ၵူၼ်းႁဵတ်းၵၢၼ် ပိၼ်ႇၽႃႇသႃႇ တီႈမူႇၸေႊ လႅၼ်လိၼ်တႆး-ၶႄႇ ႁၢမ်းငိုၼ်းလိူၼ်  3 လိူၼ်ပၢႆ ထိုင်မိူဝ်ႈလဵဝ်ပႆႇလႆႈ ယူႇယၢပ်ႇၵိၼ်းၸႂ်။

ၸဵမ်မိူဝ်ႈ ပိုတ်ႇၽၵ်းတူၶဝ်ႈမိူင်း လႅၼ်လိၼ်တႆး-ၶႄႇမႃး ၶၢဝ်းတၢင်း 3 လိူၼ်ပၢႆ ၵူၼ်းႁဵတ်းၵၢၼ် ပိၼ်ႇၽႃႇသႃႇ(ႁိုဝ်) လၢမ်ႈ ဢၼ်ၾၢႆႇလူင်ပွင်ၸိုင်ႈၶႄႇ ပၼ်ပုၼ်ႈၽွၼ်းဝႆႉၸိူဝ်းၼၼ်ႉ ၶၢတ်ႇငိုၼ်းလိူၼ်မႃး ထိုင်မိူဝ်ႈလဵဝ် ပႆႇယွၼ်းလႆႈ ၼႆယဝ်ႉ။

ၵူၼ်းၼႂ်းပိုၼ်ႉတီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းမူႇၸေႊ ၸိူဝ်းႁဵတ်းၵၢၼ်ပိၼ်ႇၽႃႇသႃႇ ၸွမ်းၵဵၵ်ႉၶဝ်ႈမိူင်းၸိူဝ်းၼၼ်ႉ ထိုင်မိူဝ်ႈလဵဝ် ဢမ်ႇလႆႈငိုၼ်း။ၽၵ်းတူႈၶဝ်ႈမိူင်း ပိုတ်ႇမႃးလႆႈ ၶၢဝ်းတၢင်း 3 လိူၼ်ပၢႆယဝ်ႉ။ၵၢၼ်တႄႉ မိူဝ်ႈၵူၼ်းဢမ်ႇပွင်ႇၵႂၢမ်းၶႄႇလိၵ်ႈၶႄႇၸိူဝ်းၼၼ်ႉ လူဝ်ႇၶဝ်ႈဢွၵ်ႈမိူင်းၼႆ ၶဝ်လႆႈတႅမ်ႈမၢႆပၼ် တႃႇတၢင်ႇပၼ်တီႈလုမ်းတီႈၸႆး ၸိူဝ်းၼႆႉ ” – ဝႃႈၼႆ။

ၵူၼ်းၸိူဝ်းႁဵတ်းၵၢၼ် ပိၼ်ႇၽႃႇသႃႇ ၸွမ်းၽၵ်းတူၶဝ်ႈမိူင်း လၢႆတီႈၼႂ်းၸႄႈဝဵင်းမူႇၸေႊ ပႆႇလႆႈႁပ်ႉငိုၼ်းလိူၼ် မိူၼ်ၼင်ႇ တီႈၽၵ်းတူႁေႃၶမ်းလူင် ၊ ၽၵ်းတူမၢၼ်ႈဝဵင်း ၊ ၽၵ်းတူၸၢင်ႉၽိူၵ်ႇ လႄႈ ၵဵၵ်ႉၵျိၼ်ႉသၢၼ်းၵျေႃႉ ၸဵမ်ၸိူဝ်းၼႆႉ။

ငိုၼ်းလိူၼ်ဢၼ်ၶၢတ်ႇဝႆႉၼႆႉ ၽူႈႁၢပ်ႇၵၢၼ်ၶုၼ်ၶဝ် တၢင်ႇယွၼ်းပၼ်သေတႃႉ ပႆႇလႆႈ ။  ၵူၼ်းႁဵတ်းၵိၼ်ၵၢၼ် ပိၼ်ႇၽႃႇသႃႇ ယၢပ်ႇၵိၼ်းတႃႇယူႇတႃႇၵိၼ်။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ဝႃႈတႄႉ ပေႃး ပိုတ်ႇၶူဝ် လႆႈၶၢဝ်းတၢင်း 3 လိူၼ်ယဝ်ႉၼႆ ၸင်ႇပၼ်။ ၵူၺ်းၼႃႇ မိူဝ်ႈလဵဝ် ပေႃးပူၼ်ႉ 3 လိူၼ်ယဝ်ႉ သမ်ႉပႆႇပၼ် ။ တၢင်ႇယွၼ်းၵေႃႈ ဢမ်ႇပႆႇပၼ် ။ ယၢပ်ႇၽိုတ်ႇ တႃႇယူႇတႃႇၵိၼ် ယၢပ်ႇၽိုတ်ႇ တႃႇလဵင်ႉလူ ၼႃႈႁိူၼ်း ” – ဝႃႈၼႆ။

ၽူႈႁၢပ်ႇၵၢၼ်ပိၼ်ႇၽႃႇသႃႇ ၸွမ်းၽၵ်းတူႈၶဝ်ႈမိူင်း လႅၼ်လိၼ်တႆး-ၶႄႇ ၸိူဝ်းၼႆႉ ၵမ်ႈၼမ် ပဵၼ်ၵူၼ်းပိုၼ်ႉတီႈသေ ၼိုင်ႈလိူၼ်လႂ် လႆႈငိုၼ်းလိူၼ် 3000 ယႂၼ်ႇ  လႆႈႁူႉၸွမ်းၼင်ႇၼႆ။