ၼမ်ႉၼွင်းထူမ်ႈတီႈ ထုင်ႉၼွင်ႁၢႆးယႃႈ ႁိုင်ၶၢဝ်းတၢင်း 3 ဝူင်ႈပၢႆ ၵူၼ်းမိူင်းယၢပ်ႇၽိုတ်ႇၵိၼ်းၸႂ် လႆႈမႆႈၸႂ် ပႃးၽေးငူးလိူင်ႇ ဝႃႈၼႆ။
ၼႂ်းႁၢင်လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ၾူၼ်တူၵ်းထပ်းၵၼ်လၢႆလၢႆဝၼ်း ႁဵတ်းႁႂ်ႈၼမ်ႉၼွင်းထူမ်ႈ မူႇဝၢၼ်ႈ 170 ဝၢၼ်ႈပၢႆ ၼႂ်းထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၵူၼ်းမိူင်းယၢပ်ႇၽိုတ်ႇၵိၼ်းၸႂ် ၸဵမ်ဢဝ်တႃႇၵိၼ်တႃႇၼွၼ်းလႄႈ လႆႈမႆႈၸႂ်ပႃး ၽေးငူးလိူင်ႇ။
ၵူၼ်းပိုၼ်ႉတီႈ လၢတ်ႈတီႈသိုဝ်ႇၶၢဝ်ႇၶမ်းသႃးငဝ်းဝႃႈ – “ဝၢႆးၼမ်ႉယိုင်ႈ ငူးတင်းၼမ် ၶိုၼ်ႈယူႇၼႂ်းႁိူၼ်း ၼႂ်းယေးၵူၼ်းမိူင်း၊ မၢင်ႁိူၼ်း တႄႉ ယွၼ်ႉၵူဝ်ႁဵတ်းႁၢႆႉတေႃႇၵူၼ်းလႄႈ ၶႃႈႁႅမ်တၢႆပႅတ်ႈ။ ငူးၵေႃႈ ယွၼ်ႉဢမ်ႇမီးတီႈယူႇလႄႈ လႆႈ ႁၼ် ၶဝ်ႈယူႇၼႂ်းႁိူၼ်း၊ ၼႂ်းၶူဝ်းၶွင်ႁိူၼ်းယေးတင်းၼမ်”- ဝႃႈၼႆ။
တေႃႇထိုင်ယၢမ်းလဵဝ် ၼမ်ႉၼႂ်းၼွင်ႁၢႆးယႃႈ တိုၵ်ႉၼွင်းယိုင်ႈဝႆႉ၊ မိူၼ်ၼႆ တီႈထုင်ႉပူင်းၵေႃႈ ၼမ်ႉၼွင်းယိုင်ႈဝႆႉ ႁဵတ်း ႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ် တူင်ႈၼႃးလူႉသုမ်း ၼပ်ႉႁူဝ်မိုၼ်ႇဢေႊၶိူဝ်ႊ။
ၼႂ်းႁူဝ်လိူၼ်ၼႆႉ ယူႇတီႈႁွင်ႈၵၢၼ်ၾၢႆႇၾိင်ႈၾႃႉပိုၼ်ၽၢဝ်ႇဝႆႉ ၾူၼ်ၸၢင်ႈတူၵ်းၼမ်ထႅင်ႈလႄႈ ႁႂ်ႈၾၢင်ႉၽေးၼမ်ႉလုပ်ႇၼမ်ႉထူမ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ