တပ်ႉၸုမ်းပူတ်းပွႆႇ ၵူၼ်းမိူင်းမၢၼ်ႈ BPLA ပိုၼ်ၽၢဝ်ႇဢွၵ်ႇမႃးဝႃႈ တေတႄႇၽႅၼ်ၵၢၼ်ယၼ်ႇသိုၵ်း တီႈ မိူင်းမၢၼ်ႈပွတ်းၵၢင် (အညာဒေသ) သေ လိုပ်ႈတိုၵ်း သိုၵ်းမၢၼ်ႈ ယိုတ်းမိူင်း ဝႃႈၼႆ။

တပ်ႉၸုမ်းပူတ်းပွႆႇ ၵူၼ်းမိူင်းမၢၼ်ႈ BPLA ၼႆႉ ပဵၼ်ၸုမ်းလုၵ်ႉၽိုၼ်ႉ ဢၼ်ႁူမ်ႈႁွမ်းၸွမ်း ၸုမ်းယိပ်း ၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆးပွတ်းႁွင်ႇ၊ မိူင်းယၢင်း ၸိူဝ်းၼၼ်ႉသေ ၶဝ်ႈပၢင်တိုၵ်းဝႆႉ။ ၼႂ်းၶၢဝ်းတၢင်း ဢမ်ႇႁိုင်ၼႆႉ တီႈမိူင်းမၢၼ်ႈပွတ်းၵၢင် တေတႄႇၽႅၼ်ၵၢၼ်ယၼ်ႇသိုၵ်းၵႂႃႇယဝ်ႉၼႆ မွင်ႇသွင်းၶ ၽူႈ ၵွၼ်း တပ်ႉၸုမ်း BPLA တႅမ်ႈတၢင်ႇဝႆႉ တီႈၼႃႈသိုဝ်ႇသုၼ်ႇတူဝ်မၼ်း ၼႂ်းဝၼ်းတီႈ 27/10/2024 ၼႆႉၼင်ႇၼႆ။  

တပ်ႉၸုမ်းပူတ်းပွႆႇၵူၼ်းမိူင်းမၢၼ်ႈ BPLA ၼႆႉ ယိူင်းဢၢၼ်းပဵၼ် တပ်ႉၸုမ်းယိပ်းၵွင်ႈၵၢင်ႇ ၸၢဝ်းမၢၼ်ႈသေ တႄႇၶွတ်ႇၽွတ်ႈမႃး မိူဝ်ႈဝၼ်းတီႈ 7 လိူၼ်ဢေႊပရိူဝ်ႊ ပီ 2021 ၼႂ်းၼႃႈတီႈတပ်ႉမႁႃႇ မၢႆ 5 KNU ။

ဝၢႆးၼၼ်ႉ ႁူမ်ႈတင်း ၸုမ်းယိပ်းၵွင်ႈ ၼႂ်းမိူင်းတႆး ပွတ်းႁွင်ႇတင်း မိူင်းယၢင်းၽိူၵ်ႇသေ ၶဝ်ႈပၢင်တိုၵ်းမႃး တင်းၼမ်။ လိူဝ်ၼၼ်ႉ ၼႂ်းၽႅၼ်ၵၢၼ်ယၼ်ႇသိုၵ်း 1027 ဢၼ်ၸုမ်းဢူၺ်းလီပွတ်းႁွင်ႇ 3 ၸုမ်း ဢွၼ် ႁူဝ်လေႃႇတိုၵ်းသိုၵ်းမၢၼ်ႈသေ ယိုတ်းၵုမ်းလႆႈဝဵင်းတင်းၼမ် ၼၼ်ႉၵေႃႈ လုၵ်ႈၸုမ်း BPLA  ၶဝ်ႈပႃးၸွမ်း ဝႆႉ ဝႃႈၼႆ။

ၼႂ်းၶၢဝ်းတၢင်းဢမ်ႇႁိုင် ဢၼ်တေတႄႇၽႅၼ်ၵၢၼ်ယၼ်ႇသိုၵ်း ၼႂ်းမိူင်းမၢၼ်ႈပွတ်းၵၢင်ၼႆႉ ပဵၼ်မႃးၼႃႈတီႈသိုၵ်းမၢႆသၢမ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။