ၼႂ်းသွင်သၢမ်ဝၼ်းၼႆႉ လၢႆၸိုင်ႈမိူင်း ၼႂ်းၸဵင်ႇၸၢၼ်းဝၼ်းဢွၵ်ႇၵုၼ်ၶဵဝ်ဢေႊသျႃႊ ႁႅင်းလူမ်း မႆႈပုင်ႈသုင်ႁႅင်း မိူၼ် ၼင်ႇ မိူင်းထႆး ၵဵင်းမႂ်ႇ – ၵုင်းထဵပ်ႈ သုင်ထိုင် 42 တီႊၵရီႊ သႄႊလ်သီးယႅတ်ႉသ်၊ တီႈဝဵင်းလူင် မၼီႊလႃႊ ၸိုင်ႈမိူင်းၾိလိပ်ႉပိၼ်းသ်ၵေႃႈ မႆႈလိူဝ်ႁႅင်းလႄႈ လူင်ပွင်ၸိုင်ႈ သင်ႇပိၵ်ႉ ႁူင်းႁဵၼ်းဝႆႉ ၼႂ်းပတ်းပိုၼ်ႉၸိုင်ႈမိူင်းၶဝ် တႃႇႁူင်းႁဵၼ်း ၼပ်ႉႁူဝ်ပၢၵ်ႇလင်။

ၵူၺ်းၵႃႈ တီႈဢၼ်မီးဢိၼ်ႊထိူဝ်ႊၼႅတ်ႉ လႆႈလီၼၼ်ႉ ႁႂ်ႈႁဵၼ်းသွၼ်ၵၼ် တင်းဢွၼ်ႊလၢႆႊ ဝႃႈၼႆ။

ဝၼ်းပုတ်ႉဝၼ်းၽတ်းၼႆႉ လၢႆၸႄႈဝဵင်း ၼႂ်းမိူင်းၾိလိပ်ႉပိၼ်ႊသ် ႁႅင်းလူမ်းမႆႈ တေပုင်ႈထိုင် 43-44 လၢမ်းဝႆႉၼင်ႇ ၼႆ။

တီႈမိူင်းထႆးၵေႃႈ ၼွၵ်ႈလိူဝ် ႁႅင်းလူမ်းမႆႈသုင်ႁႅင်း မီး 42 တီႊၵရီႊယဝ်ႉ လူမ်းဝူၺ်ႇႁင်ႈ မီးၾုၼ်ႇ ၵႂၼ်းၼႃၵေႃႈ ႁၢႆႉႁႅင်း။ ၵူၼ်းမိူင်းဢွၼ်ၵၼ်ပဵၼ် ဝတ်း ဢႆ ထူၺ်ႈၸႂ်ယၢပ်ႇ ၊ ၵမ်ႈၽွင်ႈ ၶူႈလင်တႅၵ်ႇလိူတ်ႈ၊ ၵမ်ႈၽွင်ႈ ထိုင်တီႈလႆႈၶဝ်ႈယူတ်းယႃတူဝ်ၼႂ်းႁူင်းယႃ။

ယဝ်ႉၵေႃႈ ၸိူဝ်းမီးတၢင်းပဵၼ်ပွတ်ႇလႄႈ ၵဵဝ်ႇၵပ်း လွတ်ႇလူမ်းထူၺ်ႈၸႂ်ၼၼ်ႉ ထိုင်တီႈလူႉတၢႆ ၵေႃႈမီး။ ၼႂ်းဝူင်ႈဢွၼ်တၢင်းသုတ်း ၼႂ်းလိူၼ်ဢေႊပရိူဝ်ႊၼႆႉ ႁႂ်ႈၵူၼ်းမိူင်းၾၢင်ႉပၢႆးယူႇလီၵၼ် – ပိုၼ်ၽၢဝ်ႇပၼ်ၾၢင်ႉဝႆႉၼင်ႇၼႆ။

ဢၢင်ႈဢိင် – VOA