သိုၵ်းမၢၼ်ႈ ၵႂႃႇလဵပ်ႈႁဵၼ်း ဢွင်ႈတီႈႁဵတ်းဢွၵ်ႇၶိူင်ႈၻရူၼ်ႊ တီႈမိူင်းၶႄႇ

ၸွမ်သိုၵ်းလူင် တိၼ်ႇဢွင်ႇသၢၼ်း ၽွင်းလူင်ၾၢႆႇၵႅတ်ႇၶႄ သိုၵ်းမၢၼ်ႈ ႁွတ်ႈထိုင်တီႈ ဝဵင်းပေႊၵျိၼ်း မိူင်းၶႄႇသေ ၵႂႃႇ ဢႅဝ်ႇလႄႇလဵပ်ႈႁဵၼ်း တီႈၶွမ်ႊပၼီႊ ႁဵတ်းဢွၵ်ႇၶိူင်ႈမိၼ်ၻရူၼ်ႊလႄႈ ၶိူင်ႈၵွင်ႈၵၢင်ႇ ဢၼ်ၸႂ်ႉတိုဝ်း ၾၢႆႇတၢင်းၵၢင်ႁၢဝ် ၸိူဝ်းၼႆႉ။

သိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇ ၼႂ်းဝၼ်းတီႈ 17/09/2024 ၼႆႉဝႃႈ လႆႈၵႂႃႇဢႅဝ်ႇလႄႇလဵပ်ႈတူၺ်း လွင်ႈႁဵတ်းဢွၵ်ႇ ၶိူင်ႈမိၼ်ၻရူၼ်ႊ ဢၼ်ႁၢမ်းၵူၼ်းႁေႃႈ၊ ၽႅၼ်ၵၢၼ်သိုၵ်း ဢၼ်ၸႂ်ႉဢီႊလႅတ်ႊထရေႃႊၼိတ်ႊ၊ ၶိူင်ႈၵွင်ႈၵၢင်ႇလႄႈ ပၢႆးပၺ်ႇၺႃႇ ၾၢႆႇၵႅတ်ႇၶႄ သဵၼ်ႈတၢင်းၵၢင်ႁၢဝ် ၸိူဝ်းၼႆႉ – ဝႃႈၼႆ။

သိုၵ်းမၢၼ်ႈၼႆႉ မိူဝ်ႈဝၼ်းတီႈ 13 လိူၼ်သႅပ်ႊထႅမ်ႊပိူဝ်ႊၼၼ်ႉၵေႃႈ ၵႂႃႇၶဝ်ႈႁူမ်ႈ ပေႊၵျိၼ်းသျႅၼ်ႊၵျႅၼ်း ၾူဝ်ႊရမ်ႊ ပွၵ်ႈၵမ်း (11) တီႈဝဵင်းပေႇၵျိၼ်း မိူင်းၶႄႇ။ ဝၢႆးၼၼ်ႉ ၸင်ႇၵႂႃႇဢႅဝ်ႇလႄႇလဵပ်ႈႁဵၼ်း တီႈၶွမ်ႊပၼီႊ ႁဵတ်းဢွၵ်ႇၶိူင်းယိပ်းၵွင်ႈၵၢင်ႇ – ဝႃႈၼႆ။

ပေႊၵျိၼ်း သျႅၼ်ၵျႅၼ်းၾူဝ်ႊရမ်ႊ ပွၵ်ႈၵမ်း (11) ၼႆႉ မီးၽွင်းလူင်ၾၢႆႇၵႅတ်ႇၶႄ တီႈၸိုင်ႈမိူင်း 100 ပၢႆလႄႈ ၽူႈတၢင်တူဝ် လၢႆၸိုင်ႈမိူင်း ၶဝ်ႁူမ်ႈ 1,800 ပၢႆ – ၼႆယဝ်ႉ။

ၶွမ်ႊပၼီႊ ႁဵတ်းဢွၵ်ႇၶိူင်ႈမိၼ်မိူင်းၶႄႇ Aviation Industry Corporation of China (AVIC) ၼႆႉ ၶၢႆပၼ်ၶိူင်ႈမိၼ်၊ ၶိူင်ႈယိပ်းၵွင်ႈၵၢင်ႇ တီႈသိုၵ်းမၢၼ်ႈၼႆ – ၸုမ်း Justice For Myanmar တင်း Info Birmanie ဢွၵ်ႇၽိုၼ်လိၵ်ႈႁၢႆးငၢၼ်းဝႆႉ မိူဝ်ႈဝၼ်းတီႈ 16 ၼႆႉ ၼင်ႇၼႆ။

ၽိုၼ်လိၵ်ႈႁၢႆးငၢၼ်းၼၼ်ႉ သႂ်ႇၸိုဝ်ႈဝႆႉဝႃႈ AIRBUSTED ၼႆသေ ၼႂ်းၼၼ်ႉ တႅမ်ႈဝႆႉပႃးဝႃႈ ၶိူင်ႈမိၼ် ဢၼ်သိုၵ်းမၢၼ်ႈ ဢဝ်ၸႂ်ႉတိုဝ်း ပွႆႇမၢၵ်ႇသႂ်ႇၵူၼ်းမိူင်း မိူၼ်ၼင်ႇ ၶိူင်ႈမိၼ်တိုၵ်း၊ ၶိူင်းမိၼ် တေႃႉသူင်ႇ ၶဝ်ႈၼမ်ႉတၢင်းၵိၼ် ၼႂ်းပၢင်တိုၵ်း ၸိူဝ်းၼႆႉ ပဵၼ်ၶွမ်ႊပၼီႊ ႁဵတ်းဢွၵ်ႇၶိူင်ႈမိၼ် မိူင်းၶႄႇ (AVIC) ၶၢႆပၼ် သိုၵ်းမၢၼ်ႈ။ လိူဝ်ၼၼ်ႉ ၸွႆႈထႅမ်ပၼ်ဝႆႉပႃး လွၵ်းလၢႆးထိင်းသိမ်းလႄႈ မႄးၶိူင်ႈမိၼ် ၸိူဝ်းၼႆႉ – ဝႃႈၼႆ။

ၾၢႆႇၼိုင်ႈၵေႃႈ ၼႂ်းဝၼ်းတီႈ 05/09/2024 ၼၼ်ႉ ၸုမ်းတူင်ႉၼိုင်တူင်ႇဝူင်းၵူၼ်း မိူင်းမၢၼ်ႈ 276 ၸုမ်း ႁူမ်ႈၵၼ်သေ ဢွၵ်ႇလိၵ်ႈတုၵ်းယွၼ်း ႁႂ်ႈမိူင်းၶႄႇၵိုတ်းလိုဝ်ႈ လွင်ႈၸွႆႈထႅမ်လႄႈ ၵႅတ်ႇၶႄႁႄႉၵင်ႈပၼ် သိုၵ်းမၢၼ်ႈ၊ ၸွမ်းၼင်ႇၵၢၼ်မိူင်းသေ ႁႂ်ႈဢဝ်လိူင်ႈၵႂႃႇပၼ် – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။