လိူၼ်ၼႆႉၵူၺ်း ရူတ်ႉၵႃးၵူၼ်းမိူင်း ၽႃႇၺႃးမၢၵ်ႇ သိုၵ်းမၢၼ်ႈ တီႈၶူဝ်တႃႈတေႈ ဢၼ်ၵၢႆႇၸူးဝႆႉ ၼႂ်းၵႄႈသီႇပေႃႉ – ၼမ်ႉတူႈၼႆႉ သွင်လမ်းယဝ်ႉ။
ဝၼ်းတီႈ 22/1/2024 ယၢမ်းၵၢင်ဝၼ်းမွၵ်ႈ 12 မူင်း ရူတ်ႉၵႃး တၢင်ႇၵုၼ်ႇ ၵူၼ်းမိူင်းလမ်းၼိုင်ႈ လုၵ်ႉသီႇပေႃႉ တေၵႂႃႇ ၼမ်ႉ တူႈၼႆသေ ၽႃႇၺႃးမၢၵ်ႇသိုၵ်းမၢၼ်ႈ ႁၢင်ႈၵၢင်ဝႆႉ ႁိမ်းၶူဝ်တႃႈတေႈ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ တႅၵ်ႇတိူဝ်ႉသႂ်ႇ ရူတ်ႉၵႃးလႄႈ ၵူၼ်းႁေႃႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း။
ၽူႈၶဝ်ႈၸုမ်း ပရႁိတ ၵေႃႉၼိုင်ႈ တီႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ– “ၸႂ်ႈၶႃႈဢေႃႈ ၵႃးတၢင်ႇၵုၼ်ႇ ၽႃႇၺႃးမၢၵ်ႇ ႁူဝ်ၵႃးတႄႉ ယွၵ်းယွႆၵႂႃႇၶႃႈဢေႃႈ။ ၵႃးတၢင်ႇၵုၼ်ႇၼႆႉ လုၵ်ႉတၢင်းသီႇပေႃးမႃးသေ တေၵႂႃႇတၢင်းၼမ်ႉတူႈ ဢေႃႈ”- ဝႃႈၼႆ။
ယွၼ်ႉၽႃႇၺႃးမၢၵ်ႇ တႅၵ်ႇတိူဝ်ႉသႂ်ႇႁႅင်းသေ ၸၢၵ်ႇမၢၵ်ႇတိူဝ်ႉသႂ်ႇၸဝ်ႈၵႃး ၸွမ်းတူဝ်၊ ၸွမ်းမိုဝ်း ၸိူဝ်းၼႆႉ လႆႈမၢတ်ႇၸဵပ်း ႁၢဝ်ႈ ႁႅင်းလႄႈ ယၢမ်းလဵဝ် လႆႈသူင်ႇယူတ်းယႃတူဝ် တီႈႁူင်းယႃဝဵင်းလိူဝ်ႇ(မၼ်းတလေး) ဝႆႉယဝ်ႉ။
မိူဝ်ႈဝၼ်းတီႈ 18/1/2024 ယၢမ်းဝၢႆးဝၼ်းမွၵ်ႈ 1 မူင်းၶိုင်ႈ ၼၼ်ႉၵေႃႈ ထေႃႈတၢင်ႇၶဝ်ႈသၢၼ် ၸၢႆးၶမ်း ၽႃႇၺႃးမၢၵ်ႇသိုၵ်း မၢၼ်ႈ ႁၢင်ႈၵၢင်ဝႆႉ တီႈၼိူဝ်ၶူဝ်တႃႈတေႈၼႆႉ လမ်းၼိုင်ႈ ၼၼ်ႉတႄႉ တႅၵ်ႇတိူဝ်ႉသႂ်ႇထေႃႇလူႉၵွႆၸွမ်း ၵူၼ်းႁေႃႈတႄႉ ဢမ်ႇလႆႈ တုမ်ႉတိူဝ်ႉမၢတ်ႇၸဵပ်းၸွမ်းသင်။
ဝၼ်းတီႈ 3/1/2024 ယၢမ်းဝၢႆးဝၼ်း 2 မူင်း သိုၵ်း SSPP လူင်းပိုၼ်ႉတီႈ ၵူတ်ႇထတ်းမၢၵ်ႇႁၢင်ႈၵၢင်ဝႆႉ ၸွမ်းႁိမ်းၶူဝ် ၼႆႉသေ ၵူၼ်းသိုၵ်း ၵေႃႉၼိုင်ႈ ၽႃႇၺႃးမၢၵ်ႇ တီႈႁိမ်းၸဝ်ႈမိူင်းတႃႈတေႈ တႅၵ်ႇတိူဝ်ႉသႂ်ႇ တီႈတိၼ်မၼ်း ၸၢႆးၾၢႆႇၶႂႃ ပုတ်းၵႂႃႇ။
