သိုၵ်းမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းဢိူင်ႇမိူင်းယေႃ ဢၼ်မီးၾၢႆႇဢွၵ်ႇလႃႈသဵဝ်ႈ 30 လၵ်းပၢႆ ၵူၼ်းဝၢၼ်ႈပၢႆႈၽေးသိုၵ်းၶဝ်ႈမိူင်းယေႃတင်းၼမ်။

မိူဝ်ႈၼႆႉ ဝၼ်းတီႈ 21/08/2018 ယၢမ်းၵၢင်ၼႂ် 8:45 ထိုင် 9:30 မူင်း သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼိူဝ်သၼ်လွႆ ၼႂ်းၵႄႈဝၢၼ်ႈလွႆပၢင်ထီး တင်း ဝၢၼ်ႈပၢင်ၶူၵ်ႉ ဢိူင်ႇမိူင်းယေႃ ၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ။ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း လိူဝ်ၼၼ်ႉ မၢၵ်ႇလူင်တူၵ်းသႂ်ႇၸွမ်းႁိမ်း ႁွမ်းဝၢၼ်ႈၵေႃႈမီး ဝႃႈၼႆ။

ၸၢႆးၾႃႉ ၵူၼ်းမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈလႆႈငိၼ်းသဵင်ၵွင်ႈ တၢင်းသၼ်လွႆပွတ်းဝၢၼ်ႈပၢင်ထီး ၾၢႆႇၸၢၼ်းမိူင်းယေႃ။ တီႈၼၼ်ႈၼၼ်ႉ မိူဝ်ႈၵူႈပွၵ်ႈ ပဵၼ်ဢွင်ႈတီႈယူႇၵဝ်ႇတပ်ႉပျီႇတူႉၸိတ်ႉ (တၵသၽ) ပူဝ်ႇမူၼ်း။ ပၢင်တိုၵ်းၼႆႉ လႅပ်ႈပဵၼ်မွၵ်ႈၼႂ်းၵႄႈဝၢၼ်ႈပၢင်ထီးတင်း ဝၢၼ်ႈပၢင်ၶူၵ်ႉ။ သွင်ၾၢႆႇၶဵင်ႈၶႅင်ၵၢၼ်သိုၵ်းၵၼ် ၸဵမ်မိူဝ်ႈ 2-3 ဝၼ်းပူၼ်ႉမႃး။ ၵူၼ်းဝၢၼ်ႈပၢင်ထီး ၵမ်ႈၼမ်ပဵၼ်ၸၢဝ်းၶႄႇ ဢွၼ်ၵၼ်ပၢႆႈၽေးသိုၵ်းမႃးမိူင်းယေႃ မႃးယူႇဝႆႉတီႈ ႁိူၼ်းပီႈၼွင်ႉၸမ်ၸႂ်ၽႂ်မၼ်းၸဵမ်မိူဝ်ႈဝႃး” ဝႃႈၼႆ။

တီႈသိုၵ်းမၢၼ်ႈတင်း သိုၵ်းတဢၢင်း ဢၼ်ပဵၼ်ပၢင်တိုၵ်းၼႆႉ ယၢၼ်ၵႆတင်းမိူင်းယေႃ မွၵ်ႈ 8 လၵ်း ပဵၼ်တၢင်း ၾၢႆႇၸၢၼ်း မိူင်းယေႃ။ လွင်ႈမၢတ်ႇၸဵပ်းလူႉတၢႆတႄႉ ဢမ်ႇလႆႈငိၼ်း။ တၢင်းပွတ်းတွၼ်ႈၼၼ်ႉ ၵူၼ်း ပိုၼ်ႉတီႈ ပဵၼ်ၸၢဝ်းတဢၢင်း လႄႈ ၸၢဝ်းၶႄႇ။ ႁဵတ်းၵၢၼ်ၽုၵ်ႇသွမ်ႈ ထူဝ်ႇ၊ ၶဝ်ႈၵၢပ်ႇလႄႈ သူၼ်ႁႆႈ ၸိူဝ်းၼႆႉ ဝႃႈၼႆ။

ၼၢင်းမူၺ် ၵူၼ်းၵႃႉမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ “ ဝၢႆးလင်ၼႆႉ ၵမ်းၵမ်းလႆႈငိၼ်းသဵင်ယိုဝ်းၵၼ်။ ႁဝ်းၶႃႈၵေႃႈ ဢမ်ႇၸၢင်ႈၵႂႃႇၶၢႆၵၢတ်ႇၸွမ်းဝၢၼ်ႈ။ ယွၼ်ႉၼၼ် လွင်ႈတႃႇႁႃၵိၼ် လဵင်ႉတွင်ႉတႄႉ ပဵၼ်ဢၼ်ယၢပ်ႇၽိုတ်ႇတွၼ်ႈ တႃႇၵူၼ်းမိူင်းႁဝ်းတႄႉတႄႉ” ဝႃႈၼႆ။

တၢင်းပွတ်းဢိူင်ႇမိူင်းယေႃၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းပျီႇ တူႉၸိတ်ႉပူဝ်ႇမူၼ်း တူင်ႉၼိုင်ၵႂႃႇ မႃး။ ဝၢႆးလင်ၼႆႉမႃး သိုၵ်းတဢၢင်း တင်းသိုၵ်းတႆးပွတ်းႁွင်ႇ ၸင်ႇၶဝ်ႈမႃးတူင်ႉၼိုင်ထႅင်ႈ ဝႃႈၼႆ။

မိူဝ်ႈဝူင်ႈပူၼ်ႉမႃးၼၼ်ႉၵေႃႈ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် တီႈဝၢၼ်ႈပၢင်ၶႃး ၾၢႆႇဢွၵ်ႇ မိူင်းယေႃ ၵမ်းၼိုင်ႈယဝ်ႉ။