သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇ သိုၵ်းတႆးၵေႃႉၼိုင်ႈ ၶဝ်ႈလႄႇႁႃလၵ်ႉၶူဝ်းၶွင်ၵူၼ်းဝၢၼ်ႈ တီႈပၢင်မၢၵ်ႇၽႃႈၼႆၼၼ်ႉ ၾၢႆႇ RCSS ဝႃႈဢမ်ႇၸႂ်ႈၵူၼ်းသိုၵ်းၼႂ်းၸုမ်း။
ဝၼ်းတီႈ 24/04/2018 သိုဝ်ႇၶၢဝ်ႇ Chiang Mai News ပိုၼ်ၽၢဝ်ႇဝႃႈ – ပလိၵ်ႈ၊ ၸဝ်ႈၼႃႈတီႈ၊ ၾၢႆႇၽွင်းငမ်း ႁူမ်ႈၵၼ် တီႉၺွပ်း ၸၢႆးဢူ ဢႃယု 39 ပီ ပဵၼ်ၵူၼ်းလွႆၵေႃႇ ၸႄႈမိူင်းယၢင်းလႅင် ၽွင်းလႄႇႁႃလၵ်ႉၶူဝ်းၶွင်ၵူၼ်းဝၢၼ်ႈ ၊ ယိုတ်းလႆႈပႃးၵွင်ႈ 1 လဝ်း မၢၵ်ႇၵွင်ႈ 8 လုၵ်ႈ တီႈဝၢၼ်ႈ ၵွင်တဝ်ႈ မူႇ 10 ဢိူင်ႇၼႃးပူႇပွမ်ႈ ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် ၸိုင်ႈထႆးပွတ်းႁွင်ႇ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 3 RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵဵဝ်ႇလူၺ်ႈလွင်ႈ ၼႆႉ ႁဝ်းၶႃႈလႆႈၵပ်းသိုပ်ႇထၢမ်ၵၼ်ယဝ်ႉဝႃႈ ဢမ်ႇၸႂ်ႈၵူၼ်းႁဝ်း တူၺ်းၼႃႈတႃလႄႈ ၵၢၼ်ဝႆႉၶူၼ်ႁူဝ်ၵေႃႈႁူႉယဝ်ႉ၊ ၸိူင်ႉႁိုဝ်ၵေႃႈယဝ်ႉ လွင်ႈတၢင်းမၼ်းပဵၼ်ၸိူင်ႉႁိုဝ်တႄႉတႄႉ ဢၼ်ဝႃႈၼႆႉ ႁဝ်းၶႃႈတေၵပ်းသၢၼ်ၶႆႈငိူၼ်ႈမၼ်းၵႂႃႇထႅင်ႈ ” ဝႃႈၼႆ။
ပလိၵ်ႈၵေႃႈလၢတ်ႈဝႃႈ – “ ၸွမ်းၼင်ႇႁဝ်းၶႃႈတွင်ႈထၢမ်သေ လႆႈႁူႉဝႃႈ ၸၢႆးဢူၼႆႉ မိူဝ်ႈဢွၼ်တၢင်း ပဵၼ်သိုၵ်း ၼႂ်းၸုမ်း RCSS/SSA ဝၢႆးၼၼ်ႉလၵ်ႉပၢႆႈသိုၵ်းသေ ၵႂႃႇႁႃႁဵတ်းၵၢၼ်တၢင်းမိူင်းၵွၵ်ႇ ဝၢႆးမႃး ယူႇၶိုၼ်းတီႈၸႄႈဝဵင်းပၢင်မၢၵ်ႇၽႃႈ သိုၵ်းတႆးႁူႉၶၢဝ်ႇမၼ်းၸၢႆးသေ တီႈၺွပ်းၶဝ်ႈၶွၵ်ႈ တီႈငဝ်ႈၸိုင်ႈ လွႆတႆးလႅင်း ၽိူဝ်ပူၼ်ႉလွတ်ႈ ဢွၵ်ႇၶွၵ်ႈယဝ်ႉ မႃးလၵ်ႉၵွင်ႈၵူၼ်းဝၢၼ်ႈ တေႃႇပေႃးၺွပ်းလႆႈပွၵ်ႈ ၵမ်းၼႆႉ ” ဝႃႈၼႆ။
ၵဵဝ်ႇလူၺ်ႈလွင်ႈတၢင်းဢၼ်ၵိူတ်ႇၶိုၼ်ႈပွၵ်ႈၼႆႉသေ ၸဝ်ႈၼႃႈတီႈထႆးၸၼ်ႉသုင် ၸီႉသင်ႇၸဝ်ႈၼႃႈတီႈၼႂ်းပိုၼ်ႉတီႈ ႁႂ်ႈၵူတ်ႇထတ်းၶဵင်ႈၶႅင် ထဵတ်ႈထၢမ်ၵူၼ်းၶဝ်ႈ – ဢွၵ်ႇၼႂ်းပိုၼ်ႉတီႈ ဢၼ်တိတ်းၸပ်းလႅၼ်လိၼ်ၵူႈတီႈၼႆယဝ်ႉ ။