶဝ် မႃးလဵပ်ႈႁဵၼ်းပၵ်းတႃပႂ်ႉတူၺ်းၸွမ်း ၵၢၼ်လိူၵ်ႈတင်ႈ ၼႂ်းမိူင်းႁူမ်ႈတုမ် ဢၼ်တေၸတ်းႁဵတ်းၼႂ်းႁၢင်ပီ 2025 ၼႆႉ တႃႇ 20 ၸုမ်းၼႆ ၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် ဢၼ်ယူႇတႂ်ႈဢၢမ်းၼၢတ်ႈသိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။

ၽွင်းဝၢၼ်ႈမိူင်းဢမ်ႇၼိမ်သဝ်း ပဵၼ်ပၢင်တိုၵ်းၵၼ်ပတ်းပိုၼ်ႉတူဝ်ႈမိူင်း ၵူၼ်းမိူင်းၼပ်ႉႁူဝ်သႅၼ် ႁူပ်ႉတၢင်းယၢပ်ႇ ယွၼ်ႉသိုၵ်းမၢၼ်ႈ ယူႇၼႆႉ မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း ၵေႃႉယုၵ်ႉယွင်ႈၸဝ်ႈၵဝ်ႇ ၶိုၼ်ႈပဵၼ်ၸၼ်ႉၵႅမ်ၸွမ်ၸိုင်ႈမိူင်းႁူမ်ႈတုမ် (မိူင်းမၢၼ်ႈ) ၶတ်းၸႂ်ႁဵတ်းသၢင်ႈၵူႈလၢႆး ပိူဝ်ႈတႃႇၶိုင်ပွင်ၸတ်းႁဵတ်းပၢင်လိူၵ်ႈတင်ႈ ႁႂ်ႈပဵၼ်တၢင်းၵၢၼ် လႄႈ ၸိုင်ႈမိူင်းၼွၵ်ႈ ယွမ်းႁပ်ႉလႆႈၼၼ်ႉယူႇ။

မိူဝ်ႈၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊ သူင်ႇလိၵ်ႈႁပ်ႉမွၵ်ႇမိၼ်းဢွင်ႇလၢႆႇ ဢွၵ်ႇၶၢဝ်းတၢင်းၵႂႃႇ ၶဝ်ႈၸွမ်းပၢင်ပွႆး သိုၵ်းၵျပၼ်ႊ ထွႆသိုၵ်းဢွၵ်ႇၼႂ်းမိူင်းၶႄႇ ၶွပ်ႈၶူပ်ႇ 80 ပီတဵမ် လႄႈ လဵပ်ႈႁဵၼ်းလၢႆးၸတ်းၵၢၼ် ၶၵ်ႉၵၢၼ်ငၢၼ်း ၼႂ်းမိူင်းၶႄႇၼၼ်ႉ တၢမ်တူဝ် မိၼ်းဢွင်ႇလၢႆႇ ၽိတ်ႈမွၵ်ႇႁွင်ႉ ႁႂ်ႈလူင်ပွင်ၸိုင်ႈမိူင်းၶႄႇ ပွႆႇၸုမ်းလဵပ်ႈႁဵၼ်းပၵ်းတႃပႂ်ႉတူၺ်း ပၢင်လိူၵ်ႈတင်ႈ မႃးမိူင်းႁူမ်ႈတုမ်။

တႅမ်ႈ- ၽူၺ်းၼုမ်ႇ