ႁူင်းပွႆႇသဵင်တႆးၵဵင်းမႆႇ AM 1476 KHz ၸတ်းပၢင်ၾိုၵ်းလိုမ်ႉၽိူမ်ႉထႅမ်ၼမ်ႉၵတ်ႉ ၽူႈၸတ်းလၢႆးၵၢၼ်လႄႈ ၵူၼ်းၼုမ်ႇၽူႈသူၼ်ၸႂ်သႅၼ်းႁုၼ်ႈမႂ်ႇ ပိူဝ်ႈႁႂ်ႈၵိူတ်ႇဢွၵ်ႇၽူႈၸတ်းလၢႆးၵၢၼ်ၵတ်ႉၵျႃႉမိူဝ်းၼႃႈ။
ဝၼ်းတီႈ 25 – 27/04/2018 ႁူင်းပွႆႇသဵင်ၸၢတ်ႈၸိုင်ႈမိူင်းထႆး ဢၼ်ပိုၼ်ၽၢဝ်ႇပွႆႇသဵင်ၾၢႆႇၽႃႇသႃႇၸၢဝ်းၶိူဝ်း ၼၼ်ႉ ၸတ်းႁဵတ်းပၢင်ၾိုၵ်းလပ်ႉၼမ်ႉၵတ်ႉ ၽူႈၸတ်းလၢႆးၵၢၼ်လႄႈ ၽူႈဢၼ်တေၸၢင်ႈၶဝ်ႈႁူမ်ႈပႃးၸွႆႈထႅမ် ၼႂ်းတွၼ်ႈလၢႆးၵၢၼ်မိူဝ်းၼႃႈ တီႈ Woodfield Resort ၵဵင်းမႆႇၸိုင်ႈထႆး။ မီးၸဝ်ႈၼႃႈတီႈၽူႈယႂ်ႇၵူၼ်းလူင်၊ ၽူႈ ၸတ်းလၢႆးၵၢၼ်လႄႈ တူဝ်တႅၼ်းၸၢဝ်းၶိူဝ်းၶဝ်ႈႁူမ်ႈ 50 ပၢႆ။
ၼၢင်းသၢဝ်ၶျၼိသႃ ၶျူမ်ႊသိၼ်ႊ ၽူႈပွင်ၵၢၼ်ႁူင်းပွႆႇသဵင်သေႃဝေႃးထေႃး AM 1476 KHz လၢတ်ႈဝႃႈ“ ႁူင်းပွႆႇ သဵင်ႁဝ်းၶႃႈၼႆႉ တေလႆႈဝႃႈပဵၼ်ႁူင်းပွႆႇသဵင် ဢၼ်ပိုၼ်ၽၢဝ်ႇ ၽႃသႃၸၢဝ်းၶိူဝ်း ၼမ်လိူဝ်ပိူၼ်ႈ ၼႂ်းၵုၼ်ဢေႊ သျိူဝ်ႊ။ ယိူင်းဢၢၼ်းဢၼ်မီးမႃးႁူင်းပွႆႇသဵင်ၼႆႉ ပိူဝ်ႈႁႂ်ႈၸၢဝ်းၶိူဝ်းလႂ်ၸၢဝ်းၶိူဝ်းၼၼ်ႉ လႆႈႁပ်ႉႁူႉၶၢဝ်ႇငၢဝ်းတၢင်း ႁူႉတၢင်းႁၼ် ပိူဝ်ႈၸၢင်ႈလႆႈႁူႉၸွတ်ႇႁၼ်ၵႂၢင်ႈ၊ ပဵၼ်သိုဝ်ႇၵၢင်ၼႂ်းၵႄႈလူင်ပွင်ၸိုင်ႈလႄႈ ၸၢဝ်းၶိူဝ်းၼႂ်းၽႃသႃၶွင်တူဝ်ၵဝ်ႇၸိူဝ်းၼႆႉ” ဝႃႈၼႆ။
ၼႂ်းပၢင်ၼႆႉ ပူင်သွၼ်ပၼ် လွင်ႈၵၢၼ်ၶၢဝ်ႇ၊ လွင်ႈတိုဝ်းၵမ်သိုဝ်ႇ၊ လၢႆးတႅမ်ႈၶၢဝ်ႇ၊ လၢႆးပိုၼ်ၽၢဝ်ႇၶၢဝ်ႇငၢဝ်း၊ လွၵ်းလၢႆးၵၢၼ်ပွႆႇသဵင်၊ ပိူင်ၵၢၼ်ၸတ်းလၢႆးၵၢၼ်၊ ထွႆႈၵႂၢမ်းလႄႈ လွင်ႈဝႆႉဝၢင်းၸႂ်ၽွင်းပွႆႇသဵင်၊ လၢႆးပူၵ်းပွင်သိုဝ်ႇႁႂ်ႈၶိုတ်း ၸွမ်းၵၢပ်ႈပၢၼ်ၸိူဝ်းၼႆႉ။
ၼၢင်းမူဝ်ၶၢဝ်ၼူၼ်း ၽူႈၸတ်းလၢႆးၵၢၼ်ၾၢႆႇတႆး ႁူင်းပွႆႇသဵင် သေႃဝေႃးထေႃး AM 1476 KHz လၢတ်ႈဝႃႈ – “ဢၼ်တႆးႁဝ်းလႆႈႁူမ်ႈၸတ်းလၢႆးၵၢၼ်တီႈၼႆႈၵေႃႈ တေလႆႈဝႃႈပဵၼ်တိုဝ်ႉတၢင်းလီတႄႉတႄႉ။ တႃႇၸၢင်ႈလႆႈပိုၼ် ၽၢဝ်ႇၶၢဝ်ႇငၢဝ်းတၢင်းႁူႉတၢင်းႁၼ်ယိုၼ်ႈၸူးထိုင်ပီႈၼွင်ႉႁဝ်း။ ၵွပ်ႈၼၼ်လႄႈ ၼင်ႇႁိုဝ်လၢႆးၵၢၼ်ႁဝ်းတေၶိုၼ်ႈယႂ်ႇယိုၼ်းယၢဝ်းၵႂႃႇၼၼ်ႉ ယွၼ်းႁႂ်ႈပီႈၼွင်ႉႁဝ်းၶႃႈ ဢွၼ်ၵၼ်ပၼ်ႁႅင်း ၸုင်ၸၼ်ၵၼ်ၶိုၼ်ႈယႂ်ႇၵႂႃႇမိူဝ်းၼႃႈသေ ၵမ်း ”ဝႃႈၼႆ။
ႁူင်းပွႆႇသဵင်သေႃဝေႃးထေႃးၼႆႉ လူင်ပွင်ၸိုင်ႈထႆးလႆႈႁူမ်ႈမိုဝ်းၵၼ်တင်း လူင်ပွင်ၸိုင်ႈမိူင်းဢမေႊရီႊၵႃႊသေတႄႇပွႆႇသဵင်မိူဝ်ႈဝၼ်းတီႈ 1 September 1968 ၽွင်းၼၼ်ႉမီး 3 ၸၢဝ်းၶိူဝ်းမိူၼ်ၼင်ႇၸၢဝ်းၶိူဝ်းမူင်ႉ၊ မဵၼ်ႉ၊ ယၢင်း ၸိူဝ်းၼႆႉ။ ဝၢႆးမႃးမီးမႃးထႅင်ႈလၢႆးၵၢၼ်ၽႃသႃလႃးႁူႇ၊ လီသူး၊ ဢႃးၶႃႇလႄႈ တႆး။ မိူဝ်းၼႃႈမႃးတေမီးမႃးထႅင်ႈလၢႆးၵၢၼ်ၽႃသႃတဢၢင်းတင်းဝႃႉ။ ၶပ်းမၢႆၶၢဝ်းယၢမ်းၽႃသႃၸၢဝ်းၶိူဝ်းတႄႉ 05:00 – 06:00 ပဵၼ်ၽႃသႃမူင်ႉ၊ 06:00 – 07:00 မဵၼ်ႉ၊ 07:30 – 08:00 လီႇသူး၊ 08:00 – 09:00 ဢႃးၶႃႇ၊09:00 – 10:00 ယၢင်း၊ 10:00 -11:00 တႆး၊ 11:00 – 12:00 ပဵၼ်ၽႃသႃလႃးႁူႇၼႆယဝ်ႉ။
