ဝၼ်းတီႈ 1/1/2025 ၼႆႉ သိုၵ်းရတ်ႉသျႃး ၸႂ်ႉၶိူင်ႈတရူၼ်း ယိုဝ်းသႂ်ႇဝဵင်းလူင်ၵိပ်ႊ (Kyiv) မိူင်းယူႊၶရဵၼ်ႊ ၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်းဢမ်ႇယွမ်း 6 ၵေႃႉ ႁိူၼ်းယေးၵူၼ်းမိူင်း ၺႃးၸၢၵ်ႇမၢၵ်ႇလူႉၵွႆထႅင်ႈ လူင်ပွင်ၸိုင်ႈမိူင်းယူႊၶရဵၼ်ႊလၢတ်ႈ။
ၼႂ်းဝၼ်းၼၼ်ႉ ပၢၼ်ႇယေးငိုၼ်း ၼေႊသျိၼ်ႊၼႄႇ မိူင်းယူႊၶရဵၼ်ႊၵေႃႈ ပိုၼ်ၽၢဝ်ႇဢွၵ်ႇမႃးဝႃႈ မၢၵ်ႇၶိူင်ႈ တရူၼ်းရတ်ႉသျႃး တူၵ်းတႅၵ်ႇႁိမ်းပၢၼ်ႇယေးငိုၼ်း ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈ Volodymyr Zelenskyy ၸွမ်ၸိုင်ႈ မိူင်းယူႊၶရဵၼ်ႊလၢတ်ႈဝႃႈ – ၽွင်းၵူၼ်း မိူင်းပႂ်ႉႁပ်ႉတွၼ်ႈပီမႂ်ႇၵေႃႈ သိုၵ်းရတ်ႉသျႃးၼႆႉ ၵုမ်ႇဝူၼ်ႉတႃႇယိုဝ်းတိုၵ်းႁဵတ်းႁၢႆႉတေႃႇ မိူင်းယူႊၶရဵၼ်ႊၵူၺ်း ႁဵတ်းႁႂ်ႈၵူၼ်းမိူင်း လႆႈမၢတ်ႇၸဵပ်းလူႉတၢႆ ဝႃႈၼႆ။
ၶၢဝ်းႁပ်ႉပီမႂ်ႇလုမ်ႈၾႃႉၼႆႉ သိုၵ်းရတ်ႉသျႃး ၸႂ်ႉၶိူင်ႈတရူၼ်း 111 လမ်း ယိုဝ်းတိုၵ်းၼႂ်းမိူင်းယူႊၶရဵၼ်ႊ လၢႆလၢႆပိုၼ်ႉတီႈ ဝႃႈၼႆ။
ပၢင်တိုၵ်း ရတ်ႉသျႃး – ယူႊၶရဵၼ်ႊၼႆႉ တႄႇမႃး မိူဝ်ႈဝၼ်းတီႈ 24/2/2022 ႁိုင်မႃးၶၢဝ်းတၢင်းၸမ် 3 ပီ ယဝ်ႉသေတႃႉ တေႃႇထိုင်ယၢမ်းလဵဝ် သွင်ၾၢႆႇတိုၵ်ႉယိုဝ်းတိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ႁၢဝ်ႈႁႅင်းယူႇ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ