တီႇယေႊၵူဝ်ႊ ၵျူဝ်ႊတႃႊ ၽူႈလဵၼ်ႈမၢၵ်ႇၼင်ၸိုဝ်ႈလိုဝ်းလင် ၼႂ်းၸုမ်းမၢၵ်ႇၼင် လီႊပႃႊပူႊၼၼ်ႉ ပဵၼ်ၽေးၵိုင်ႉၵၢင်ႉရူတ်ႉပိၼ်ႈသေ လႆႈလူႉတၢႆၵႂႃႇ ဝႃႈၼႆ။
မိူဝ်ႈဝၼ်းတီႈ 03/07/2025 ၼႆႉ တီႇယေႊၵူဝ်ႊ ၵျူဝ်ႊတႃႊ ဢႃယု 28 ပီတင်း ၼွင်ႉၸၢႆးမၼ်း သေႊပႃႊ ဢႃယု 26 ပီ ႁူပ်ႉၽေးၵိုင်ႉၵၢင်ႉ ရူတ်ႉၵႃးပိၼ်ႈၶွမ်ႈ ၼိူဝ်သဵၼ်ႈတၢင်းဝႆး ႁိမ်းလႅၼ်လိၼ် မိူင်းသပဵၼ်ႇတင်း ပေႃႊတူႊၵီႊသေ ၾႆးမႆႈလူႉတၢႆထင်တီႈ တင်းသွင်။
ၵျူဝ်ႊတႃႊၼႆႉ ပဵၼ်ၵူၼ်းမိူင်း ပေႃႊတူႊၵီႊ၊ မၼ်းၸၢႆး တိုၵ်ႉတႅင်ႇငၢၼ်းယဝ်ႉ ႁိုင် 2 ဝူင်ႈၵူၺ်း လႆႈ ပဵၼ်ၽေးၵိုင်ႉၵၢင်ႉသေ လူႉတၢႆၵႂႃႇ။
ဢိင်ၼိူဝ်လွင်ႈၼႆႉ ၸုမ်းမၢၵ်ႇၼင် မိူင်းပေႃႊတူႊၵီႊ၊ ၸုမ်းမၢၵ်ႇၼင် ၶလၢပ်ႉ လီႊပႃႊပူႊ ဢိၵ်ႇပႃး ၽူႈလဵၼ်ႈမၢၵ်ႇၼင် ၸိုဝ်ႈလိုဝ်းလင် မိူၼ်ၼင်ႇ ရေႃႊၼႄႇတူဝ်၊ မႅၵ်ႇၸီႇ ၽူႈႁူမ်ႈၽၢၵ်ႈလဵၼ်ႈ မၢၵ်ႇၼင်ၸွမ်းၵၼ်ၸိူဝ်းၼၼ်ႉ ပိုၼ်ၽၢဝ်ႇဢွၵ်ႇလွင်ႈမွင်ၸႂ်ၸွမ်း။
တီႇယေႊၵူဝ်ႊ ၵျူဝ်ႊတႃႊၼႆႉ ပဵၼ်ၽူႈလဵၼ်ႈမၢၵ်ႇၼင်ၵတ်ႉၶႅၼ်ႇၵေႃႉၼိုင်ႈ၊ မိူဝ်ႈပီ 2020 ၼၼ်ႉ လႆႈမႃးႁူမ်ႈၸုမ်း လီႊပႃႊပူႊ တီႈမိူင်းဢိင်ႇၵလၼ်ႇသေ ၶဝ်ႈပႃးၼႂ်းပၢင်ၶႅင်ႇပိတ်ႉမၢၵ်ႇၼင် 182 ပၢင်၊ သႂၢင်းၶဝ်ႈၵူဝ်း 65 ၵူဝ်း။
မိူဝ်ႈလိူၼ်မေႊပူၼ်ႉမႃးၼၼ်ႉ ၸုမ်းမၢၵ်ႇၼင် လီႊပႃႊပူႊ ၸူပ်းလႆႈၵွၼ်သူး ပရီႊမီႊယႃးလဵၵ်း၊ ဝၢႆး ၼၼ်ႉ ၼႂ်းလိူၼ်ၵျုၼ်ႊ ၸုမ်းမၢၵ်ႇၼင် ပေႃႊတူႊၵီႊ ၸူပ်းလႆႈၵွၼ်သူး Nations League ၊ ၼႂ်းပၢင်ၶႅင်ႇပိတ်ႉၸိူဝ်းၼၼ်ႉ မၼ်းၸၢႆးၵေႃႈ လႆႈၶဝ်ႈႁူမ်ႈလဵၼ်ႈၶႄႇၸွမ်း။ ဝၢႆးၼၼ်ႉ ၸတ်းပၢင်ၶႅၵ်ႇတႅင်ႇငၢၼ်း တိုၵ်ႉလႆႈၶၢဝ်းတၢင်း 2 ဝူင်ႈၵူၺ်း လႆႈပဵၼ်ၽေးရူတ်ႉ ၵႃးပိၼ်ႈၶွမ်ႈသေ ၵိုင်ႉၵၢင်ႉလူႉတၢႆၵႂႃႇ – သိုဝ်ႇၶၢဝ်ႇ CNN ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ