ၼႂ်းလိူၼ်ၵျုၼ်ႊၼႆႉၵူၺ်း သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်း ဢမ်ႇယွမ်း 12 ပွၵ်ႈယဝ်ႉ ပဵၼ်ပၢင်တိုၵ်းၵၼ် ၸွမ်းၼႂ်းၸႄႈဝဵင်းၼမ်ႉသၼ်ႇ၊ မၢၼ်ႈတူင်ႈ၊ ၵူတ်ႉၶၢႆ လႄႈ ၼမ်ႉၶမ်း ၸဵမ်ၸိူဝ်းၼႆႉ။

ဝၼ်းတီႈ 21/6/2019 ယၢမ်းၵၢင်ဝၼ်း 12 မူင်းပၢႆ ထိုင် 1 မူင်းပၢႆဝၢႆးဝၼ်းၼၼ်ႉ သိုၵ်းမၢၼ်ႈ တပ်ႉမ 99 ပႃႈတႂ်ႈတပ်ႉၶမယ 419 တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် ႁိမ်းဝၢၼ်ႈၵႃႇလႅင်(ကာလိုင်ကျေးရွာ) ၸႄႈဝဵင်းၵူတ်ႉၶၢႆ ၸႄႈတွၼ်ႈ မူႇ ၸေႊ ၸိုင်ႈတႆးပွတ်းႁွင်ႇ ဝႃႈၼႆ။

ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း ပိုၼ်ၽၢဝ်ႇဝႃႈ “ ယွၼ်ႉသိုၵ်းမၢၼ်ႈႁႅၼ်းသိုၵ်း ၽိုတ်ႉၶဝ်ႈၸူး ၼႂ်းၼႃႈတီႈ ဢၼ် တပ်ႉသိုၵ်းတဢၢင်းတူင်ႉၼိုင်လႄႈ တင်း 2 ၾၢႆႇလႆႈပဵၼ်ပၢင်တိုၵ်းၵၼ်။ ဝၼ်းတီႈ 21 ၼႆႉၵူၺ်းၼင်ႇၵဝ်ႇ သိုၵ်းမၢၼ်ႈ တင်း သိုၵ်းပျီႇတူႉၸိတ်ႉၵွင်းၶႃး ႁူမ်ႈၵၼ် လေႃႇယိုဝ်း တပ်ႉသိုၵ်းတဢၢင်း ဢၼ်မီး ႁိမ်းဝၢၼ်ႈမၢၼ်ႈဢွင်ႇ ၸႄႈဝဵင်းၵူတ်ႉ ၶၢႆ လႆႈပဵၼ်ပၢင်တိုၵ်းၵၼ် ယၢမ်းၵၢင်ၼႂ် 6:50 မူင်း ထိုင် 7:43 မူင်း ယဝ်ႉၵမ်းၼိုင်ႈ”ဝႃႈၼႆ။

သိုၵ်းမၢၼ်ႈတင်း သိုၵ်းတဢၢင်းၼႆႉ ပဵၼ်ပၢင်တိုၵ်းၵၼ် ၼႂ်းလိူၼ်ၵျုၼ်ႊၼႆႉၵူၺ်း ဢမ်ႇယွမ်း 12 ပွၵ်ႈယဝ်ႉ။ ပေႃးတႄႇ ဢဝ် လိူၼ်ဢေႊပရိူဝ်ႊ ဝၼ်းတီႈ 30 မႃးထိုင် လိူၼ်ၵျုၼ်ႊ ဝၼ်းတီႈ 21 ၼႆႉ ပဵၼ်ပၢင်တိုၵ်းၵၼ် ဢမ်ႇယွမ်း 14-15 ပွၵ်ႈ ယဝ်ႉ ဝႃႈၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈၼႆႉပိုၼ်ၽၢဝ်ႇဝႆႉဝႃႈ သိုပ်ႇၵိုတ်းတိုၵ်းထႅင်ႈ ၾၢႆႇလဵဝ် တႃႇၶၢဝ်းတၢင်း 60 ဝၼ်း(2 လိူၼ်) တႄႇ ဢဝ် ဝၼ်းတီႈ 30 လိူၼ်ဢေႊပရိူဝ်ႊ 2019 တေႃႇထိုင် 30 ၵျုၼ်ႊ 2019 ထႅင်ႈပွၵ်ႈၵမ်းသွင်။

သိုၵ်း TNLA ၼႆႉ ပဵၼ်လုၵ်ႈၸုမ်း ၸုမ်းဢူၺ်းလီပွတ်းႁွင်ႇ 7 ၸုမ်း ဢၼ်တပ်ႉသိုၵ်း UWSA ဢွၼ်ႁူဝ်ဝႆႉ FPNCC ၼၼ်ႉ။ မိူဝ်ႈ ၼႂ်းလိူၼ်မၢတ်ႊၶျ်ၼၼ်ႉ သိုၵ်းမၢၼ်ႈ၊ လူင်ပွင်ၸိုင်ႈလႄႈ ၸုမ်းဢူၺ်းလီ ပွတ်းႁွင်ႇ 4 ၸုမ်း၊ ၸုမ်း KIO၊ သိုၵ်း TNLA၊ သိုၵ်း MNDAA လႄႈ သိုၵ်း AA တေႁူပ်ႉဢုပ်ႇဢူဝ်းၵၼ် လွင်ႈၵိုတ်းတိုၵ်းၵၼ်ၼႆသေ ငူပ်ႉငီႉၵၼ် လွင်ႈဢွင်ႈတီႈတေ ၸတ်း ဢမ်ႇလႆႈလႄႈ ထိုင်ယၢမ်းလဵဝ် ပႆႇပဵၼ်ၸတ်း ဝႃႈၼႆ။