ၸဝ်ႈသိုၵ်းလူင် ဢွင်ႇမိူင်း လူႉသဵင်ႈၵၢမ်ႇ လူၺ်ႈတၢင်းပဵၼ်လိူတ်ႈၶိုၼ်ႈ

ၸဝ်ႈသိုၵ်းလူင် ဢွင်ႇမိူင်း ၽူႈၵိူဝ်းၵုမ် RCSS/SSA လူႉသဵင်ႈၵၢမ်ႇသုတ်းမုၼ် လူၺ်ႈတၢင်းပဵၼ်လိူတ်ႈၶိုၼ်ႈ ၽွင်း ဢႃယုလႆႈ 70 ပီပၢႆ။

ဝၼ်းတီႈ 05/06/2018 ယၢမ်းၵၢင်ၼႂ်မွၵ်ႈ 10:30 မူင်းၼၼ်ႉ ၸဝ်ႈသိုၵ်းလူင် ဢွင်ႇမိူင်း ၽူႈၵိူဝ်းၵုမ် ၶွင်ႇသီႇဢဝ် ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လူႉသဵင်ႈၵၢမ်ႇသုတ်းမုၼ် တီႈႁူင်းယႃငဝ်ႈၸိုင်ႈလွႆတႆးလႅင်း လူၺ်ႈ တၢင်းပဵၼ်လိူတ်ႈၶိုၼ်ႈလႄႈ တၢင်းပဵၼ်ႁူဝ်ၸႂ် ဝႃႈၼႆ။

လုၵ်ႈၼွင်ႉပွင်ႈပၢႆ ၸဝ်ႈသိုၵ်းလူင် ဢွင်ႇမိူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈႁဝ်းၶႃႈၼႆႉ ပဵၼ်ၵူၼ်းလီ မေႃသင်ႇသွၼ်လုၵ်ႈၼွင်ႉပွင်ႈပၢႆ။ မေႃသႂ်ႇၸႂ်တူၺ်းထိုင်လူလွမ်လုၵ်ႈၼွင်ႉ။ သင်မၼ်းၸဝ်ႈပွင်ႉလုၵ်ႈၼွင်ႉၵေႃႈ မေႃၸီႉသင်ႇႁႃတၢင်းဢွၵ်ႇပၼ်လုၵ်ႈၼွင်ႉပွင်ႈပၢႆ ၵမ်းလဵဝ်။ မၼ်းၸဝ်ႈ ၼႆႉ ယွၼ်ႉဢႃယုယႂ်ႇသေ လႆႈၵိုတ်း ယင်ႉၵၢၼ်သိုၵ်းဝႆႉသေ လႆႈပဵၼ်တီႈၵိူဝ်းၵုမ် RCSS/SSA” ဝႃႈၼႆ။

ၸဝ်ႈသိုၵ်းလူင် ဢွင်ႇမိူင်းၼႆႉ ၵွၼ်ႇပႆႇၵိုတ်းလိုဝ်ႈၵၢၼ်သိုၵ်းၼၼ်ႉ မၼ်းၸဝ်ႈႁပ်ႉၼႃႈတီႈပုၼ်ႈၽွၼ်း ၾၢႆႇၽွင်းငမ်း ပၢင်သဝ်း ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၶၢဝ်းတၢင်း 10 ပီပၢႆ ဝႃႈၼႆ။

တေႃႈလဵဝ် ၶၢပ်ႈတူဝ်တၢႆ ၸဝ်ႈသိုၵ်းလူင် ဢွင်ႇမိူင်းၼႆႉ လႆႈဝႆႉတီႈငဝ်ႈၸိုင်ႈလွႆတႆးလႅင်း ဝႃႈၼႆ။