လူင်ပွင်ၸိုင်ႈထႆးလႄႈ ၶွမ်ႊပၼီႊ ၻီႊထႅၵ်ႊလႄႈ ထရူႊမုပ်ႉ ၶိုင်ပၼ်ၵူၼ်းမိူင်းမၢၼ်ႈၼႂ်းမိူင်းထႆး ႁႂ်ႈၵပ်းသိုပ်ႇၾူၼ်းၸူးတေႃႇၵူၼ်းႁိူၼ်းလႆႈ လူၺ်ႈဢမ်ႇသဵင်ႈငိုၼ်း။
ၽႅၼ်ႇလိၼ်ဝႆႁႅင်းၵမ်းၼႆႉ ၵူၼ်းမိူင်းမၢၼ်ႈမီးလွင်ႈလူႉသုမ်းတုမ်ႉတိူဝ်ႉၼမ်ႁႅင်း ၊ ႁႅင်းၵၢၼ်မိူင်းမၢၼ်ႈ ၼႂ်းမိူင်းထႆးၵေႃႈ ယွၼ်ႉႁိူၼ်းတိုၵ်းသုင်ဢၼ်တိုၵ်ႉၵေႃႇသၢင်ႈယူႇၼၼ်ႉ ၵူၼ်ႇလူင်းတဵင်သႂ်ႇလႄႈ လူႉတၢႆမၢတ်ႇၸဵပ်းၼမ်။
လူင်ပွင်ၸိုင်ႈ မိူင်းထႆး ပိုၼ်ၽၢဝ်ႇ မိူဝ်ႈဝၼ်းတီႈ 29/03/2025 ဝႃႈ ႁႅင်းၵၢၼ် မိူင်းမၢၼ်ႈ ၵပ်းၾူၼ်းၸူး ၵူၼ်းတၢင်းႁိူၼ်းလႆႈၾရီႊ တေႃႇထိုင်လိူၼ်မၢတ်ႉၶျ် ၼႆႉသဵင်ႈ ဝႃႈၼႆသေတႃႉ ဝၼ်းတီႈ 31/03/2025 ၼႆႉ ၸဝ်ႈၼႃႈတီႈၾၢႆႇၵပ်းသိုပ်ႇၵပ်းသၢၼ်တၢင်းမိူင်းထႆး ၶိုၼ်းသိုပ်ႇသုၼ်ႇတိုဝ်ႉ တၢင်းထႅင်ႈသိုပ်ႇလႆႈ ထိုင် ဝၼ်းတီႈ 05/04/2025 ဝႃႈၼႆ။
ၼႂ်းၶေႃႈပိုၼ်ၽၢဝ်ႇမိူင်းထႆးၼၼ်ႉပႃးဝႆႉဝႃႈ တေလႆႈတဵၵ်းမၢႆ *900*8351# ဢွၼ်တၢင်း၊ ပေႃးမၼ်းၶဝ်ႈ တေမီးသဵင်လၢတ်ႈၵႂၢမ်းဢိင်းၵလဵတ်ႈ ဝႃႈသူမီးသုၼ်ႇသိုပ်ႇၾူၼ်ႊ ၾရီႊ ၼႆ- ပေႃးပဵၼ် Dtac – တေလႆႈတဵၵ်းၸွမ်းမၢႆ 00400 95 သေ သိုပ်ႇတဵၵ်းမၢႆၾူၼ်းဢၼ်ႁဝ်းတေၵပ်း။
သင်ပဵၼ် True တဵၵ်းၸွမ်းမၢႆ 00600 95 ယဝ်ႉသိုပ်ႇတဵၵ်း မၢႆၾူၼ်းမိူင်းမၢၼ်ႈသေ ထူဝ်းႁႃၵၼ်လႆႈ ဝႃႈၼႆ။
ယွၼ်ႉပိူဝ်ႈၽႅၼ်ႇလိၼ်ဝႆ ႁိူၼ်းယေးၵူၼ်ႇ ၽႅၼ်ႇလိၼ်တႅၵ်ႇဢႃႈယၢၼ်ၵၼ်သေ တီႈမိူင်းမၢၼ်ႈလၢႆလၢႆတီႈ ၾႆးၾႃႉၶၢတ်ႇ၊ သၢႆၾူၼ်ႊ ဢိၼ်ႊတႃႊၼႅတ်ႉ ၶၢတ်ႇ။ ၵပ်းသိုပ်ႇၵၼ်ဢမ်ႇလႆႈ။
ၸွမ်းၼင်ႇ ၸုမ်းၶူၼ်ႉၶႂႃႉၵဵပ်းၶေႃႈမုၼ်းလၢတ်ႈဝႆႉဝႃႈ ၵူၼ်းမိူင်းႁူမ်ႈတုမ် မိူင်းမၢၼ်ႈ ၸိူဝ်းယူႇသဝ်းဝႆႉၼႆႉမိူင်းထႆး မီး 4 လၢၼ်ႉပၢႆ၊ လွင်ႈၸဝ်ႈၼႃႈတီႈထႆး ၸတ်းၵၢၼ်ပၼ် ႁႂ်ႈထူဝ်းၾူၼ်းလၢႆလႆႈၼႆႉ မီးၽွၼ်းလီတွၼ်ႈတႃႇ ႁႅင်းၵၢၼ်ယၢၼ်မိူင်း ဢၼ်မီးယူႇၼႂ်းမိူင်းထႆးတႄႉတႄႉ ဝႃႈၼႆ သေတႃႉ ၵမ်ႈၼမ်တႄႉလၢတ်ႈဝႃႈ သိုပ်ႇဢမ်ႇလႆႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ