ၵေႃလိၵ်ႈလၢႆးတူၼ်ႈတီး ဢုပ်ႇလၢတ်ႈၼႂ်းႁူဝ်ၶေႃႈ သိုဝ်ႇလႄႈလိၵ်ႈလၢႆးပၢႆပေႇၸၢဝ်းၶိူဝ်း   တီႈပၢင်ၵုမ်လူင်သိုဝ်ႇၶၢဝ်ႇၸၢဝ်းၶိူဝ်း

ပၢင်ၵုမ်လူင်ၽူႈသိုဝ်ႇၶၢဝ်ႇၸၢဝ်းၶိူဝ်း ဢၼ်ၸတ်းႁဵတ်းဝႆႉယူႇတီႈဝဵင်းၽႃဢၢင်ႇ ငဝ်ႈမိူင်းယၢင်းၽိူၵ်ႇ ၶၢဝ်းတၢင်း 3 ဝၼ်းၼၼ်ႉ  ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ၵႂႃႇဢုပ်ႇလၢတ်ႈ လွင်ႈၾိင်ႈလိၵ်ႈလၢႆးၸၢဝ်းၶိူဝ်းလႄႈသိုဝ်ႇ ။

ဢိင်ႈၼိူဝ် ၸုမ်း BNI မွၵ်ႇႁွင်ႉ ႁႂ်ႈၶဝ်ႈႁူမ်ႈ ဢုပ်ႇလၢတ်ႈလွင်ႈၾိင်ႈလိၵ်ႈလၢႆး ႁိတ်ႈႁွႆး ၵႂၢမ်းလၢတ်ႈတႆး သေ ၶူးသွၼ်ၼၢင်းၼူၼ်းမူဝ် လႆႈတၢင်တူဝ် ၵေႃလိၵ်ႈလၢႆး ၾိင်ႈငႄႈတႆး ဝဵင်းတူၼ်ႈတီးသေ လၢႆႈၵႂႃႇၶဝ်ႈႁူမ်ႈ ပၢင်သႅမ်ႊမီႊၼိူဝ်ႊ ဢုပ်ႇလၢတ်ႈလွင်ႈလိၵ်ႈလၢႆးတႆး၊ ၵႂၢမ်းလၢတ်ႈတႆး လႄႈ သုၼ်ႇလႆႈၼႂ်းၵၢၼ်သိုဝ်ႇ၊ တီႈပၢင်ၵုမ်လူင်ၽူႈသိုဝ်ႇၶၢဝ်ႇၸၢဝ်းၶိူဝ်း ဢၼ်ၸတ်းႁဵတ်း တီႈဝဵင်းၽႃဢၢင်ႇ ဝၼ်းတီႈ 27-29/4/2018 ၶၢဝ်းတၢင်း 3 ဝၼ်း။

“ယၢမ်းလဵဝ် ႁူင်းပွႆႇသဵင် ၾၢႆႇတႆးဢေႇ၊ ၶႂ်ႈႁႂ်ႈမီးႁူင်းပွႆႇသဵင်ဢၼ်မီးသဵင်ၸၢဝ်းၶိူဝ်းၼမ်ၼမ်။ ထႅင်ႈပိူင်ၼိုင်ႈၵေႃႈ ၵဵဝ်ႇၵပ်းလွင်ႈၶူဝ်းၼုင်ႈတၢင်းဝႆၸၢဝ်းၶိူဝ်းၼႆႉ ၶႂ်ႈႁႂ်ႈ မီးလွင်ႈၼပ်ႉယမ်တေႃႇၵၼ်။  တီႊသၢႆႊၼႃႊၶဝ်လႂ်၊ၾၢႆႇယုၵ်ႉမုၼ်းၶူဝ်းၼုင်ႈတၢင်းဝႆၸၢဝ်းၶိူဝ်းၶဝ်လႂ် ပေႃးတေႁဵတ်း ၶူဝ်းတႆးၸိုင်ႁႂ်ႈလဵပ်ႈႁဵၼ်းလီလီသေ ႁဵတ်းႁႂ်ႈထုၵ်ႇမႅၼ်ႈၸွမ်း ၾိင်ႈထုင်းတႆး။ ပေႃးဢမ်ႇႁူႉၸိုင် ထုၵ်ႇၵပ်းသိုပ်ႇတၢင်း ၵေႃလိၵ်ႈလၢႆးၾိင်ႈငႄႈတႆးဝဵင်းလႂ်ဝဵင်းၼၼ်ႉ – ဢုပ်လၢတ်ႈလွင်ႈၸိူဝ်းၼႆႉ။ လိူဝ်ၼၼ်ႉ လႆႈလၢတ်ႈပႃး ပိုၼ်းပဵၼ်မႃးၵေႃလိၵ်ႈလၢႆး တႆး ဝဵင်းတူၼ်ႈတီး ၸိူဝ်းၼႆႉဢေႃႈ” – ၶူးသွၼ် ၼၢင်းၼူၼ်းမူဝ် လၢတ်ႈတီႈၽူႈတွႆႇႁွၵ်ႈၼင်ႇၼႆ။

ပၢင်ၵုမ်လူင် ဝၼ်းထူၼ်ႈသွင်မိူဝ်ႈၼႆႉ ၶၢင်၊ ယၢင်း ၊ မွၼ်း ဢိၵ်ႇတၢင်ႇၸၢဝ်းၶိူဝ်း ၸိူဝ်းၼႆႉ ၵေႃႈ ၶဝ်ႈႁူမ်ႈ ဢုပ်ႇလၢတ်ႈၸွမ်း။ ၵူၼ်းသူၼ်ၸႂ်တွင်ႈထၢမ် ၵေႃႈမီးတင်းၼမ် – ဝႃႈၼႆ။

ပၢင်ၵုမ်လူင်ၽူႈသိုဝ်ႇၶၢဝ်ႇၸၢဝ်းၶိူဝ်း ၼႂ်းဝၼ်းထူၼ်ႈ သၢမ်/ဝၼ်းလိုၼ်းသုတ်းၼၼ်ႉ တေဢုပ်ႇလွင်ႈ လွၵ်းပိူင်တီႈၸုၵ်း မီႊၻီႊယိူဝ်ႊၸၢဝ်းၶိူဝ်း၊ လွင်ႈႁူင်းႁဵၼ်းၽူႈသိုဝ်ႇၶၢဝ်ႇၸၢဝ်းၶိူဝ်း၊ လွင်ႈဝၢင်းၽႅၼ်ၵၢၼ် ငၢၼ်းတၢင်းၼႃႈၸိူဝ်းၼႆႉ။

ပၢင်ၵုမ်လူင်ၽူႈသိုဝ်ႇၶၢဝ်ႇၸၢဝ်းၶိူဝ်းၼႆႉ ယၢမ်ႈၸတ်းႁဵတ်းမႃးယဝ်ႉႁႃႈပွၵ်ႈ။ ၵမ်းၼႆႉပဵၼ်ၵမ်းထူၼ်ႈႁူၵ်း။ ၵမ်းႁႅၵ်ႈၸတ်းတီႈ ဝဵင်းမေႃလမႅင်ႇ၊ ၵမ်းသွင် ဝဵင်းတူၼ်ႈတီး၊ ၵမ်းသၢမ် ဝဵင်းႁႃးၶႃး၊ ၵမ်းသီႇ ဝဵင်းမျွၵ်ႉဢူး၊ ၵမ်းႁႃႈ ဝဵင်းလွႆၶေႃ သေ ၵမ်းၼႆႉ ဝဵင်းၽႃဢၢင်ႇ ငဝ်ႈမိူင်းယၢင်းၽိူၵ်ႇ ပဵၼ်ၵမ်းထူၼ်ႈႁူၵ်း။