မိူင်းၶႄႇ တႄႇသင်ႇပိၵ်ႉလၢၼ်ႇလႅၼ်လိၼ်တႆး – ၶႄႇ တၢင်းမူႇၸေႊ – ၼမ်ႉၶမ်းလႄႈ ဝဵင်းလၢဝ်ႇၵၢႆး ဢမ်ႇပၼ်ရူတ်ႉၵႃး တၢင်ႇၶူဝ်းၵုၼ်ႇသိၼ်ၵႃႉလႄႈ ၵူၼ်းၶဝ်ႈဢွၵ်ႇၵႂႃႇမႃး ပိၵ်ႉဝႆႉၸူဝ်ႈၶၢဝ်း ဝႃႈၼႆ။

ၵဵတ်ႉလၢၼ်ႇ ဢၼ်ၺႃးၶႄႇႁၢမ်ႈၼႆႉတႄႉ ပဵၼ်ၵဵတ်ႉလၢၼ်ႇ ၶျိၼ်းသူၺ်ႇႁေႃႇ(ၼမ်ႉၽႃႈ) ဢၼ်မီးတီႈ ၸႄႈဝဵင်းလၢဝ်ႇၵၢႆး၊ ၵဵတ်ႉလၢၼ်ႇ တီႈပၢင်သၢႆးလႄႈ ၵျိၼ်းသၢၼ်းၵျေႃႉ ဝဵင်းမူႇၸေႊ ၊ ၵဵတ်ႉလၢၼ်ႇ ၼွင်တဝ်း ၸႄႈဝဵင်းၼမ်ႉၶမ်း ၸိူဝ်းၼႆႉ။

ၵဵတ်ႉလၢၼ်ႇလႅၼ်လိၼ် ၵိဝ်ႇၵူတ်ႉပၢင်ႇသၢႆး ၼႂ်းၸႄႈဝဵင်းမူႇၸေႊ ဢၼ်သိုၵ်းၵဝ်ႈၵၢင်ႉ MNDAA ၵုမ်းဝႆႉ ၼၼ်ႉတႄႉ ၶႄႇသင်ႇပိၵ်ႉဝႆႉ ၸဵမ်မိူဝ်ႈႁူဝ်လိူၼ်ၵျူႊလၢႆႊၼႆႉမႃး၊ ယၢမ်းလဵဝ် လႆႈမႃးၶၢဝ်းတၢင်း 3 ဝူင်ႈယဝ်ႉ ပႆႇပိုတ်ႇပၼ်ၶိုၼ်း။

တီႈၵဵတ်ႉလၢၼ်ႇ ၼွင်တဝ်း ဢၼ်သိုၵ်းတဢၢင်း TNLA ၵုမ်းဝႆႉၼၼ်ႉတႄႉ တႄႇပိၵ်ႉမႃးၼႂ်းဝူင်ႈထီႉ 3 ၼႆႉၵူၺ်း။ လွင်ႈပိၵ်ႉၵဵတ်ႉလၢၼ်ႇ ၸိူဝ်းၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇၸူး ၽူႈၶၢၼ် ပၢၵ်ႇ ၸုမ်းၵဵဝ်ႇၶွင်ႈယူႇသေတႃႉ ၵပ်းသိုပ်ႇဢမ်ႇလႆႈ။

ၵဵတ်ႉလၢၼ်ႇၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ) ဢၼ်သိုၵ်းၵဝ်ႈၵၢင်ႉၵုမ်းဝႆႉ ၸဵမ်မိူဝ်ႈႁၢင်ပီ 2023 ၼၼ်ႉၵေႃႈ – ဝၢႆးလင် ပၢင်ဢုပ်ႇၵုမ် ၵမ်းထူၼ်ႈ 4 တီႈၶုၼ်ႊမိင်ႊ မိူင်းၶႄႇယဝ်ႉ သိုၵ်းၵဝ်ႈၵၢင်ႉ MNDAA ၶိုၼ်း ပိုတ်ႇပၼ်ၶိုၼ်းမိူဝ်ႈဝၼ်းတီႈ 11 လိူၼ်မၢတ်ႊၶျ် ပီၼႆႉၵမ်းၼိုင်ႈယူႇ။

ငိုၼ်းၶဝ်ႈတီႈၵဵတ်ႉလၢၼ်ႇၼၼ်ႉ 70 ပိူဝ်ႊသႅၼ်ႊၶဝ်ႈၼႂ်း ၸုမ်းဢူၺ်းလီပွတ်းႁွင်ႇ 3 ၸုမ်း (တပ်ႉသိုၵ်း ၵဝ်ႈၵၢင်ႉၵဵပ်းဝႆႉ)၊ 30 ပိူဝ်ႊသႅၼ်ႊပၼ်သိုၵ်းမၢၼ်ႈ ၶၢဝ်ႇၼႂ်းပိုၼ်ႉတီႈလၢတ်ႈမႃး ၸိူင်ႉၼၼ်သေတႃႉ တင်း သွင်ၸုမ်းတႄႉ ဢမ်ႇမီးလွင်ႈပိုၼ်ၽၢဝ်ႇသင်မႃး ပဵၼ်တၢင်းၵၢၼ်။   မိူဝ်ႈလိူၼ်ၵျုၼ်ႊပူၼ်ႉမႃးတႄႉ ယူႇတီႈၶွမ်ႊမတီႊငူပ်ႉငီႉဢုပ်ႇၵုမ် လွင်ႈ ၵၢၼ်မိူင်း မိူင်းႁူမ်ႈတုမ် FPNCC ဢၼ်ၸုမ်းဝႃႉဢွၼ်ၼမ်းဝႆႉၼၼ်ႉ ႁွင်ႉဢဝ်လုၵ်ႈၸုမ်းတင်း 7 ၸုမ်းသေ ပၼ်ပၢင်သွၼ် လၢႆးၶိုင်ပွင် ၸတ်းၵၢၼ်ၵႃႉၶၢႆ ၸွမ်းလႅၼ်လိၼ်လႄႈ ပိုၼ်ႉတီႈၼႃႈလိၼ်ႁၢင်ႇၵႆတင်းၾင်ႇပၢင်ႇလၢႆႇ။ ပၢင်သွၼ် ၼႆႉ ပၼ်ၵႂႃႇၶၢဝ်းတၢင်း 2 ဝူင်ႈ။