ဢွၼ်ႇၸၢႆးၵူၼ်းမိူင်းသၢတ်ႇၵေႃႉၼိုင်ႈ ၺႃးလွၵ်ႇငိုတ်ႈ ၸူၼ်ရူတ်ႉၶိူင်ႈ

ဢွၼ်ႇၸၢႆးၵူၼ်းမိူင်းသၢတ်ႇၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ ႁေႉႁၢမ်ႈပွတ်းတၢင်းသေ ၸူၼ်ႁိမ်ရူတ်ႉၶိူင်ႈၵႂႃႇ။

ဝၼ်းတီႈ 13/1/2024 ယၢမ်းႁူဝ်ၶမ်ႈ ဢွၼ်ႇၸၢႆး ဢႃယု14 ပွၵ်ႉဝဵင်းၵွင်း ၸႄႈဝဵင်းမိူင်းသၢတ်ႇ ၵႂႃႇႁဵၼ်းလိၵ်ႈ(တီႈၵျူႊသျိၼ်ႊ)သေပွၵ်ႈမႃးႁိူၼ်းၶိုၼ်းၼၼ်ႉ  ၺႃးၵူၼ်းဢမ်ႇႁူႉၾၢႆႇ ဢၢၼ်းၸူၼ်ရူတ်ႉၶိူင်ႈ ပွတ်းတၢင်း၊ ၵူၼ်းဝၢၼ်ႈဢွၼ်ၵၼ် ၸွႆႈထႅမ်လႄႈ ၸူၼ်ဢမ်ႇတၼ်းဢဝ်ရူတ်ႉၶိူင်ႈမၼ်းၸၢႆးၵႂႃႇ  ။

ၵူၼ်းၼုမ်ႇမိူင်းသၢတ်ႇၵေႃႉၼိုင်ႈလၢတ်ႈတီႈတွႆႇႁွၵ်ႈဝႃႈ – “ မီးၵူၼ်းၸၢႆးၵေႃႉၼိုင်ႈ ႁေႉၶီႇရူတ်ႉၶိူင်ႈၸႂ်ႈလုၵ်ႈဢွၼ်ႇၸၢႆးၼၼ်ႉ ၵႂႃႇသူင်ႇမၼ်းတီႈ  တၢင်းၶဝ်ႈတူင်ႈၼႃးပိူၼ်ႈ တၢင်းဝၢၼ်ႈဝဵင်းဝၢႆပုၼ်ႉ ။ ပေႃးထိုင်တီႈၼၼ်ႈယဝ်ႉၵေႃႈ ၸႂ်ႉၵိုတ်း ။ ၸၢႆးဢွၼ်ႇၸဝ်ႈရူတ်ႉၶိူင်ႈၼႆႉၵေႃႈ တိုၵ်ႉလဵၵ်ႉလူးၼေႃႈ တူၵ်းၸႂ် သေ ၵႃႈလႆႈၵိုတ်းပၼ် ။ ယဝ်ႉၵေႃႈ ၵူၼ်းၸၢႆးၵေႃႉဢၼ်ၸႂ်ႉၵႂႃႇသူင်ႇၼႆႉ လၢၵ်ႈၽႃႉပၢႆလႅမ်မီးမွၵ်ႈသွၵ်ႇၼႆႉ ၼႄ ႁႂ်ႈဢွၼ်ႇၸၢႆးၼႆႉၵူဝ် ။ ယဝ်ႉၵေႃႈ ၶတ်းသေႃးရူတ်ႉၶိူင်ႈသေ ၸႂ်ႉဢွၼ်ႇၸၢႆးၼႆႉ ဝႆႉရူတ်ႉၶိူင်ႈသေ ပွၵ်ႈၶိုၼ်းၼႆဢေႃႈ ။ ဢွၼ်ႇၸၢႆးၼႆႉၵေႃႈ ၵူဝ်ထုၵ်ႇႁဵတ်းႁၢႆႉလႄႈ ဢွၵ်ႇမႃးပႅတ်ႈဝႆးဝႆး ” – ဝႃႈၼႆ။

 ဢွၼ်ႇၸၢႆးၸဝ်ႈရူတ်ႉၶိူင်ႈၼႆႉ ဢွၵ်ႇမႃးလၢတ်ႈၵူၼ်းႁိမ်းႁွမ်းဝၢၼ်ႈၸိူဝ်းၼၼ်ႉသေ ၵူၼ်းဝၢၼ်ႈၵႂႃႇၸွမ်းၶႆႈတူၺ်းပၼ် ၊မႃးႁၼ်ၽွင်း ၸူၼ်တိုၵ်ႉယႃႉသေႃးရူတ်ႉယူႇ ပႆႇတၼ်းဢဝ်ရူတ်ႉၶိူင်ႈၵႂႃႇ   ဝႃႈၼႆ။    

ၵူၼ်းၼုမ်ႇမိူင်းသၢတ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၽိူဝ်ႇဢွၼ်ၵၼ်ၵႂႃႇတူၺ်း  လႆႈႁၼ်ၸူၼ်တိုၵ်ႉယႃႉသေႃးရူတ်ႉၶိူင်ႈယူႇ၊ ၶဝ်ယႃႉဢမ်ႇတၼ်းယဝ်ႉ ၵူၼ်းဝၢၼ်ႈသမ်ႉၵႂႃႇၸမ်ၶဝ်လႄႈ ၶဝ်ပွႆႇဝႆႉရူတ်ႉၶိူင်ႈသေ ဢွၼ်ၵၼ်လႅၼ်ပၢႆႈ ။  သေႃးရူတ်ႉၶိူင်ႈသမ်ႉထုၵ်ႇယႃႉဝႆႉ။ ထၢင်ႇတႄႉ ၶဝ်တေမီးပဵၼ်ၸုမ်းႁိုဝ်ဢမ်ႇႁူႉ။ ဢၼ်ႁႃရူတ်ႉၶိူင်ႈပၼ်သမ်ႉၵေႃႉၼိုင်ႈ ဢၼ်မႃးဢဝ်သမ်ႉၵေႃႉၼိုင်ႈၼေႈ။    ႁဵတ်းႁႂ်ႈသေႃးၶဝ်ပႅၵ်ႇၵၼ်လႄႈ ၸင်ႇလႆႈယႃႉႁူဝ်သေႃးရူတ်ႉၼၼ်ႉပႅတ်ႈႁိုဝ်ဢမ်ႇႁူႉ   ” –  ဝႃႈၼႆ။

လွင်ႈႁိမ်ၸူၼ်ရူတ်ႉၶိူင်ႈတီႈမိူင်းသၢတ်ႇပွၵ်ႈၼႆႉ ပဵၼ်ၵမ်းႁႅၵ်ႈၼႂ်းပီ 2024 ။ ၸဵမ်မိူဝ်ႈ ၶၢဝ်းတၢင်းပဵၼ်ၶူဝ်ႊဝိတ်ႉလၢမ်းၽႄႈလႄႈ တေႃႇထိုင်သိုၵ်းမၢၼ်ႈယိုတ်းမိူင်းမႃးၶၢဝ်းတၢင်း 3 ပီၼႆႉ ၵူၼ်းမိူင်းသၢတ်ႇ ၵုမ်ႇလႆႈၵူဝ်ၽေးၽူႈလၵ်ႉၵူၼ်းၸူၼ်ၵူႈဝၼ်း၊ ၵူၼ်းသူႇသမ်းၵိၼ်ယႃႈၵေႃႈလိူင်ႇၼမ် ၸဵမ်လုၵ်ႈဢွၼ်ႇၵူၼ်းလူင် ၵူၼ်းထဝ်ႈ။ ပေႃးတေဢွၵ်ႇႁိူၼ်းယေး ဢမ်ႇမီးလွင်ႈႁူမ်ႇလူမ်ႇ ။ လွင်ႈႁိမ်လွင်ႈၸူၼ်မီးမႃးလၢႆပွၵ်ႈသေတႃႉ ဢမ်ႇမီးၸုမ်းလႂ် ၵႅတ်ႇၵင်ႈပၼ်လႆႈၼႆ ၵူၼ်းမိူင်းသၢတ်ႇလၢတ်ႈၼင်ႇၼႆ။

ပူၼ်ႉမႃး ဝၼ်းတီႈ 28/8/2023 ယၢမ်းၼႂ်ၸဝ်ႉ 4 မူင်းၼၼ်ႉၵေႃႈ ၼၢင်းယိင်းၵူၼ်းမိူင်းသၢတ်ႇၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ပႂ်ႉႁိမ်ဢဝ်ရူတ်ႉၶိူင်ႈၸွမ်းတၢင်း တီႈႁိမ်းၶူင်ႇႁိူဝ်းမိၼ် ၽွင်းမၼ်းၼၢင်းၵႂႃႇၵၢတ်ႇ ။