လိၼ်ၵူၼ်ႇတဵင်တၢင်း တႃႈသၢင်း – မိူင်းပၼ်ႇ ဢမ်ႇယွမ်း 10 တီႈ

ၾူၼ်တူၵ်းႁႅင်း ထပ်းၵၼ်လၢႆဝၼ်းသေ လိၼ်ၵူၼ်ႇ – တူၼ်ႈမႆႉႁၵ်းလူမ်ႉတဵင်းတၢင်း ၼႂ်းၵႄႈတႃႈသၢင်း – မိူင်းပၼ်ႇ ႁဵတ်းႁႂ်ႈရူတ်ႉၵႃး ဢမ်ႇၸၢင်ႈၵႂႃႇမႃး ၵိုတ်းၶမ်ဢမ်ႇယွမ်း 60 လမ်း။

ဝၼ်းတီႈ 27/08/2024 တႄႇဢဝ် ယၢမ်းၵၢင်ၼႂ် တေႃႇထိုင် ၵၢင်ၶိုၼ်းလိုၵ်း ရူတ်ႉၵႃး ၵူၼ်းမိူင်းဢွၵ်ႇတႃႈပႆ တၢင်း ဢမ်ႇၸၢင်ႈၵႂႃႇမႃး ဢွၼ်ၵၼ်ၵိုတ်းၶမ်ဝႆႉၸွမ်းသဵၼ်ႈတၢင်းၼမ် ယွၼ်ႉလိၼ်ၵူၼ်ႇ – တူၼ်ႈမႆႉႁၵ်း လူမ်ႉတဵင်တၢင်းၼႂ်း ၵႄႈတႃႈသၢင်း – မိူင်းပၼ်ႇ ၸိုင်ႈတႆးပွတ်းၸၢၼ်း ဢမ်ႇယွမ်း 10 တီႈ ၼႆယဝ်ႉ။

ၵူၼ်းဢွၵ်ႇတၢင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ဝၼ်းတီႈ 26 ၼၼ်ႉ ၾူၼ်တူၵ်းႁႅင်း တင်းၶိုၼ်းသေ ထိုင်မႃး ဝၼ်းတီႈ 27 ၼႆႉ ဢဝ်လိၼ်ၵူၼ်ႇ – တူၼ်ႈမႆႉ ႁၵ်ႈလူမ်ႉတဵင်ၸွမ်းတၢင်း ဢမ်ႇယွမ်း 10 တီႈ။ ရူတ်ႉၵႃး ၵူၼ်းမိူင်းၶမ်ၸွမ်းတၢင်း ဢမ်ႇယွမ်း 60 လမ်း။ ႁဵတ်းႁႂ်ႈၵူၼ်းဢွၵ်ႇတႃႈပႆတၢင်း ထူပ်းတၢင်းယၢပ်ႇၽိုတ်ႇႁႅင်း။ ႁဝ်းၶႃႈ မႃးၵိုတ်းၶမ်ၼႂ်းတၢင်းၼႆႉ တင်ႈတႄႇၵၢင်ဝၼ်း တေႃႇထိုင်ၵၢင်ၶိုၼ်းလိုၵ်းဢေႃႈ”- ဝႃႈၼႆ။

မိူၼ်ၼႆ ၼင်ႇၵဝ်ႇ ဝၼ်းတီႈ 27 ယၢမ်းၵၢင်ၼႂ် လိၼ်ၵူၼ်ႇတဵင်တၢင်း ၼႂ်းၵႄႈပၢင်သၢင်း – မိူင်းပွၵ်ႉ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းဝႃႉ UWSA ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇ ၼၼ်ႉၵေႃႈ ယွၼ်ႉၾူၼ်တူၵ်းႁႅင်း ထပ်းၵၼ်လၢႆဝၼ်း ဝႃႈၼႆ။

လိၼ်ၵူၼ်ႇတဵင်တၢင်း ၼႂ်းၵႄႈပၢင်သၢင်း – မိူင်းပွၵ်ႉၼႆႉ ပဵၼ်သဵၼ်ႈတၢင်း ဢၼ်ၵၢႆႇၸူးၵၼ်ဝႆႉ မိူင်းပွၵ်ႉ၊ မိူင်းၽႅၼ်လႄႈ ပၢင်သၢင်း ၸိူဝ်းၼႆႉ။