ၼႃႈလိၼ်သိုၵ်းမၢႆ 1 RCSS တီႈလွႆၵေႃႇမိူင်း လႅၼ်လိၼ်တႆး – ထႆး ပၢင်းဢဝ်ႁုၼ်ႇႁၢင်ႈ ၸဝ်ႈၼရေးသူၼ် ၵႂႃႇပူၵ်းတင်ႈဝႆႉတူၼ်ၼိုင်ႈ တႃႇ ၵႃရဝပူးၸႃး။
ဝၼ်းတီႈ 18/1/2024 ယၢမ်းၵၢင်ၼႂ် 9 မူင်း ယူႇတီႈ ၸဝ်ႈသိုၵ်း ၸွမ်သႅင်ႁိူင်း တၢင်တူဝ် ႁူဝ်ပဝ်ႈလူင် ၶွင်ႇသီႇဢဝ်ၶိုၼ်း ၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း၊ ၵႅမ်ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆးလႄႈ ၽူႈၵွၼ်းၼႃႈလိၼ်သိုၵ်းမၢႆ 1 ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ႁူမ်ႈလူၺ်ႈ ၸဝ်ႈသိုၵ်း လႅင်းၸိုၼ်ႈ ၵႅမ်ၽူႈၵွၼ်းၼႃႈလိၼ်သိုၵ်းမၢႆ 1 သေ ပၢင်းဢဝ်ႁုၼ်ႇႁၢင်ႈ ၸဝ်ႈၾႃႉ ၼရေးသူၼ် မႃးတင်ႈဝႆႉ တီႈလွႆၵေႃႇမိူင်း ၼႂ်းၼႃႈလိၼ်သိုၵ်းမၢႆ 1 (RCSS) ၼႆယဝ်ႉ။
ၽူႈမီးပုၼ်ႈၽွၼ်း ႁၢင်ႈႁႅၼ်းၸတ်းပၢင်ပွႆးၼႆႉ ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸဝ်ႈၾႃႉ ၼရေးသူၼ်ၼႆႉ ယူႇတီႈ တႆးႁဝ်းၶႃႈ ယုမ်ႇယမ်ၼပ်ႉထိုဝ်မႃး ၵဵဝ်ႇၵပ်းလူၺ်ႈ ၵၢၼ်ၵွပ်ႇၵူႈဢဝ်ၶိုၼ်းဝၢၼ်ႈမိူင်း။ ယဝ်ႉၵေႃႈ မိူင်းထႆး – မိူင်းတႆးၼႆႉ မၼ်း ပဵၼ်မိူင်းပီႈမိူင်းၼွင်ႉၵၼ်လႄႈ တႃႇႁႂ်ႈပဵၼ်တီႈၵိုၵ်းပိုၼ်း တႃႇလုၵ်ႈလၢၼ်ႁဝ်းၵႂႃႇ ဝၼ်းတႃမိူဝ်းၼႃႈ ႁႂ်ႈႁူႉဝႃႈ သၢႆၸိူဝ်ႉငိူၼ်ႈ ၶိူဝ်း ပီႈၼွင်ႉတႆး – ထႆးၼႆႉ ပဵၼ်ပီႈ ၼွင်ႉၵၼ်ယူႇၼႆသေ ၵွပ်ႈဝႃႈ ပဵၼ်တီႈယုမ်ႇယမ် ၼပ်ႉထိုဝ်လႄႈ ၸင်ႇဢဝ်ႁုၼ်ႇႁၢင်ႈၸဝ်ႈ မႃးပူၵ်းတင်ႈဝႆႉ”- ဝႃႈၼႆ။
ပၢင်ပွႆး ပၢင်းႁုၼ်ႇႁၢင်ႈၸဝ်ႈၼရေးသူၼ် တီႈလွႆၵေႃႇမိူင်းၼႆႉ မီးၽူႈယႂ်ႇၵူၼ်းလူင် ပီႈၼွင်ႉတီႈၸမ်/ ၵႆ မႃးၶဝ်ႈႁူမ်ႈ 400 ပၢႆ။ ယဝ်ႉၵေႃႈ တၢင်းသုင် ႁုၼ်ႇႁၢင်ႈၸဝ်ႈၼရေးသူၼ်ၼႆႉ သုင် 2 မဵတ်ႉတဵမ် (6 ထတ်း) ၼႆယဝ်ႉ။
ၼႂ်းပၢင်ပွႆး ပၢင်းႁုၼ်ႇႁၢင်ႈ ၸဝ်ႈၼရေးသူၼ် တီႈလွႆၵေႃႇမိူင်းၼႆႉ ဢွၼ်တၢင်းသုတ်း ဝၢင်းၵႅဝ်ႈ၊ သႅင်၊ မၢၵ်ႇဢုတ်ႇ ငိုၼ်း၊ မၢၵ်ႇဢုတ်ႇၶမ်း တီႈပိုၼ်ႉထၢၼ်ပလၢင်ႇ ၸဝ်ႈၾႃႉၼရေးသူၼ်ယဝ်ႉ လူႇတၢၼ်း။ ယဝ်ႉၵေႃႈ ယုၵ်ႉဢဝ် ႁုၼ်ႇႁၢင်ႈ ၸဝ်ႈ ၼရေးသူၼ် မႃးတမ်းၼိူဝ် ပလၢင်ႇယဝ်ႉ ၵူၼ်းသိုၵ်းၵူၼ်းမိူင်း ႁူမ်ႈၵၼ် ၼပ်ႉယမ်။
လိူဝ်ၼၼ်ႉ မီးတၢင်းၵႃႈၼူၵ်ႉ/ တူဝ်း တၢင်းၵႃႈလၢႆးမိုဝ်း၊ လၢႆးလႅဝ်း၊ လၢႆးၶွၼ်ႉ၊ လၢႆးႁွၵ်ႇလႄႈ တၢင်းၵႃႈယိူင်း တင်းၾၢႆႇတႆး – ၾၢႆႇထႆး ၸိူဝ်းၼႆႉထႅင်ႈ။
ၸွမ်းၼင်ႇ ၼႂ်းၼႃႈလိၼ်သိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/ SSA) ၵုမ်းၵမ်ဝႆႉ ၸွမ်းလႅၼ်လိၼ်တႆး – ထႆးၼၼ်ႉ ဢွၼ်ၵၼ် ပူၵ်းတင်ႈဝႆႉ ႁုၼ်ႇႁၢင်ႈ ၸဝ်ႈၾႃႉ ၼရေးသူၼ် မိူၼ်ၼင်ႇ – ငဝ်ႈၸိုင်ႈလွႆတႆးလႅင်း၊ လွႆသၢမ်သိပ်း၊ လွႆလမ်၊ လွႆၵေႃႇဝၼ်းလႄႈ လွႆၵေႃႇမိူင်း ၸိူဝ်းၼႆႉ။
မိူဝ်ႈပၢၼ်ၸဝ်ႈၶမ်းၵၢႆႇၼွႆႉ ၸဝ်ႈၾႃႉသႅၼ်ဝီၼၼ်ႉ ၸဝ်ႈၼရေးသူၼ်တင်း ၸဝ်ႈၶမ်းၵၢႆႇၼွႆႉ ပဵၼ်ဢူၺ်းၵေႃႉၵၼ်။ မိူဝ်ႈ ၽွင်းတေတိုၵ်းမၢၼ်ႈၼၼ်ႉ ၸဝ်ႈၼရေးသူၼ် ဢဝ်ဢဵၼ်ႁႅင်းသိုၵ်းသေ တေၶိုၼ်ႈမိူဝ်းၸွႆႈၸဝ်ႈၶမ်းၵၢႆႇၼွႆႉ။ ၵူၺ်းၵႃႈ မိူဝ်ႈၽွင်းဢွၵ်ႇတၢင်းယူႇၼၼ်ႉ ယွၼ်ႉတၢင်းပဵၼ်ဢမ်ႇယူႇလီသေ လႆႈၵႂႃႇလူႉသဵင်ႈတီႈမိူင်းႁၢင် ၼႂ်းၸႄႈ ဝဵင်းမိူင်းတူၼ် ၸိုင်ႈတႆး ပွတ်းဢွၵ်ႇ။ ၸဝ်ႈၼရေးသူၼ်ၼႆႉ ယၢမ်ႈၵဵဝ်ႇၶွင်ႈၸွမ်းတႆး ဝႃႈၼႆ။
