ဝၼ်းတီႈ 12/08/2024 ယၢမ်းၵၢင်ၼႂ်ၸဝ်ႉ 1:50 မိၼိတ်ႉၼၼ်ႉ ၶိူင်ႈမိၼ်မႅင်းမီႈ လမ်းၼိုင်ႈ ၽႃႇသႂ်ႇႁူင်းႁႅမ်း Double Tree by Hilton ဢၼ်မီးတီႈဝဵင်းၵၢၼ်ႉၸ်(ကန့်ဇ်မြို့) ၸႄႈတွၼ်ႈၵုၼ်းၸလႅၼ်ႊ (ကွင်းစလန်ပြည်နယ်) ၊ မိူင်းဢေႃႊသတြေႊလီႊယိူဝ်ႊ ၵူၼ်းႁေႃႈၶိူင်ႈမိၼ် လူႉတၢႆထင်တီႈ – ဝႃႈၼႆ။
ဝၢႆးၶိူင်ႈမိၼ်ၽႃႇသႂ်ႇႁူင်းႁႅမ်း ၾႆးမႆႈသေ ၶႅၵ်ႇၸိူဝ်းလိုဝ်ႈသဝ်းဝႆႉတီႈ ႁူင်းႁႅမ်း မွၵ်ႈ 400 ၵေႃႉ လႆႈဢွၼ်ၵၼ်ၶၢႆႉပၢႆႈ။ ယွၼ်ႉႁႅင်းဝႆး ဢၼ်မႃးတုမ်ႉၺႃးႁူင်းႁႅမ်းၼၼ့်သေ ၽတ်ႉလူမ်းၶိူင်ႈမိၼ် မႃးတူၵ်းသႂ်ႇ ၼႂ်းၼွင်လုၺ်းၼမ်ႉ တင်းသဵၼ်ႈတၢင်းၵူၼ်းပႆၵႂႃႇမႃး ဢၼ်မီးတီႈၼႂ်းႁူင်းႁႅမ်း။
ယွၼ်ႉပိူင်ပဵၼ်ၼၼ်ႉသေ ထဝ်ႈယိင်း ဢႃယုမွၵ်ႈ 70 လႄႈ 80 ပီ သွင်ၵေႃႉ ဢၼ်လိုဝ်ႈသဝ်းဝႆႉ တီႈႁူင်းလႅမ်းၼၼ်ႉ တူၵ်းၸႂ်ႁႅင်းပဵၼ်လူမ်းမဝ်းလိုမ်းတူဝ်သေ လႆႈဢဝ်တူဝ် သူင်ႇဝႆႉတီႈႁူင်းယႃ ဝႃႈၼႆ။
ၶွမ်ႊပၼီႊ Nautilus Aviation ဢၼ်ႁဵတ်းၵၢၼ် ၶၢတ်ႈၶိူင်ႈမိၼ်ပၼ်တၢင်းလမ်းၼၼ်ႉ ပိုၼ်ၽၢဝ်ႇဝႃႈ – ၵူၼ်းႁေႃႈၶိူင်ႈမိၼ်ၼၼ်ႉ ဢမ်ႇလႆႈၶႂၢင်ႉသေႁေႃႈၵႂႃႇ ဝႃႈၼႆ။ ၵွၼ်ႇၼႃႈ ၶိူင်ႈမိၼ်ပႆႇၽႃႇသႂ်ႇႁူင်းႁႅမ်းၼၼ်ႉ ၶိူင်ႈမိၼ်ၼၼ်ႉ မိၼ်ၵႂႃႇမႃးတႅမ်ႇတႅမ်ႇ ႁိမ်းႁူင်းႁႅမ်းမွၵ်ႈ 2 ၵမ်းၼႆ – ၵူၼ်းဢၼ်ႁၼ် ၸွမ်းပိူင်ပဵၼ်ၼၼ်ႉ လၢတ်ႈၼင်ႇၼႆ။
ၵဵဝ်ႇလူၺ်ႈလွင်ႈၼႆႉသေ ပလိၵ်ႈၶဝ်တိုၵ်ႉၸွပ်ႇထၢမ် လွင်ႈပိူင်ပဵၼ်ဝႆႉယူႇ။ ဝဵင်းၵၢၼ်ႉၸ်(ကန့်ဇ်မြို့) ဢၼ်မီးၼႂ်းၸႄႈတွၼ်ႈ ၵုၼ်းၸလႅၼ်ႊ (ကွင်းစလန်ပြည်နယ်) ပွတ်းႁွင်ႇၼႆႉ ပဵၼ်ဢွင်ႈတီႈၶႅၵ်ႇဢႅဝ်ႇလႄႇတွင်ႈတဵဝ်းၼမ် တီႈၼိုင်ႈ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ