ငဝ်ႈၸိုင်ႈလွႆတႆးလႅင်း ၸတ်းပၢင်ပွႆး ဝၼ်းလုၵ်ႉၽိုၼ်ႉ ၸိုင်ႈတႆး ၶွပ်ႈတဵမ် 60 ပီ

ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS / SSA ၸတ်းႁဵတ်းပၢင်ၵႅဝ်ႈ မၢႆတွင်းဝၼ်းလုၵ်ႉၽိုၼ်ႉၵႅတ်ႇ ၶႄဢဝ်ၶိုၼ်းၸိုင်ႈတႆး။

ဝၼ်းတီႈ 21/05/2018 ၶၢဝ်းယၢမ်းၵၢင်ၼႂ်မွၵ်ႈ 09:00 ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆးၸတ်းႁဵတ်း ပၢင်ၵႅဝ်ႈ ဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းၸိုင်ႈတႆး ၶွပ်ႈတဵမ် 60 ပီ။

ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA လၢတ်ႈတီႈၼႂ်းပၢင်ၵႅဝ်ႈဝႃႈ – “ ၼႂ်းဝၼ်းမိူဝ်ႈၼႆႉ ဝၼ်းၵႅတ်ႇၶႄဢဝ်ၶိုၼ်းၸိုင်ႈတႆး ၶွပ်ႈတဵမ် 60 ပီ ယွင်ႈယေႃးဢဝ်ၵုင်ႇမုၼ်ထိုင် ၵေႃႉသိုၵ်းၵေႃႉႁၢၼ်ဢၼ်လႆႈလူႇၼိူဝ်ႉလိူတ်ႈ တိုၵ်းၽူႈၶဵၼ်ၶႂၢၵ်ႈမိူင်းမႃးလႄႈ ယိၼ်းၸူမ်းဢဝ်ၵုင်ႇမုၼ် ပၼ်ႁႅင်းၸႂ်ၵေႃႉသိုၵ်းၵေႃႉႁၢၼ် တႃႇႁၢပ်ႇၵိုတ်ႉၵၢၼ် ၵႂႃႇမိူဝ်းၼႃႈၶၢဝ်းၵႆ ” ဝႃႈၼႆ။

ၼႂ်းပၢင်ၼႆႉ မီးၽူႈယႂ်ႇၵူၼ်းလူင်ၼႂ်းတပ်ႉသိုၵ်းလႄႈ တူဝ်တႅၼ်း ၵူၼ်းမိူင်း၊ တူဝ်တႅၼ်းသင်ၶၸဝ်ႈ မွၵ်ႇလၢတ်ႈ ၶေႃႈၵႂၢမ်း ၊ ဝၢင်းၶူဝ်ႉမွၵ်ႇမွင်ၸႂ်တီႈႁုၼ်ႇႁၢင်ႈၸဝ်ႈသိူဝ်ၶၢၼ်ႇၾႃႉလႄႈ ၸဝ်ႈၵွၼ်းၸိူင်း ၸိူဝ်းၼႆႉ။

ၸၢႆးပီး ၵူၼ်းပဵင်းလူင် ဢၼ်ၵႂႃႇၶဝ်ႈႁူမ်ႈပၢင်ၵႅဝ်ႈလၢတ်ႈဝႃႈ – “ ဢၼ်လႆႈမႃးၶဝ်ႈ ႁူမ်ႈဝၼ်းမိူဝ်ႈၼႆႉ ၵေႃႈမီးတၢင်း ၸူမ်းသိူဝ်းတႄႉၶႃႈ ႁဝ်းၶႃႈမႃးပၼ်ႁႅင်းတပ်ႉသိုၵ်းႁဝ်းၶႃႈဢေႃႈ တေလႆႈဝႃႈ ၼႂ်းဝၼ်းမိူဝ်ႈၼႆႉ ဢမ်ႇဝႃႈၵၢၼ်သိုၵ်း၊ ၵၢၼ်မိူင်း၊ ၵၢၼ်ပၢႆးပၺ်ၺႃ ၼႂ်းတပ်ႉသိုၵ်းႁဝ်းၶိုၼ်ႈယႂ်ႇမႂ်ႇသုင်မႃးလိူဝ်ၵဝ်ႇတႄႉတႄႉၶႃႈ ” ဝႃႈၼႆ။

ပၢင်ၵႅဝ်ႈဝၼ်းလုၵ်ႉၽိုၼ်ႉၵႅတ်ႇၶႄ ဢဝ်ၶိုၼ်းၸိုင်ႈတႆးၼႆႉ လိူဝ်သေ ၸတ်းႁဵတ်းတီႈ ငဝ်ႈၸိုင်ႈလွႆတႆးလႅင်းယဝ်ႉ တီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၵေႃႈၸတ်းႁဵတ်းၼင်ႇၵဝ်ႇ။

ဝၼ်းလုၵ်ႉၽိုၼ်ႉ လိူၼ်မေႊ 21 ဝၼ်းၼႆႉ ၸဝ်ႈၼွႆႉ သေႃးယၼ်ႇတ လႆႈဢွၼ်ႁူဝ်ၵူၼ်းၼုမ်ႇ 30 ၵေႃႉ ၵိၼ်ၼမ်ႉသၸ်ႉၸႃႇ မိူဝ်ႈ 1958 လိူၼ်မေႊ 21 ဝၼ်း တီႈသူပ်းၼမ်ႉၵျွတ်ႈ ၾၢႆႇဢွၵ်ႇၶူင်းတီႈၼိုင်ႈသေ ပူၵ်းတင်ႈတပ်ႉၼုမ်ႇသိုၵ်းႁၢၼ်လုၵ်ႉၽိုၼ်ႉ တႃႇပူတ်းပွႆႇဢဝ်ၶိုၼ်းမိူင်းၸိုင်ႈတႆး ။