ၽွင်းၵူၼ်းသိုၵ်း SSPP လူင်းၵူတ်ႇထတ်း မၢၵ်ႇႁၢင်ႈၵၢင်/ မၢၵ်ႇမႅင်းၾင်လိၼ် ၸွမ်းႁိမ်းၶူဝ်တႃႈတေႈၼၼ်ႉ ၵူၼ်းသိုၵ်း ၵေႃႉၼိုင်ႈ ၽႃႇၺႃးမၢၵ်ႇတႅၵ်ႇ ထိုင်တီႈလႆႈၶႃပုတ်းၵႂႃႇ ၶွၼ်ၼိုင်ႈ။
ပူၼ်ႉမႃး မိူဝ်ႈဝၼ်းတီႈ 3/1/2024 ယၢမ်းဝၢႆးဝၼ်း 2 မူင်း ၽူႈမီးပုၼ်ႈၽွၼ်း ၼႂ်းသိုၵ်း SSPP ႁူမ်ႈၵၼ် လူင်းပိုၼ်ႉတီႈ ၵူတ်ႇထတ်းၸွမ်းႁိမ်းၶူဝ်တႃႈတေႈ ဢၼ်ၵၢႆႇၸူးဝႆႉ ၼႂ်းၵႄႈသီႇပေႃႉ – ၼမ်ႉတူႈ ၼႂ်းၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇသေ ၼႂ်းၼၼ်ႉ ၵူၼ်းသိုၵ်း SSPP ၵေႃႉၼိုင်ႈ ၵႂႃႇၽႃႇၺႃးမၢၵ်ႇ တီႈႁိမ်းၸဝ်ႈမိူင်းတႃႈတေႈလႄႈ တိူဝ်ႉသႂ်ႇတီႈတိၼ်မၼ်းၸၢႆး ၾၢႆႇၶႂႃ ပုတ်းၵႂႃႇ ၼႆယဝ်ႉ။
ၽူႈတူင်ႉၼိုင် ၵၢၼ်သိုၵ်း တၢင်းပွတ်းတွၼ်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ ပေႃႈမႄႈၵူၼ်းမိူင်းႁဝ်း လႆႈယွၼ်း တၢင်းၸွႆႈထႅမ်မႃး ႁႂ်ႈၵႂႃႇထတ်းတူၺ်းပၼ် တီႈႁိမ်းၶူဝ်တႃႈတေႈ ဢၼ်သိုၵ်းမၢၼ်ႈ တပ်ႉ 503/ 504 မႃးတႅပ်းမႆႉ လူမ်ႉတဵင် တၢင်း မိူဝ်ႈဝၼ်းတီႈ 1 ၼၼ်ႉ ၸွင်ႇသိုၵ်းမၢၼ်ႈ လႆႈႁၢင်ႈမၢၵ်ႇဝႆႉတႄႉ ယဝ်ႉၵေႃႈ ၸွင်ႇၵူၼ်းမိူင်း တေၸၢင်ႈၵႂႃႇၸၢင်ႈမႃးၼႆသေ ၵူၼ်းႁဝ်းၶႃႈ ၸင်ႇလႆႈၵႂႃႇၵူတ်ႇထတ်းပၼ်။ ၼႂ်းၼၼ်ႉ ၵူၼ်းသိုၵ်းႁဝ်းၶႃႈ ၵေႃႉၼိုင်ႈ ၸင်ႇၵႂႃႇၽႃႇၺႃးမၢၵ်ႇတႅၵ်ႇ တီႈႁိမ်း ၸဝ်ႈမိူင်းတႃႈတေႈၼၼ်ႉ တႅၵ်ႇတိူဝ်ႉသႂ်ႇတီႈတိၼ်မၼ်းၸၢႆးၾၢႆႇၶႂႃ လႆႈပုတ်း ၵႂႃႇ”– ဝႃႈၼႆ။
ဢိင်ၼိူဝ် လွင်ႈၼႆႉ မိူဝ်ႈဝၼ်းတီႈ 3 ယၢမ်းၵၢင်ဝၼ်း 12 မူင်း ယူႇတီႈ ၽူႈမီးပုၼ်ႈၽွၼ်း ၼႂ်း SSPP ၸင်ႇလႆႈၸတ်း ၵူၼ်း ၵႂႃႇၵူတ်ႇထတ်းတူၺ်း ၼႂ်းဢွင်ႈတီႈၸိူဝ်းၼၼ်ႉ တႃႇၵူၼ်း 5 ၵေႃႉ။ ၵူၼ်းသိုၵ်း ဢၼ်ၽႃႇၺႃးမၢၵ်ႇၼၼ်ႉ တေမီးဢႃယုမွၵ်ႈ 26 ပီ။ ယၢမ်းလဵဝ် လႆႈသူင်ႇယူတ်းယႃဝႆႉတီႈဝဵင်းလႃႈသဵဝ်ႈ။
ၶူဝ်တႃႈတေႈၼႆႉ ပဵၼ်ၶူဝ်ဢၼ်ၵၢႆႇၸူး ၼႂ်းၵႄႈၼမ်ႉတူႈ – သီႇပေႃႉ – လႃႈသဵဝ်ႈ။ ထိုင်မႃး ဝၼ်းတီႈ 31/12/2023 ၼၼ်ႉ ထုၵ်ႇမၢၵ်ႇလူင်တူၵ်းသႂ်ႇသေ လႆႈၵူၼ်ႇပင်း လူႉၵွႆပႅတ်ႈ ႁၢၼ်ႉတေႃႇထိုင်ယၢမ်းလဵဝ် ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇ။
