တႄႇဢဝ် ဝၼ်းတီႈ 15-16/11/2023 ၶၢဝ်းတၢင်း 2 ဝၼ်းၼႆႉမႃး လူင်ပွင်ၸိုင်ႈၶႄႇ ၸႂ်ႉၵူၼ်းမိူင်းဝၼ်းတဵင်ႈ တၢင်းၾင်ႇ မိူင်းၶႄႇ ဢၼ်တေႃႇၼႃႈတိတ်းၸပ်းၵၼ် တၢင်းဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၼႆႉ ယၢမ်းလဵဝ် ၵူၼ်းမိူင်းငိူင်ႉပၢႆႈၽေးသိုၵ်းဝႆႉမူတ်းယဝ်ႉ ယွၼ်ႉသိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ 3 ၸုမ်း ပဵၼ်ပၢင် တိုၵ်းၵၼ် ႁၢဝ်ႈႁႅင်း။
ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶႄႇၶဝ် ၸႂ်ႉၵူၼ်းမိူင်းဝၼ်းတဵင်ႈ ဢၼ်တေႃႇ ၼႃႈ ၵၼ်တင်းဝဵင်းပၢင်ႇသၢႆး ႁဝ်းၶႃႈၼႆႉ ႁႂ်ႈငိူင်ႉပၢႆႈဝႆႉ ၵမ်းၼိုင်ႈ ဢၼ်ၶဝ်ၸႂ်ႉငိူင်ႉပၢႆႈၼႆႉ မိူဝ်းဝႃးတင်း မိူဝ်ႈ ၼႆႉၶႃႈ ဢေႃႈ ယၢမ်းလဵဝ် တီႈဝဵင်းဝၼ်းတဵင်းၼၼ်ႉ ၵူၼ်းမိူင်းၶၢႆႉပၢႆႈမူတ်း ယဵၼ်သီႇဝႆႉၶႃႈဢေႃႈ”- ဝႃႈၼႆ။
မိူဝ်ႈၼႆႉ ဝၼ်းတီႈ 16 တႄႇဢဝ် ယၢမ်းၵၢင်ဝၼ်း 11:40 မူင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ႁူမ်ႈၵၼ် လူမ်ႇယိုဝ်း တပ်ႉ သိုၵ်းမၢၼ်ႈ တီႈဝဵင်းပၢင်ႇသၢႆး ၸႄႈဝဵင်းမူႇၸေႊ ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ်။
“တေႃႈလဵဝ် ပၢင်တိုၵ်း ပဵၼ်ႁႅင်းၶႃႈဢေႃႈ သိုၵ်းမၢၼ်ႈသမ်ႉ ယူႇဝႆႉၸွမ်းၼႂ်းမူႇဝၢၼ်ႈ ယဝ်ႉၵေႃႈ ၼႂ်းႁိူၼ်းယေးထႅင်ႈ 1 ႁိူၼ်းလႂ် ၶဝ်ယူႇဝႆႉ 2-3 ၵေႃႉ ၸိူဝ်းၼႆႉ။ မၢၵ်ႇၵေႃႈ မႃးတူၵ်းတႅၵ်ႇ ၼႂ်းမူႇဝၢၼ်ႈ ၸိူဝ်းၼႆႉၵေႃႈမီးဢေႃႈ။ လွင်ႈတုမ်ႉတိူဝ်ႉ ႁိူၼ်းယေး ၸိူဝ်း ၼႆႉၵေႃႈမီးဢေႃႈ”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇၼႆ။
ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း ၶၢဝ်းတၢင်း 20 ဝၼ်းပၢႆမႃး ၼႂ်းၸိုင်ႈတႆးပွတ်းႁွင်ႇသေ ႁဵတ်းႁႂ်ႈၵူၼ်းမိူင်းပၢႆႈၽေးသိုၵ်း ၼပ်ႉႁူဝ်မိုၼ်ႇ ၼႆယဝ်ႉ။
