ပိူင်ပဵၼ်ၵူၼ်းမိူင်း ယၢမ်းလဵဝ် ၽေးသိုၵ်းၵေႃႈ လႆႈၵူဝ်၊ ၽေးသၽႃႇဝၵေႃႈ လႆႈၵူဝ် ဢၼ်လႂ်ၵေႃႈ ဢမ်ႇႁႄႉႁၢမ်ႈလႆႈ။ မိူၼ်ၼင်ႇ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉၵေႃႈ ၵႆၽေးသိုၵ်းသိူဝ်ယူႇသေတႃႉ ၽေးသၽႃႇဝ ၼမ်ႉထူမ်ႈတႄႉ ဝႄႈဢမ်ႇလွတ်ႈလႆႈ ပီၼႆႉ မႄႈသၢႆလုပ်ႇထူမ်ႈ ဢမ်ႇယွမ်း 9 ပွၵ်ႈယဝ်ႉ။

ယွၼ်ႉၼမ်ႉသၢႆထူမ်ႈၼႆႉသေ ရူတ်ႉၵႃးႁိူၼ်းယေးလူႉၵွႆၼမ်၊ ၵူၼ်းၵႃႉၵူၼ်းၶၢႆ သုမ်းၼပ်ႉႁူဝ်သိပ်းသႅၼ်ဝၢတ်ႇ (ငိုၼ်းထႆး) လႄႈ တုမ်ႉတိူဝ်ႉၵူၼ်းမိူင်းလူႉတၢႆမၢတ်ႇၸဵပ်းၸွမ်း ၵေႃႈမီး။   

တင်ႈတႄႇ ဝၼ်းတီႈ 10/09/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၵူၼ်းမိူင်းတႃႈၶီႈလဵၵ်း ဢွၼ်ၵၼ် ၵႄႈလိတ်ႈပၼ်ႁႃၽေးၼမ်ႉထူမ်ႈၼႆႉ ပႆႇယဝ်ႉပႆႇတူဝ်ႈ။ ၽွင်းၼမ်ႉၼွင်းထူမ်ႈၼၼ်ႉ ၵူၼ်းမိူင်း တႃႈၶီႈလဵၵ်း ဢွၼ်ၵၼ်ထူပ်း ၽေးလၢႆလွင်ႈ ဢမ်ႇၵွမ်ႉၽေးၼမ်ႉႁူၺ်ႈၼမ်ႉလွႆ လႆထူမ်ႈလႄႈ လိၼ် ၵူၼ်ႇတဵင်ႁိူၼ်းယေးၵူၺ်း။ လွင်ႈၵူၼ်းလူႉတၢႆမၢတ်ႇၸဵပ်းၸွမ်း ၵေႃႈမီးၼမ်။ ၼႂ်းၶၢဝ်းၾူၼ်ၼႆႉၵူၺ်း ၼမ်ႉၼွင်းထူမ်ႈ ဝဵင်းတႃႈၶီႈလဵၵ်းၼႆႉ ဢမ်ႇယွမ်း 9 ပွၵ်ႈယဝ်ႉ။ ပွၵ်ႈလိုၼ်းၼႆႉ ၼမ်ႉလုပ်ႇၼွင်းထူမ်ႈ ႁႅင်းသုတ်းလႄႈ ႁိူၼ်းယေး 2 ၸၼ်ႉၵေႃႈ ဢမ်ႇလွတ်ႈ။

ယၢမ်းလဵဝ် ၼမ်ႉယွမ်းၵႂႃႇယဝ်ႉသေတႃႉ ၶီႈၵူမ်ႇၶီႈငႂ်ႈ တိုၵ်ႉတဵမ်တၢင်းယူႇ မၢင်တီႈၶီႈၵူမ်ႇ လိုၵ်ႉပဵင်းဢႅဝ်လႄႈ ႁဵတ်းႁႂ်ႈ ၵူၼ်းမိူင်းယၢပ်ႇၽိုတ်ႇ လွင်ႈၵႂႃႇမႃးထႅင်ႈ ယဝ်ႉၵေႃႈ ရူတ်ႉၵႃး ႁိူၼ်းယေး ဢၼ်ၺႃး လိၼ်ၵူၼ်ႇတဵင်သႂ်ႇ ၸိူဝ်းၼၼ်ႉ ၵေႃႈၼမ်။ ထိုင်မိူဝ်ႈလဵဝ် ပႆႇၸၢင်ႈဢဝ်ၶိုၼ်း။ ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း ၼၢင်းယိင်း ၵေႃႉၼိုင်ႈ လၢတ်ႈၼႄၼင်ႇၼႆ –

“ၼႂ်းၶၢဝ်းၾူၼ် ပီၼႆႉ ၼမ်ႉထူမ်ႈတီႈတႃႈၶီႈလဵၵ်းၼႆႉ ဢမ်ႇယွမ်း 8-9 ပွၵ်ႈယဝ်ႉ။ ဢၼ်ႁၢႆႉႁႅင်းသေ ပိူၼ်ႈတႄႉ ပဵၼ်ၵမ်းလိုၼ်းၼႆႉဢေႃႈ။ တၢင်းၾင်ႇထႆး – ၾင်ႇမၢၼ်ႈၼႆႉ တုမ်ႉတိူဝ်ႉမိူၼ်ၵၼ်မူတ်း။ ပေႃးပဵၼ်ပိုၼ်ႉတီႈသုင်တႄႉ ၶႅၼ်းယူႇ။ သဵၼ်ႈတၢင်းၵေႃႈ ပႆႇၸၢင်ႈၵႂႃႇမႃး။ ႁိူၼ်း၊ ၵႃး၊ ရူတ်ႉၶိူင်ႈ ၸိူဝ်းၼႆႉ ဢၼ်ၺႃးလိၼ်ၵူၼ်ႇတဵင်ဝႆႉ ၼၼ်ႉၵေႃႈ ပႆႇ ၸၢင်ႈဢဝ်ၶိုၼ်း။ ၼမ်ႉယွမ်းၵႂႃႇယဝ်ႉသေတႃႉၵေႃႈ ၶီႈၵူမ်ႇငႂ်ႈတိုၵ်ႉလိုၵ်ႉပဵင်းဢႅဝ်ယူႇ။ ၵူၼ်းမိူင်း ၸိူဝ်းယူႇၸွမ်း ၾင်ႇ ႁိုၵ်းပၢၼ်းတၢပ်ႈလွႆ ၸိူဝ်းၼၼ်ႉ ၺႃးလိၼ်ၵူၼ်ႇတဵင် လူႉတၢႆမၢတ်ႇၸဵပ်းၸွမ်းၵေႃႈၼမ်။ ထိုင်မိူဝ်ႈလဵဝ် ၶေႃႈမုလ်းပႆႇလႆႈႁူႉတႅတ်ႈ တေႃး”- ဝႃႈၼႆ။

တေႃႇထိုင် ဝၼ်းမိူဝ်ႈၼႆႉ တီႈၵၢတ်ႇတႃႈလေႃႉ၊ ၵၢတ်ႇဝၢၼ်ႈၵွင်း၊ ပွၵ်ႉပုင်းထုၼ် ၊ ပွၵ်ႉသၼ်သၢႆး၊ ပွၵ်ႉမႄႈၶၢဝ် ၸိူဝ်းၼႆႉ တိုၵ်ႉလႆႈပႂ်ႉတူၺ်းငဝ်းလၢႆးၼမ်ႉဝႆႉယူႇ တႃႇသေႇ။ ၵူၼ်းမိူင်း ပႆႇၸၢင်ႈၽဵဝ်ႈ ၶီႈၵူမ်ႇ ၶီႈငႂ်ႈလႄႈ ပႆႇၸၢင်ႈမႄးပူၵ်းပွင် ႁိူၼ်းယေး ၸဝ်ႈၵဝ်ႇၶိုၼ်းလႆႈလီလီ။ ၵမ်ႈၽွင်ႈ ၼမ်ႉယွမ်းဢိတ်း ၼိုင်ႈၵေႃႈ ၼႅတ်ႈၽဵဝ်ႈ။ မၢင်ၸိူဝ်း ပတ်းၽဵဝ်ႈယင်းပႆႇယဝ်ႉ ၼမ်ႉပေႃးမႃးလုပ်ႇထႅင်ႈ ၼႆယဝ်ႉ။  

ၶၢဝ်းတၢင်း ၼမ်ႉထူမ်ႈႁႅင်းၼႆႉ ၵူၼ်းမိူင်းတႃႈၶီႈလဵၵ်း မီးလွင်ႈလူႉသုမ်းၼမ် ႁိူၼ်းယေး ရူတ်ႉၵႃးၶမ်ဝႆႉ ၸွမ်းၵူမ်ႇၸွမ်းဢုင်ၼပ်ႉႁူဝ်သိပ်း၊ ပၢမ်ႉၼမ်ႉမၼ်းဢၼ်ယူႇၸွမ်း ပိုၼ်ႉတီႈတႅမ်ႇ ၸိူဝ်းၼၼ်ႉၵေႃႈ လူႉယႂ်ႇသုမ်းၼမ်။ ဝၢႆးၼမ်ႉထူမ်ႈယဝ်ႉ ၵူၼ်းမိူင်း တေလႆႈႁႃ တႄႇတင်ႈၸၢတ်ႈပၢၼ်မႂ်ႇ ၶိုၼ်းမူတ်း ယဝ်ႉၼႆ ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼင်ႇၼႆ –

“လွင်ႈလူႉသုမ်းတႄႉ ၼမ်ဝႃႈၼမ်။ ပၢမ်ႉၼမ်ႉမၼ်း ၸိူဝ်းယူႇတီႈလိၼ်တႅမ်ႇ ၸိူဝ်းၼၼ်ႉတႄႉ သုမ်းၼမ်ၼႃႇ။ ပၢမ်ႉ ၼမ်ႉမၼ်း ယႂ်ႇတီႈၼိုင်ႈတႄႉ လိၼ်ၵူၼ်ႇတဵင်သႂ်ႇလူႉၵွႆမူတ်း။ ရူတ်ႉၵႃး ၵႃႈယႂ်ႇၶၼ် လူင်ၵေႃႈ ၺႃးၼမ်ႉထူမ်ႈလူႉၵွႆၼမ်။ ပေႃးၼပ်ႉသွၼ်ႇတူၺ်းတႄႉ လူႉသုမ်းၵႂႃႇ မွၵ်ႈၶၼ်ငိုၼ်း သႅၼ်ႁွမ်း 3 မိုၼ်ႇသႅၼ် ငိုၼ်းထႆးၼႆႉဢေႃႈ”- ဝႃႈၼႆ။  

ဝၢႆးၼမ်ႉၼွင်းထူမ်ႈႁႅင်းယဝ်ႉ တႄႇဢဝ်ဝၼ်းတီႈ 11 မႃးထိုင်မိူဝ်ႈၼႆႉ ၸုမ်းၸွႆႈထႅမ် တူင်ႇဝူင်းၵူၼ်း ၼႂ်းပိုၼ်ႉတီႈ လူင်းၸွႆႈထႅမ် ၵူတ်ႇထတ်းတူၺ်းၸွမ်းႁိမ်းႁွမ်း လိၼ်လွႆၵူၼ်ႇတဵင် ၸိူဝ်းၼၼ်ႉ သွၵ်ႈႁၼ်ၶၢပ်ႈတူဝ်တၢႆ ၵူၼ်းမိူင်း 15 ၵေႃႉ။ ၵူၼ်းႁိူၼ်းလဵဝ်ၵၼ် မၢင်ၵေႃႉ ႁၢႆဝႆႉၵေႃႈ တိုၵ်ႉမီး – သိုဝ်ႇၶၢဝ်ႇ ၼႂ်းပိုၼ်ႉတီႈ တႃႈၶီႈလဵၵ်း ႁၢႆးငၢၼ်းဝႆႉၼင်ႇၼႆ။

တီႈဝဵင်းတႃႈၶီႈလဵၵ်းၼႆႉ သင်ဝႃႈၼမ်ႉၼွင်းမႃးႁႅင်း ၾၢႆႇၵဵဝ်ႇၶွင်ႈၶဝ် ၵႆႉတတ်းပႅတ်ႈၾႆးၾႃႉ၊ လႅင်း ၾူၼ်း ၸိူဝ်းၼႆႉလႄႈ ၵူၼ်းမိူင်းယၢပ်ႇၽိုတ်ႇႁႅင်း ဢမ်ႇၸၢင်ႈတူမ်ႈႁုင် ၶဝ်ႈၼမ်ႉတၢင်းၵိၼ်သင်၊ တိတ်းတေႃႇၵၼ်တင်းၵူၼ်းၾၢႆႇ ၼွၵ်ႈၵေႃႈ ဢမ်ႇလႆႈ။ သင်ပဵၼ်တၢင်းၾင်ႇထႆး (မႄႈသၢႆ) တႄႉ လူင် ပွင်ၸိုင်ႈထႆးၶဝ် ၸႂ်ႉၶိူင်ႈမိၼ်မႅင်းမီႈ တေႃႉၶၢႆႉ ၵူၼ်းမိူင်းၶိုတ်းတၼ်း၊ သူင်ႇၶဝ်ႈၼမ်ႉတၢင်းၵိၼ်ထိုင်တီႈ ၸွႆႈထႅမ်လႆႈထိုင်တီႈထိုင်လႅၼ်။ ၼုမ်ႇယိင်း ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပေႃးဝႃႈၼမ်ႉၼွင်းမႃးယဝ်ႉၵေႃႈ မၼ်းယၢပ်ႇၵႂႃႇၵူႈလွင်ႈယဝ်ႉ လႅင်းၾူၼ်းၵေႃႈၵွႆ၊ ၾႆးၾႃႉၵေႃႈမွတ်ႇ။ ပီႈၼွင်ႉၵၼ် ၵေႃႈ ဢမ်ႇၸၢင်ႈၵႂႃႇတူၺ်းၵၼ်။ ယူႇၼႂ်းဝဵင်းလဵဝ်ၵၼ်ၵေႃႈ ပေႃးၼမ်ႉထူမ်ႈမႃးၼႆ ဢမ်ႇ ၸၢင်ႈၵႂႃႇႁႃၵၼ်ငၢႆႈငၢႆႈ”- ဝႃႈ ၼႆ။  

ၼႂ်းဝၼ်းတီႈ 22/09/2024 ၼႆႉ ပလိၵ်ႈမၢၼ်ႈလႄႈ ႁွင်ႈၵၢၼ် ၾၢႆႇလိူမ်လႆႇ၊ ၸုမ်းပျီႇတူႉၸိတ်ႉတႂ်ႈ  သိုၵ်းမၢၼ်ႈ ယိုတ်းမိူင်းၶဝ် လူင်းပိုၼ်ႉတီႈသေ ၸွႆႈၽဵဝ်ႈၵူမ်ႇဢုင် ၸိူဝ်းၼႆႉ ပၼ်ယူႇသေတႃႉ ႁႅင်းၵူၼ်း၊ ၶိူင်ႈမႆႉၶိူင်ႈမိုဝ်း ဢမ်ႇတဵမ်ထူၼ်ႈလႄႈ တေႃႉတႄႉလူင်းပိုၼ်ႉတီႈ ဢဝ်ၼႃႈဢဝ်တႃၵူၺ်း ဢမ်ႇ ၵႄႈလိတ်ႈပၼ်ႁႃသင်လႆႈတႄႉတႄႉ။ ဢွင်ႈတီႈ ဢၼ်ၵူမ်ႇဢုင် ယုၵ်းယၢၵ်း ၵွင်ဝႆႉ ပဵၼ်ပုမ်ႇပဵၼ်လွၼ် ၸိူဝ်းၼၼ်ႉၵေႃႈ ပႆႇၸၢင်ႈၽဵဝ်ႈလႆႈၼႆ ၵူၼ်းပိုၼ်ႉတီႈလၢတ်ႈ။

တႃႇၵႄႈလိတ်ႈပၼ်ႁႃ လွင်ႈၽေးၼမ်ႉသၢႆထူမ်ႈၼႆႉသေ ၽူႈမီးပုၼ်ႈၽွၼ်းၾင်ႇထႆး – ၾင်ႇမၢၼ်ႈ လႆႈႁူပ်ႉထူပ်းဢုပ်ႇ ဢူဝ်းၵၼ် မိူဝ်ႈဝၼ်းတီႈ 20/09/2024 ၼၼ်ႉဝႃႈ တေပၢၵ်ႈပႅတ်ႈႁိူၼ်းယေးဢၼ်ၶႂၢၵ်ႈ ၼႃႈလိၼ် ထိုင်ၼႂ်းႁွင်ႈၼမ်ႉသၢႆတင်းသွင်ၾၢႆႇ။ ဝၢင်းႁိူၼ်းယေး ဢၼ်ပူၼ်ႉၶဝ်ႈၵႄးၼမ်ႉသၢႆ မီး 16 ဝၢင်း၊ တိုၵ်းလင်ယႂ်ႇလင်လူင် ဢမ်ႇယွမ်း 8 လင်လႄႈ ထႅင်ႈလၢႆတီႈ ၸွမ်းသၢပ်ႇႁိမ်းၼမ်ႉသၢႆ။

ၾင်ႇမၢၼ်ႈၼႆႉ တင်းမူတ်း မီး 33 တီႈ၊ ၾင်ႇထႆး မီး 45 တီႈ ဢၼ်တေလႆႈပၢၵ်ႈပႅတ်ႈၼႆႉ ၾၢႆႇပိုၼ်ၽၢဝ်ႇ တႂ်ႈသိုၵ်းမၢၼ်ႈ တီႈဝဵင်းတႃႈၶီႈလဵၵ်း (ရှမ်းအရှေ့သတင်းမဏ္ဍိုင်) ႁၢႆးငၢၼ်းဝႆႉၼင်ႇၼႆ။