မိူဝ်ႈၵိူတ်ႇမႃးပဵၼ်ၵူၼ်း ၶိူဝ်းလႂ်ၶိူဝ်းၼိုင်ႈ ၽႂ်ၽႂ်ၵေႃႈ တၵ်းမီးၸႂ်ႁၵ်ႉၸိူဝ်ႉၸၢတ်ႈ ၼိူဝ်ႉလိူတ်ႇၶိူဝ်းၵူၼ်းတူဝ်ၵဝ်ႇ ၶွင်ၽႂ်မၼ်းယူႇယဝ်ႉ။  ပဵၵ်ႉသမ်ႉ မီးဢမ်ႇထိုင်ႁူဝ်ပၢၵ်ႇတဵမ်ၵေႃႈ ဢေႇသုတ်း တၵ်းဢမ်ႇယွမ်း 98 %, 99 % ။ သူၼ်ႇၵမ်ႈဢေႇၼၼ်ႉ တေမီးလၢႆလွင်ႈ – လူၺ်ႈၵၢၼ် ဢမ်ႇသူၼ်ၸႂ်ၼၼ်ႉ ၵွပ်ႈၵိုင်ႇလႆႈမိုင်ႉၵၢၼ် ႁႃၵိၼ်လဵင်ႉတွင်ႉလႄႈဢမ်ႇသူၼ် ၸႂ်ၼႆသေတႃႉၵေႃႈ ၵၢၼ်ႁၵ်ႉၸိူဝ်ႉၸၢတ်ႈမၼ်းတိုၼ်းမီးယူႇ ၵွမ်ႉၵူၺ်းဢမ်ႇလၢတ်ႈ ဢွၵ်ႇသူပ်းၼၼ်ႉၵွႆး။

သူၼ်ႇၵၢၼ်ႁၵ်းလင်ၸိူဝ်ႉၸၢတ်ႈၼႆၼၼ်ႉ ၵွပ်ႈတေမီးလွင်ႈၶဝ်ႈၸႂ်ၽိတ်းၸႃႉသင်သေလွင်ႈလွင်ႈ ႁိုဝ်၊ ၸဵပ်းၸႂ် ပႅင်းၸင်းသင်သေလွင်ႈလွင်ႈႁိုဝ်၊ ၵၢၼ်ၶဝ်ႈၸႂ်ၽိတ်းႁိုဝ် ၸဵပ်းၸႂ် ၼိူဝ်သိင်ႇဢၼ်ထုၵ်ႇပွင်ႁၢႆႉ လူၺ်ႈဢမ်ႇႁူႉ ငိူၼ်ႈငဝ်ႈ လွင်ႈတၢင်း ႁဵတ်ႇၽူလ် သင်သေၸိူဝ်ႉသေပိူင်ႁိုဝ်၊ ဢမ်ႇၼၼ် ပဵၼ်ၵူၼ်းသႅၼ်းဢၼ်ႁၼ်ၶီႈ လီလိူဝ် ႁၼ်သႆႈ ႁၼ်ပုၼ်ႈတူဝ်ၵဝ်ႇ လႆႈမၢၵ်ႈမီးလီပဵၼ်ယွၼ်ႉၾၢႆႇၽူႈၶဵၼ် ႁိုဝ် ထုၵ်ႇႁႅင်းဝိပ်ႇႁႅတ်ႉႁိုဝ်လႂ် ၸိူဝ်းၼႆႉသေ ပဵၼ်ၵႂႃႇၵူၼ်းႁၵ်းလင်ၸိူဝ်ႉၸၢတ်ႈ လူၺ်ႈဢမ်ႇႁူႉတူဝ် လႂ်ၸိူဝ်းၼၼ်ႉ ၸၢင်ႈမီးယူႇ။

လူၺ်ႈဢဵၼ်းဢၢၼ်း တႃႇတေလုၵ်ႉၽိုၼ်ႉဢဝ်မိူင်းၵွၼ်းၶေႃၶိုၼ်းၼၼ်ႉ လႆႈၵေႃႇတင်ႈ ၵွင်သိုၵ်းၸိုင်ႈတႆး တပ်ႉသိုၵ်းၸိုင်ႈတႆး “ၼုမ်ႇသိုၵ်းႁၢၼ် ႁဵတ်းၵၢၼ်ၵွၼ်းၶေႃ” ၼႆႉ လူၺ်ႈ ၸႂ်ႉႁၵ်ႉၸိူဝ်ႉၸၢတ်ႈၸိုင်ႈမိူင်းသေ မီးၵွင်ႈ 7 လဝ်းၵွႆးသေတႃႉ ပိူင်လူင်မၼ်း ယွၼ်ႉၵွပ်ႈမီးႁႅင်းသူပ်း ႁႅင်းတူဝ် ႁႅင်းႁူဝ်ၸႂ် လိူတ်ႈၼိူဝ်ႉသၢႆၸိူဝ်ႉႁိူဝ်ႇၶႆး ပဵၼ်ငဝ်ႈပိုၼ်ႉ ႁႅင်းပူသိူဝ်ႇသဵၼ်ႈတၢင်း ႁဵတ်းပဵၼ်တူၼ်ႈတိုၼ်းၵေႃႇသၢင်ႈၵိူတ်ႇဢွၵ်ႇ ပဵၼ်မႃးယွၼ်ႉၸႂ်ႁၵ်ႉၸၢတ်ႈ ပဵၼ်လၵ်းၵွႆးလႄႈ ပဵၵ်ႉသမ်ႉၶၢဝ်းယၢမ်းယိုတ်ႈယၢဝ်းမႃးၸဵမ်မိူဝ်ႈ 1958 တေႃႇပေႃးထိုင်ယၢမ်းလဵဝ် 2025 သေတႃႉၵေႃႈ ပႆႇႁၼ်မီးၵၢၼ်လၢၵ်ႇလၢႆးလိူဝ်တိူဝ်းလွင်ႈၶိုပ်ႈၼႃႈ သုတ်ႉၸမ်ယိူင်းမၢႆ ၼင်ႇဢဵၼ်းဢၢၼ်း ပဝ်ႈမၢႆၼၼ်ႉ လႆႈသင်သေပိူင်။  

လိူဝ်သေ ဢမ်ႇလႆႈ ယိင်ႈၶႅၼ်းလႆႈႁၼ်ၽႅၼ်ႇလိၼ်ထုၵ်ႇၸၵ်းယွႆႈသိၵ်ႇယႅၵ်ႈပဵၼ်ၵႂႃႇလၢႆပွတ်းလၢႆတွၼ်ႈၵွႆးပႆႇပေႃး ပီႈၼွင်ႉတႅၵ်ႇယႅၵ်ႈၽိတ်းမေႃး ၶႃႈႁႅမ်ၵၼ်တၢႆယုင်ႈယၢင်ႈႁူၼ်ႈပၼ်းလူင်ၵႂႃႇသဵင်ႈ ၵူၼ်းဝၢၼ်ႈၵူၼ်းမိူင်းၽူင်ႉပၢႆႈဢွၵ်ႇမိူင်းၵႂႃႇမိူဝ်းထင်ပၵ်းပဵၼ်ႁႅင်းၵၢၼ်မိူင်းပိူၼ်ႈ။

ၾၢႆႇၼိုင်ႈႁိူၼ်းတီႈယူႇဢူႇတီႈၼွၼ်းႁဝ်းၵေႃႈပဵၼ်ၵူၼ်းပႅၵ်ႇၼႃႈမႃးပုတ်ႈပၵ်းယူႇသၢင်ႈၵိၼ်သဝ်း၊ ၶွင်ႁဝ်းယဵၼ်း ပဵၼ်ၵႂႃႇၶွင်ပိူၼ်ႈ တီႈယူႇ ႁဝ်းပဵၼ်ၵႂႃႇတီႈယူႇၵူၼ်းပႅၵ်ႇၼႃႈ။ မိူဝ်ႈ 1958 ၼၼ်ႉႁဝ်းၵေႃႇ တင်ႈၵွင်သိုၵ်းႁဝ်း ပိူဝ်ႈတႃႇ လုၵ်ႉၽိုၼ်ႉဢဝ်ၶိုၼ်းမိူင်းလႄႈလိုပ်ႈႁေႃႈပႅတ်ႈ ၽူႈပူၼ်ႉပႅၼ်ၶႂၢၵ်ႈမိူင်း ၊ မိူဝ်ႈလဵဝ်ပဵၼ်ႁဝ်းယဝ်ႉ ၵေႃႉထုၵ်ႇႁေႃႈလိုပ်ႈဢွၵ်ႇဝၢၼ်ႈဢွၵ်ႇမိူင်း။ ပၢၼ်ႁေႃသႅင်မိူင်းလူင်တႆးၼွင်သႄၵေႃႈ ႁဝ်း ထုၵ်ႇပိူၼ်ႈႁုပ်ႈယိုတ်းသေလိုပ်ႈႁေႃႈႁဝ်းလႆႈပၢႆႈလူင်းမႃး။ ထိုင်မႃးပၢၼ်မိူဝ်ႈလဵဝ် မိူင်းလူင်ၸဝ်ႈၾႃႉတႆး မိူင်းသႅၼ်ဝီ ဢၼ်ၶဝ်ႈပႃးၼႂ်းမိူင်း ၸိုဝ်ႈၵႂင်ႈလိုဝ်းလင် ၵဝ်ႈႁႆးႁေႃတႆး ၼၼ်ႉၵေႃႈ ထုၵ်ႇၵူၼ်းပႅၵ်ႇၼႃႈ ႁုပ်ႈယိုတ်းဢဝ်ႁဵတ်းၸဝ်ႈႁဵတ်းၶုၼ်ထႅင်ႈ။  ၸင်ႇလႆႈဢွၼ်ၵၼ် ပၢႆႈလူင်းၶဝ်ႈမိူင်းထႆး တေႃႇပေႃးထိုင်ၶွပ်ႇပၢင်ႇလၢႆႇတိူၵ်ႈသုတ်းတၢင်းပၢႆႈယဝ်ႉ။ ပၢႆႈယဝ်ႉပၢႆႈထႅင်ႈ ၼိူဝ်လူၵ်ႈၼႆႉ ဢမ်ႇမီႈၼင်လိၼ်ပဝ်ႇ တႃႇႁဝ်းတေတႄႇဝၢၼ်ႈတႄႇမိူင်းမိူၼ်ၵူႈပွၵ်ႈယဝ်ႉ။

ယွၼ်ႉၶိုၼ်းမိူဝ်ႈပီ 1970 ၽွင်းသိုၵ်းယဵၼ် ၼႂ်းဝူင်ႈၵၢင်ငဝ်းလၢႆး ဢမ်ႇပဵၼ်မိတ်ႉဢူၺ်းလီ ၶွင်မႁႃဢမ်းၼၢၸ်ႈဢမေႊရိၵၼ်ႊ၊ သူဝ်ႊဝီႊယႅတ်ႉ ရတ်ႉသျႃႊ လႄႈ ၶႄႇ ၶွၼ်ႈႁႅင်းမၢၵ်ႇမိုဝ်ႈၸိုၼ်းယၢမ်း ၼိဝ်ႊၶလီႊယႃႊ ပိူဝ်ႈတႃႉတၢႆးလူၵ်ႈလုမ်ႈၾႃႉ ၽႂ်တေႁဵတ်းလႆႈၵွၼ်ႇၽႂ် ပိူဝ်ႈၵုမ်းၵမ်ဢႃႇၼႃႇၸၢၵ်ႈၼႂ်းလုမ်ႈၾႃႉ။ ဢမ်ႇမီးၽႂ်ဝႆႉၸႂ်ၽႂ်  ၾၢင်ႉတိူၼ်ၵႅမ်းတူဝ် ႁိပ်ႈသၢင်ႈၶိူင်ႈၵွင်ႈၵၢင်ႇ၊  လပ်ႉၶဵဝ်ႈၼဵပ်ႈငႃးၽၢႆ ၶပ်းၶိုင်ၵၢၼ် သၢင်ႈထိမ်ႊငၢၼ်းႁဵတ်းၵၢၼ် ဢမ်ႇဝႃႈၶၢဝ်ႇလပ်ႉ ၶၢဝ်ႇၵွင်းၶၢဝ်ႇထတ်းထွင် တင်းၵၢၼ်ၽွင်းၶဵဝ် (ပိူဝ်ႈၵၢၼ်ဢုပ်ႇဢူဝ်း ၵၢၼ်သဵတ်ႈၵႃႈသဵတ်ႈႁူဝ် ၵၢၼ်တုမ်ႉတွပ်ႇ ၵၢၼ်ဝၢင်းၽႅၼ်လၢႆးၶႅၼ်ႉလၢႆးတႅၼ်း)။

မိူၼ်တင်းၵၢၼ်လုၵ်ႉၽိုၼ်ႉၼႂ်းမိူင်းတႆးယၢမ်းၼၼ်ႉ ၸုမ်းလႂ်ဢမ်ႇၸုမ်းလႂ်ၵေႃႈ ဢဝ်ယႃႈၾိၼ်ႇလမ် ၾိၼ်ႇၽိူၵ်ႇ ႁဵတ်းႁႅင်း။ ဢမ်ႇဝႃႈၵၢၼ် ၵႃႉၶၢႆ ဢမ်ႇဝႃႈၵိၼ်ၸၢင်ႈဢဝ်ႁူမ်ႇလူမ်ႈပၼ် ဢမ်ႇဝႃႈၵိၼ်ၸၢင်ႈသူင်ႇတၢင်းလႄႈ ၵႅတ်ႇၶႄပၼ်ၸုမ်းၵေႃႉလႂ်ၸိူဝ်းၼႆႉ ပဵၼ်ၵၢၼ်လႆႈငိုၼ်း ဝႆးလႆႈငိုၼ်းၼမ်။ ၸင်ႇဝႃႈမိူင်းတႆးပေႃးလႆႈၸိုဝ်ႈသဵင် ၵဵဝ်ႇလွင်ႈယႃႈၾိၼ်ႇ ယႃႈလမ် ယႃႈၽိူၵ်ႇ ၼႂ်းသၢမ်လႅမ်ၸဵင်ႇၶမ်း ပဵၼ်ပိုၼ်ႉတီႈ မီးၸိုဝ်ႈသဵင်ၵႂင်ႈလိုဝ်းလင်ၵိုၵ်းလူၵ်ႈ ၼႂ်းၸဵင်ႇၸၢၼ်းဝၼ်းဢွၵ်ႇ“ဢေႊသျိူဝ်ႊ”။

လိုၼ်းသုတ်းဢၼ်ႁဝ်းလႆႈႁၼ်လၢႆလၢႆၸုမ်းမီးငိုၼ်းမီးတွင်း မီးႁႅင်းလဵင်ႉၵူၼ်းသိုၵ်း မီးႁႅင်းသိုဝ်ႉမၢၵ်ႇမိုဝ်ႈ ၸိုၼ်းယၢမ်း မီးႁႅင်းယိုတ်းပိုၼ်ႉတီႈ မီးႁႅင်းသၢင်ႈဢွင်ႈတီႈယူႇတၼ်းသဝ်း မီးႁႅင်းပူၵ်းပွင် ဢိူင်ႇ ဝဵင်း ဢွင်ႈတီႈ ၽွင်းငမ်းၸိူဝ်းၼႆႉ။ ၾၢႆႇၼိုင်ႈပေႃးမီးငိုၼ်း ႁဵတ်းသင် ၵေႃႈလႆႈ  ႁဵတ်းဢမ်ႇပဵၼ်ဢမ်ႇမေႃၵေႃႈဢဝ်ငိုၼ်းၸၢင်ႈ ဢဝ်ငိုၼ်းသိုဝ်ႉလႆႈၵူႈသိင်ႇၵူႈယၢင်ႇ ပၼ်ႁႅင်းၵူၼ်းသိုၵ်း မီးမေးမီးလုၵ်ႈ ၸွႆႈလဵင်ႉ လူလွမ် ။ ပေႃးမီးလုၵ်ႈၼမ် 5-6 ၸၢႆး ပၼ်သူးရၢင်းဝလ်းထႅင်ႈလူးၵွၼ်ႇ ပိူဝ်ႈႁႂ်ႈမီးႁူဝ်ၵူၼ်းၶိူဝ်းၼမ်လႄႈပဵၼ်ႁႅင်းၸိူဝ်ႉၸၢတ်ႈ။

ၵၢၼ်သၢင်ႈႁႅင်းၼၼ်ႉတၵ်းတေလႆႈမီးငိုၼ်း ၵၢၼ်တေမီးၼမ်ႉၵတ်ႉတၢင်းၶႅၼ်ႇၵေႃႈတၵ်းတေလႆႈမီးငိုၼ်း ၵၢၼ်သၢင်ႈလွင်ႈၶိုၼ်ႈယႂ်ႇဝၢၼ်ႈ မိူင်းလႄႈပူၵ်းပွင်ႁႂ်ႈမႂ်ႇၸိုၼ်ႈ ၵတ်းယဵၼ် ၼၼ်ႉၵေႃႈ တၵ်းတေလႆႈ မီးငိုၼ်း လႄႈပၺ်ၺႃ  သိူဝ်ႇတၢင်း ၸင်ႇထိုင်ယိူင်းဢၢၼ်းပဝ်ႈမၢႆ။ ၵူႈဝၼ်းၼႆႉ ႁဝ်းမီးတူၼ်ႈတိုၼ်းသင်ပဵၼ်ၶိူင်ႈမိုဝ်း တႃႇဢဝ်သိူဝ်ႇသဵၼ်ႈတၢင်း ယၢင်ႈ ၸူးၵၢၼ်ဢွင်ႇမၢၼ်ၶိုၼ်ႈယႂ်ႇ။

မိူဝ်ႈႁဝ်းမီးႁႅင်းၸႂ် မီးႁႅင်းႁၵ်ႉၸၢတ်ႈလၢႆလၢႆၵွႆး ဢမ်ႇမီးႁဵင်းငိုၼ်းတွင်း ႁႅင်းပၺ်ၺႃ ဢမ်ႇမီးၼမ်ႉၵတ်ႉ ၶူင်သၢင်ႈ လႆႈမၢၵ်ႇမိုဝ်ႈၸိုၼ်းယၢမ်း ထႅမ်ၵွင်ႉႁႅၼ်ႇၼဵပ်ႉငႃး ဢၼ်ၽၢႆၶူမ်း ႁဝ်းတေဢဝ်သင်သၢင်ႈလွင်ႈၵႅၼ်ႇၶႅင် လွင်ႈမၼ်ႈၸႂ် လွင်ႈမၼ်ႈၵိုမ်း။ ဝၢၼ်ႈမိူင်းၼိုင်ႈလုၵ်ႈ တၵ်းလႆႈ ပိုင်ႈၶွၼ်ႇၵူၼ်းမိူင်း ၽႃးသီ(ၶွၼ်ႇ)ၵၢၼ်ၵႃႉ ၵၢၼ်မၢၵ်ႈမီးၼၼ်ႉ မႃးသၢင်ႈဝၢၼ်ႈသၢင်ႈမိူင်း။  ဢမ်ႇဝႃႈမုၵ်ႉမူႇၸုမ်းၵေႃ ႁိုဝ်ၸိုင်ႈမိူင်း မိူင်းဢၼ်ၵၢၼ်မၢၵ်ႈမီးတူၵ်းတႅမ်ႇ ဝၢၼ်ႈမိူင်း ၼၼ်ႉၵေႃႈဢမ်ႇၶိုၼ်ႈယႂ်ႇ။ ပေႃးၵၢၼ်မၢၵ်ႈမီးမိူင်းၼၼ်ႉတူၵ်းတႅမ် ၵူၼ်းမိူင်း ၼၼ်ႉၵေႃႈ ၵွတ်းၽၢၼ် ။ ပေႃးၵူၼ်း မိူင်းၵွတ်းၽၢၼ် လူင်ပွင်ၸိုင်ႈၵေႃႈဢမ်ႇၸၢင်ႈ ၵဵပ်းၽႃးသီ(ၶွၼ်ႇ)တီႈလႂ် မႃးသၢင်ႈဝၢၼ်ႈမိူင်း။

ၵူႈဝၼ်းၼႆႉ ယႃႇဝႃႈတေၵဵပ်းၽႃးသီ (ၶွၼ်ႇ) တီႈၵူၼ်းမိူဝ်ႈလႃႈ ၵူၼ်းမိူင်းၵွတ်းၽၢၼ်တုၵ်ႉယၢၵ်ႈ ၸွတ်ႇတူဝ်ႈၵူႈယွမ်ႇ၊ ၵူၺ်းၵႃႈ တႃႇၸုမ်းၸိူဝ်းၵဵပ်းၶွၼ်ႇတီႈၵူၼ်းမိူင်းၼၼ်ႉ တေ ၶိုၼ်းၸွႆႈ ၵူၼ်းမိူင်းၼႆတႄႉ  ယိင်ႈၶႅၼ်း မိုတ်ႈလပ်းသိင်ႇ မိုတ်းတၼ်ပိင်း။ တေႃႈၼင်ႇၵူၼ်းပၢႆႈၽေး ဢၼ်မီးယူႇၸွမ်းလႅၼ်လိၼ်ၸိူဝ်းၼၼ်ႉ လူင်ပွင်ၸိုင်ႈႁိုဝ် ၸုမ်းလႂ်ၵေႃႈ ဢမ်ႇၸၢင်ႈၸွႆႈ။  ပဵၵ်ႉသမ်ႉမီးၵူၼ်းတူင်ႇဝူင်းတႆး ဢၼ်ႁဵတ်းၵၢၼ်ၸွႆႈထႅမ်ၸိူဝ်းၼၼ်ႉၵေႃႈ ဢမ်ႇၸႂ်ႈမီးငိုၼ်း တူဝ်ၵဝ်ႇ ႁင်းၵွႆးသေ ဢဝ်မႃးၸွႆႈ၊  ၸိူဝ်းၶဝ်ၵေႃႈလႆႈယွၼ်း ၸုမ်းၸွႆႈထႅမ်တီႈၼႃႈၽိူၵ်ႇ NGO ၶဝ်ထႅင်ႈတေႃႇၼိုင်ႈ သေမႃးၸွႆႈ မိူဝ်ႈလဵဝ် ၸူဝ်ႈၸွမ်ၸိုင်ႈ ဢမေႊရိၵႃႊ ၻူဝ်ႊၼလ်ႊၻ် ထရမ်ႊပ် မႃးပဵၼ်ၸွမ်ၸိုင်ႈ မီးၵၢၼ်လႅၵ်ႈလၢႆႈလၵ်းၼမ်းလၢႆသိင်ႇလၢႆယၢင်ႇသေ မီးလွင်ႈယၢပ်ႇၽိုတ်ႇ ၵပ်ႉၵိၼ်းမႃးလႄႈ တိုဝ်ႉတၢင်းၵၢၼ်လႆႈႁပ်ႉတၢင်းၸွႆႈၵေႃႈတေၸၢင်ႈလူတ်းယွၼ်းယွမ်းလူင်း ႁိုဝ် ၶၢတ်ႇႁၢမ်းၵိုတ်း ပႅတ်ႈ။

ယွၼ်ႉၼႆငိုၼ်းၼႆႉ ဢမ်ႇၵွမ်ႉၵႃႈတႃႇသူၼ်ႇတူဝ်ၵွႆး တႃႇၵၢၼ်ၸိူဝ်ႉၸၢတ်ႈၸိူဝ်ႉၶိူဝ်းၵေႃႈ ယိင်ႈၶႅၼ်းလမ်ႇလွင်ႈတႄႉတႄႉယဝ်ႉ ငိုၼ်းလႄႈ ပၺ်ႇၺႃႇတင်းၵၢၼ်ၵတ်ႉၶႅၼ်ႇလၵ်းလႅမ်ၼၼ်ႉပေႃးႁဝ်းႁႅၵ်းႁၢမ်းၶၢတ်ႇမၼ်းၵေႃႈ ၵၢၼ်ႁဵတ်းၵၢၼ်သၢင်ႈႁဝ်းၼၼ်ႉၵေႃႈ တေလႃႈလိုၼ်း တူၵ်းလင်ယူႇပိူၼ်ႈယူႇတိၵ်းတိၵ်းယဝ်ႉ။ ယွၼ်ႉၼၼ်ႉလိူဝ်သေၵၢၼ်ႁၵ်ႉၸၢတ်ႈယဝ်ႉ ႁဝ်းတၵ်းလႆႈမီးၵၢၼ်မၢၵ်ႈမီး မိူၼ်ၵူၼ်းၵျူႊ(ဢိသ်ႉရႃႊဢိလ်ႊ) ၶဝ်ၵွပ်ႇၵူႈၸိူဝ်ႉၸၢတ်ႈ သၢင်ႈဝၢၼ်ႈသၢင်ႈမိူင်း ပၵ်းယူႇၼႂ်းႁွပ်ႈလွမ်ႉၵၢင်ၸိူဝ်းပဵၼ်ၽူႈၶဵၼ်ၶဝ်။

(*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉ ၼမ်ႉၵႂၢမ်းလႄႈ တၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈ ၸဝ်ႈပၢႆၵမ် ၵူၺ်းၶႃႈဢေႃႈ)