မိူဝ်ႈၼႆႉ ဝၼ်းတီႈ 29/11/2023 ယၢမ်းၵၢင်ၼႂ် 10 မူင်းၶိုင်ႈ သိုၵ်းတဢၢင်း TNLA ပိၵ်ႉဢိုတ်းသဵၼ်ႈတၢင်း မူႇၸေႊ – ၼမ်ႉၶမ်းထႅင်ႈ တီႈပွၵ်ႉမၢၼ်ႈၶမ်း ၸႄႈဝဵင်းၼမ်ႉၶမ်း တီႈၼိုင်ႈလႄႈ တီႈႁိမ်းဢိူင်ႇၸေႊလၢၼ်ႉ ၸႄႈဝဵင်းမူႇၸေႊ တီႈၼိုင်ႈ တင်းမူတ်းပိၵ်ႉဢိုတ်း သွင်ဢွင်ႈတီႈၼႆႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၵိုင်ႉၵၢင်ႉ ပိၵ်ႉတၢင်းၵႂႃႇၸိူင်ႉၼႆၼႆႉ ႁဵတ်းႁႂ်ႈၵူၼ်းပၢႆႈၽေးသိုၵ်း ဢွၼ်ၵၼ်ၶမ်ဝႆႉၸွမ်းတၢင်း ရူတ်ႉၵႃးၼပ်ႉႁူဝ်ပၢၵ်ႇမၼ်းဢေႃႈ။ ယွၼ်ႉပၢင်တိုၵ်းယဵၼ်လူင်းၵႂႃႇ 3-4 ဝၼ်းလႄႈ ၵူၼ်းမိူင်းဢွၼ်ၵၼ် ပွၵ်ႈမႃးၸႂ်းႁိူၼ်းသေ မႃးၺႃးၶဝ်ပိၵ်ႉဢိုတ်းၸိူင်ႉၼႆၼႆႉ ပဵၼ်ဢၼ်ယၢပ်ႇၽိုတ်ႇတႄႉၶႃႈဢေႃႈ”- ဝႃႈၼႆ။
ၸူဝ်ႈသိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းမႃး ၼႂ်းၸႄႈဝဵင်းၼမ်ႉၶမ်းလႄႈ မူႇၸေႊၼႆႉ ၾၢႆႇသိုၵ်း TNLA ပိၵ်ႉဢိုတ်းသဵၼ်ႈတၢင်း မူႇၸေႊ – ၼမ်ႉၶမ်းၼႆႉမႃး ဢမ်ႇယွမ်း 3 ပွၵ်ႈယဝ်ႉ။
ဝၼ်းတီႈ 17/11/2023 ၼၼ်ႉၵေႃႈ ပိၵ်ႉဢိုတ်းမႃးယဝ်ႉ ၵမ်ႉၼိုင်ႈ တီႈမၢၼ်ႈၶမ်း – ၼွင်ၸၢင်ႉ ၼႂ်းၸႄႈဝဵင်းၼမ်ႉၶမ်း။ ယဝ်ႉ ၵေႃႈ တီႈဝၢၼ်ႈၼမ်ႉမွၼ်း ၼႂ်းဢိူင်ႇၸေႊလၢၼ်ႉ ၸႄႈဝဵင်းမူႇၸေႊ။
မိူဝ်ႈဝၼ်းတီႈ 8/11/2023 ၼၼ်ႉၵေႃႈ ၶဝ်ပိၵ်ႉဢိုတ်းသဵၼ်ႈတၢင်း မူႇၸေႊ – ၼမ်ႉၶမ်း တီႈမၢၼ်ႈၶမ်း တီႈၼိုင်ႈလႄႈ ႁိမ်း ဝၢၼ်ႈသၢႆးၶၢဝ် တီႈၼိုင်ႈ ၼႆယဝ်ႉ။
သဵၼ်ႈတၢင်း မူႇၸေႊ – ၼမ်ႉၶမ်း ဢၼ်ၵၢႆႇၸူးၵၼ်ဝႆႉၼႆႉ တေယၢၼ်ၵၼ် 19 လၵ်း ၼႆယဝ်ႉ။
