လုၵ်ႈဢွၼ်ႇၸၢႆးၵိၼ်ၸၢင်ႈလဵင်ႉဝူဝ်းတီႈၸႄႈဝဵင်းလႃႈသဵဝ်ႈ 2 ၵေႃႉ ႁၢႆၵႂႃႇလႆႈ 10 ဝၼ်းပၢႆ ယဝ်ႉ သွၵ်ႈႁႃပႆႇႁၼ်ၶိုၼ်း။

လုၵ်ႈဢွၼ်ႇၼႆႉႁၢႆၵႂႃႇၸဵမ်မိူဝ်ႈ ဝၼ်းတီႈ 25/6/2023 ။ တင်းသွင်ၵေႃႉလုၵ်ႉတၢင်းဝၢၼ်ႈ မႃးၵိၼ်ၸၢင်ႈလဵင်ႉဝူဝ်း တီႈဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ၊ တေႃႇထိုင်ယၢမ်းလဵဝ်ႁၢႆၵႂႃႇလႆႈ 10 ဝၼ်းပၢႆ ယဝ်ႉ ယင်းပႆႇႁၼ်ၶိုၼ်း။

ၵူၼ်းပိုၼ်ႉတီႈၸႄႈဝဵင်းလႃႈသဵဝ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ လုၵ်ႈဢွၼ်ႇဢၼ်ႁၢႆၵႂႃႇၼႆႉ ပဵၼ်လုၵ်ႈဢွၼ်ႇ တဢၢင်းယူႇတၢင်းလွႆ။ ယူႇဝၢၼ်ႈလႂ်တေႉတေႉတႄႉ ဢမ်ႇႁူႉ။ မႃးၵိၼ်ၸၢင်ႈလဵင်ႉဝူဝ်း တီႈၼမ်ႉပွင်ႈ ၼႆႉႁၼ်မီး 3 ၵေႃႉ ။ တႃႇ 2 ၵေႃႉ ဢၼ်ႁၢႆၵႂႃႇၼႆႉသမ်ႉ မီးၵူၼ်းဢဝ်ရူတ်ႉ သၢမ်လေႃႉမႃးတၢင်ႇၵႂႃႇသေ ဢမ်ႇႁၼ်ၶိုၼ်းပွၵ်ႈမႃး။ ႁွင်ႉၵၼ်ၵႂႃႇတၢင်းလႂ်တႄႉဢမ်ႇႁူႉ။  ၵူၼ်းဝၢၼ်ႈ  ၵႂႃႇထၢမ်ၸွမ်းၵဵၵ်ႉမၢၼ်ႈ ဢၼ်ပႂ်ႉၸွမ်းဝၢၼ်ႈၸွမ်းဝဵင်းၸိူဝ်းၼၼ်ႉၵေႃႈ ဢမ်ႇမီးၽႂ်ႁၼ်” – ဝႃႈၼႆ။

လုၵ်ႈဢွၼ်ႇ ဢၼ်ႁၢႆ ၵႂႃႇၼႆႉ ဢႃယု 10 ပီၵေႃႉၼိုင်ႈလႄႈ ဢႃယု 18 ပီ ၵေႃႉၼိုင်ႈ ရူတ်ႉသၢမ်လေႃႉဢၼ်ၶဝ်သွင်ၵေႃႉ ၶီႇၵႂႃႇၵေႃႈ ဢမ်ႇႁၼ်ၵိုတ်းဝႆႉတီႈလႂ် မိူဝ်ႈလဵဝ် ၵူၼ်းဝၢၼ်ႈ  ၵႂႃႇတိူင်ႇလၢတ်ႈ ပလိၵ်ႈမၢၼ်ႈႁႂ်ႈ ၸွႆႈႁႃ ပၼ်ဝႆႉၼႆယဝ်ႉ။

ၵူၼ်းပိုၼ်ႉတီႈၸႄႈဝဵင်းလႃႈသဵဝ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၵေႃႉဢၼ်ႁေႃႈသၢမ်လေႃႉၼႆႉၵေႃႈ တိုၵ်ႉမႃးယူႇ တီႈၼမ်ႉပွင်ႈၼႆႉ 2 လိူၼ်ၼႆႉၵူၺ်း။ ႁဵတ်းႁိုဝ်လႄႈ ႁၢႆၵႂႃႇၼႆ ဢွၼ်ၵၼ်တူၵ်းၸႂ်ယူႇ။ယဝ်ႉၵေႃႈ ၶဝ်ဢမ်ႇမေႃလၢတ်ႈၵႂၢမ်းမၢၼ်ႈ ။ ဝၼ်းဢၼ်ၶဝ်ႁၢႆၼၼ်ႉ ဢွၼ်ၵၼ်လႄႇႁႃပေႃးၶႂ်ႈၸွတ်ႇ” – ဝႃႈၼႆ။

တင်းရူတ်ႉတင်းၵူၼ်းၶပ်း လႄႈလုၵ်ႈဢွၼ်ႇ ႁၢႆဝႆႉၸွမ်းၵၼ်မူတ်း ဝႃႈၼႆ။

သင်ဝႃႈ ထူပ်းႁၼ် လုၵ်ႈဢွၼ်ႇၸၢႆး 2 ၵေႃႉၼႆႉၼႆၸိုင် ၵပ်းသိုပ်ႇ မွၵ်ႇလၢတ်ႈတီႈ မၢႆၾူၼ်း 09 458 836 003 သေၵမ်းဝႃႈၼႆ။