ႁွင်ႈၵၢၼ်လူင်ပွင်ၸိုင်ႈ ႁူပ်ႉထူပ်းၵူၼ်းမိူင်း ၸႄႈဝဵင်းလႃႈသဵဝ်ႈ 200 ပၢႆ ဢုပ်ႇဢူဝ်းပိူဝ်ႈႁႃတၢင်းၵႄႈပၼ်ႁႃ ဢၼ်ၵူၼ်းမိူင်း ႁူပ်ႉထူပ်းယူႇဝၼ်းမိူဝ်ႈၼႆႉ ဝႃႈၼႆ။

ဝၼ်းတီႈ 03/05/2018 ယၢမ်းဝၢႆးဝၼ်း 1 မူင်း ထိုင် 5 မူင်း ႁူဝ်ၶမ်ႈ ႁွင်ႈၵၢၼ်လူင်ပွင်ၸိုင်ႈ တင်း ၵူၼ်းမိူင်း ၸႄႈ ဝဵင်း လႃႈ သဵဝ်ႈ ႁူပ်ႉထူပ်းဢုပ်ႇဢူဝ်းၵၼ် တႃႇၵႄႈလိတ်ႈပၼ်ႁႃ လွင်ႈယၢပ်ႇၽိုတ်ႇၵူၼ်းမိူင်းလႄႈ လွင်ႈၶိုင် သၢင်ႈႁၢင်ႈပွင်တႃႇမုၼ်းလႅင်းၶိုၼ်ႈယႂ်ႇ ၼႂ်းပိုၼ်ႉတီႈ ၸိူဝ်းၼႆႉ။ ပၢင်ႁူပ်ႉထူပ်းၼႆႉ ၸတ်းႁဵတ်းတီႈ ႁူင်းႁေႃၵၢင်ဝဵင်း ၸႄႈဝဵင်း လႃႈသဵဝ်ႈ ၸိုင်ႈ တႆးပွတ်းႁွင်ႇ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ(3) ၸႄႈတွၼ်ႈလႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈဝႃႈ “ ၶႃႈႁဝ်း လႆႈမႃးသပ်းလႅင်းၼႄ လွင်ႈၽူႈတႅၼ်း ဢၼ်ႁဝ်းၶႃႈၵႂႃႇႁဵတ်းသင်ၼႂ်းလုမ်းသၽႃးၽူႈတႅၼ်း ၼၼ်ႉ။ ဢၼ်လႆႈဢုပ်ႇလၢတ်ႈသေ ပဵၼ်မၢႆမီႈၵႂႃႇယဝ်ႉလၢႆၶေႃႈ။ လိူဝ်ၼၼ်ႉ ႁဝ်းၶႃႈ မီးၶွမ်ႊမတီႊၸၢဝ်ႈႁႆႈ/ၼႃး၊ လုၵ်ႈ ဢွၼ်ႇလႄႈၼၢင်းယိင်း၊ ပၢႆးယူႇ လီလႄႈ လွင်ႈငမ်းယဵၼ်ၸၢဝ်းၶိူဝ်း ၸိူဝ်းၼႆႉ လႆႈတၢင်ႇလၢတ်ႈၼႄၵႂႃႇ” ဝႃႈၼႆ။

သိုပ်ႇလၢတ်ႈဝႃႈ ပၢင်ႁူပ်ႉထူပ်းၸိူင်ႉၼႆ ၶႂ်ႈတိုၵ်းသူၼ်းထိုင် ၵူၼ်းမိူင်းႁဝ်း ဢွၼ်ၵၼ်မႃးၶိုၼ်ႈႁွတ်ႈၼမ်ၼမ်၊ သင် ၼႂ်းပိုၼ်ႉတီႈႁဝ်း မီးပၼ်ႁႃသင်၊ လူဝ်ႇႁဵတ်းလူဝ်ႇပွင်သင် မီးပၼ်ႁႃတၢင်းယၢပ်ႇၽိုတ်ႇသင် တေၸၢင်ႈလၢတ်ႈ ထိုင်တီႈၽူႈမီးပုၼ်ႈၽွၼ်းၶဝ်ၵမ်းသိုဝ်ႇ။ ယွၼ်ႉဝႃႈ ပၢင်ႁူပ်ႉထူပ်းၼႆႉ သွင်လိူၼ်လႂ် ႁဵတ်းၼိုင်ႈပွၵ်ႈ” ဝႃႈၼႆ။

ပၢင်ႁူပ်ႉထူပ်းၼႆႉ ၵူၼ်းပိုၼ်ႉတီႈ ၼႂ်းဝဵင်းလႃႈသဵဝ်ႈမႃးၶိုၼ်ႈႁွတ်ႈ။ ပၢင်ၸိူင်ႉၼႆၸတ်းႁဵတ်းမႃး မီး 4 ၵမ်းယဝ်ႉ ဝႃႈၼႆ။

လုင်းသၢင်ႇၸၢႆး ၵူၼ်းဝၢၼ်ႈၶၢႆးသိမ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၵၢင်ၸႂ်ႁဝ်းၶႃႈ တုၵ်းယွၼ်းတႄႉ ၶႂ်ႈႁႂ်ႈသႂ်ႇပၼ် ၾႆးၾႃႉ လႅင်းလႅတ်ႇ ၸဵမ်မိူဝ်ႈပူၼ်ႉမႃး 2 ပီ၊ ႁဝ်းၶႃႈ ယၢမ်ႈတုၵ်းယွၼ်းမႃးၵမ်းၼိုင်ႈ။ ၵူၺ်းၵႃႈ ဢမ်ႇ တူၵ်းမႃးသေ ပွၵ်ႈ။ ပီၼႆႉၵေႃႈ ၶိုၼ်းတုၵ်းယွၼ်းထႅင်ႈၵမ်းၼိုင်ႈ။ လုၵ်ႉတီႈၼမ်ႉပွင်ႈ ၵႂႃႇထိုင်ဢိူင်ႇႁဝ်းမီး 15 လၵ်း။ ဝၢၼ်ႈ ၵေႃႈမီး 15 ဝၢၼ်ႈဢေႃႈ။ တႃႇလႆႈၾႆးၼၼ်ႉ ႁႂ်ႈၶဝ်ၸဝ်ႈ တုၵ်းယွၼ်းပၼ်ၼႆၶႃႈၼေႃႈ” ဝႃႈၼႆ။

တီႈဢၼ်မႃးပၢင်ႁူပ်ႉၵူၼ်းမိူင်း မီးႁွင်ႈၵၢၼ်ၾၢႆႇပလိၵ်ႈ၊ ႁွင်ႈၵၢၼ်ၾၢႆႇလိူမ်ႈလၢႆႇ ဢိၵ်ႇထႅင်ႈလၢႆလၢႆႁွင်ႈၵၢၼ် ၶဝ်ႈႁူမ်ႈသပ်းလႅင်းပၼ်တၢင်းႁူႉၵူၼ်းမိူင်းလႄႈ လိူဝ်ၼၼ်ႉ ၽူႈတႅၼ်းသၽႃး ၸဵမ်ၸိူဝ်းၼႆႉၵေႃႈ မႃးဢုပ်ႇတၢင်ႇလၢတ်ႈၼႄ လွင်ႈႁဵတ်းသၢင်ႈၼႃႈၵၢၼ်တႃႇငၢၼ်း ၼႂ်းသၽႃး ၸဵမ်ၸိူဝ်းၼႆႉ ဝႃႈၼႆ။

ယူႇတီႈႁွင်ႈၵၢၼ်ၾၢႆႇပလိၵ်ႈသေ သပ်းလႅင်းလၢတ်ႈၼႄ ၵဵဝ်ႇၵပ်းလူၺ်ႈ ယႃႈမဝ်းၵမ်၊ ပၵ်းပိူင်မၢႆမီႈဝၢၼ်ႈမိူင်း၊ ပၵ်းပိူင်ၵၢၼ်ႁေႃႈလူတ်ႉၵႃး/ၶိူင်ႈ။ ယဝ်ႉၵေႃႈ လၢႆးငၢၼ်းလၢတ်ႈၼႄၵႂႃႇ လွင်ႈၼႃႈၵၢၼ်တႃငၢၼ်း ဢၼ်လႆႈ တူင်ႉၼိုင် ႁဵတ်းသၢင်ႈမႃးၸိူဝ်းၼၼ်ႉ။

လိူဝ်ၼၼ်ႉ ႁွင်ႈၵၢၼ်ၾၢႆႇလိူမ်ႈလၢႆႇၵေႃႈ လၢတ်ႈၼႄ လွင်ႈၼႂ်းဝဵင်းလႃႈသဵဝ်ႈ ၵဵဝ်ႇၵပ်းလူၺ်ႈၼမ်ႉ၊ ယုၵ်းယၢၵ်ႇလႄႈ ၽႅၼ်ၵၢၼ်တၢင်းၼႃႈမီးၸိူင်ႉႁိုဝ် ၸိူဝ်းၼႆႉ။