ပေႃႈမႄႈလုၵ်ႈဢွၼ်ႇ ႁဵတ်းပၢင်ၵုမ်ဢုပ်ႇဢူဝ်းၵၼ်သေ ဢွၼ်ၵၼ်ၵႂႃႇငူပ်ႉငီႉသိုၵ်းၶၢင် KIA ႁႂ်ႈလႆႈပိုတ်ႇႁူင်းႁဵၼ်းသွၼ်လိၵ်ႈလၢႆးၶိုၼ်း၊ သိုၵ်းၶၢင် ပၼ်ၶႂၢင်ႉပိုတ်ႇ ႁူင်းႁဵၼ်းၸၼ်ႉၵၢင် ၵူၺ်းၵႃႈတေလႆႈႁဵတ်းၸွမ်း ပိူင်ဢၼ်ၶဝ်တမ်းဝၢင်းပၼ်၊ လိူဝ်ၼၼ်ႉႁႂ်ႈသွၼ်လိၵ်ႈၸၢဝ်းၶိူဝ်းၽႂ်မၼ်းပႃး။
ဝၼ်းတီႈ 12/6/2023 ၼႆႉ သိုၵ်းၶၢင် KIA ပၼ်ၶႂၢင်ႉ ပိုတ်ႇၶိုၼ်းႁူင်းႁဵၼ်းၸၼ်ႉၵၢင် တီႈဢိူင်ႇမိူင်းယူႉ ၸႄႈဝဵင်းၵူတ်ႉၶၢႆ ၸႄႈ တွၼ်ႈမူႇၸေႊ ၸိုင်ႈတႆးပွတ်းႁွင်ႇ။ ၵူၺ်းၵႃႈ တေလႆႈႁဵတ်းၸွမ်းပိူင်ၶဝ် တမ်းဝၢင်းပၼ် လုၵ်ႈႁဵၼ်းၵူႈၵေႃႉ တေလႆႈသႂ်ႇ သိူဝ်ႈၶူဝ်း ၾိင်ႈထုင်းၸၢဝ်းၶိူဝ်းၽႂ်မၼ်းၶိုၼ်ႈ တေလႆႈပူင်သွၼ်ပႃး လိၵ်ႈၸၢဝ်းၶိူဝ်းၽႂ်မၼ်းၸွမ်း မိူၼ်ၼင်ႇ လိၵ်ႈတႆး၊ ၶၢင် လႄႈ တဢၢင်း ၸိူဝ်းၼႆႉ။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈဝၼ်းတီႈ 10 ၼႆႉ ယူႇတီႈ ၵူၼ်းဝၢၼ်ႈပေႃႈမႄႈလုၵ်ႈ ႁဵၼ်း ႁဵတ်းပၢင်ၵုမ်ၵၼ်သေ ႁႂ်ႈၽူႈယႂ်ႇၵူၼ်းလူင် တၢင်တူဝ်ပေႃႈမႄႈလုၵ်ႈႁဵၼ်း ၵႂႃႇငူပ်ႉၺီႉ လၢတ်ႈၼႄလွင်ႈယၢပ်ႇၽိုတ်ႇၵူႈလွင်ႈသေ သိုၵ်းၶၢင်ၶဝ် ၸင်ႇပၼ်ၶႂၢင်ႉပိုတ်ႇၶိုၼ်း။ ယၢမ်းလဵဝ် တိုၵ်ႉလႆႈပိုတ်ႇမႃး မီးၶၢဝ်းတၢင်း 2-3 ဝၼ်းၵူၺ်းလႄႈ လုၵ်ႈႁဵၼ်းတႄႉ တိုၵ်ႉမႃးၶိုၼ်းမွၵ်ႈ 200 ၼႆႉၵူၺ်း ။ ၵူႈပီတႄႉ ဢမ်ႇယွမ်း 500 ၶႃႈ။ ပိူင်သွၼ်ႁဵၼ်းတႄႉ ၸႂ်ႉ ၶိုၼ်းမိူၼ်ၵဝ်ႇ ၵူၺ်းၵႃႈ တေလႆႈပူင်သွၼ်ပႃးလိၵ်ႈၸၢဝ်းၶိူဝ်းၽႂ်မၼ်း။ မေႃသွၼ်တႄႉ ပဵၼ်မေႃသွၼ် ၼႂ်းပိုၼ်ႉတီႈ ၶိုၼ်း ပူင်သွၼ်ပၼ်ၵႂႃႇ”- ဝႃႈၼႆ။
ႁူင်းႁဵၼ်းၸၼ်ႉၵၢင် တီႈဢိူင်ႇမိူင်းယူႉၼႆႉ ယူႇတီႈ ၵူၼ်းမိူင်းပိုၼ်ႉတီႈ ႁူမ်ႈၵၼ်သေ ႁဵတ်းသၢင်ႈဝႆႉ တႃႇလုၵ်ႈဢွၼ်ႇ ၼႂ်းဢိူင်ႇ ပၢင်ၵႆႇ (ပၢင်လေႃႉ) လႄႈ ဢိူင်ႇမိူင်းယူႉ မႃးၶိုၼ်ႈႁဵၼ်းသွၼ်။ ယဝ်ႉၵေႃႈ မေႃသွၼ်သမ်ႉ တေပဵၼ်မေႃသွၼ် ၼႂ်းပိုၼ်ႉတီႈ ၶိုၼ်းပူင်သွၼ်ပၼ်ၵႂႃႇၶိုၼ်း ယၢမ်းလဵဝ် မေႃသွၼ်ၼႂ်းပိုၼ်ႉတီႈသမ်ႉ ၸၢဝ်းတႆး 4 ၵေႃႉ၊ ၶၢင် 3 ၵေႃႉလႄႈ တဢၢင်း 4 ၵေႃႉ ၼႆယဝ်ႉ။
ပူၼ်ႉမႃး မိူဝ်ႈဝၼ်းတီႈ 5/6/2023 ၼၼ်ႉ ယူႇတီႈ သိုၵ်းၶၢင် KIA မႃးသင်ႇပိၵ်ႉႁူင်းႁဵၼ်း ၸၼ်ႉၵၢင်ၼႆႉပႅတ်ႈ လုၵ်ႈ ႁဵၼ်း 300 ပၢႆ လႆႈၵၢတ်ႈၵၢၼ်ႁဵၼ်းမႃး ယွၼ်ႉပဵၼ်ပိူင်ၵၢၼ်သွၼ်ႁဵၼ်း တႂ်ႈသိုၵ်းမၢၼ်ႈ ၵုမ်းၵမ် ဝႃႈၼႆ။
“ဢၼ်ၶဝ်ၶႂၢင်ႉပိုတ်ႇၶိုၼ်းၼႆႉ လီတႄႉၶႃႈ လုၵ်ႈဢွၼ်ႇလႆႈၶိုၼ်ႈႁဵၼ်းၶိုၼ်း တီႈၼႆႈၼႆႉ ပဵၼ်ႁူင်းႁဵၼ်းၸၢဝ်းၶိူဝ်းၼမ် လႆႈမႃး ပိုင်ႈဢိင်ၶိုၼ်ႈႁဵၼ်း။ ယူႇတီႈပေႃႈမႄႈလုၵ်ႈႁဵၼ်းၵေႃႉၼိုင်ႈသေ ငိၼ်းၸူမ်းထိုင်ၵူၼ်းလူင် ၵူႈၾၢႆႇလႄႈ မေႃသွၼ်ၵူႈၵေႃႉ ဢၼ်မီးၸႂ်လီမဵတ်ႉတႃႇပၼ်လုၵ်ႈလၢင်းႁဝ်း။ တႃႇတေပေႉၽူႈၶဵၼ် ႁဝ်းၼၼ်ႉ ႁဝ်းတေလႆႈၶႅၼ်ႇသေၶဝ်ပဵၼ်လၢႆပၢၵ်ႇပုၼ်ႈ ၵွၼ်ႇ။ လိၵ်ႈမၢၼ်ႈ၊ ၵႂၢမ်းမၢၼ်ႈ ႁဝ်းလူဝ်ႇၶႅၼ်ႇလိူဝ်ၶဝ်ၵွၼ်ႇ ႁဝ်းၸင်ႇတေႁူႉၸွမ်းလွၵ်းလိင်ႉၶဝ်”- ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈ။
ၸွမ်းၼင်ႇ မေႃသွၼ် လႆႈၵဵပ်းသဵၼ်ႈမၢႆ လုၵ်ႈႁဵၼ်းဝႆႉ ၵွၼ်ႇတေပိုတ်ႇႁူင်းႁဵၼ်းၸၼ်ႉၵၢင် မိူဝ်ႈႁၢင်လိူၼ်မေႊၼႆႉ တင်း မူတ်း 341 ၵေႃႉ။ ၸၼ်ႉငဝ်ႈ (မူႇလ) ထိုင် ၸၼ်ႉၵဝ်ႈ ။ မိူဝ်းဝၼ်းတီႈ 5 ၼႆႉ သိုၵ်းၶၢင် သင်ႇပိၵ်ႉႁူင်းႁဵၼ်းသေ လႆႈပိၵ်ႉမႃးၶၢဝ်း တၢင်းဝူင်ႈပၢႆယဝ်ႉ ၸင်ႇပိုတ်ႇၶိုၼ်းလႄႈ တေႃႇထိုင်ယၢမ်းလဵဝ် လုၵ်ႈႁဵၼ်း မၢင်ၸိူဝ်းပႆႇႁတ်းမႃးၶိုၼ်ႈ။ ယၢမ်းလဵဝ် လုၵ်ႈႁဵၼ်း ၸိူဝ်းမႃးၶိုၼ်ႈႁဵၼ်းဝႆႉတႄႉ တေမီးႁူဝ်ၵူၼ်း 115 ၵေႃႉ ၼႆယဝ်ႉ။
ၼႂ်းဢိူင်ႇမိူင်းယူႉၼႆႉ မီးဝႆႉ ႁူင်းႁဵၼ်းၸၼ်ႉငဝ်ႈထႅင်ႈ တင်းမူတ်း 6 လင် ၼၼ်ႉတႄႉ သိုၵ်းတဢၢင်း TNLA ယိုတ်းဢဝ်ပဵၼ် ႁူင်းႁဵၼ်းၶဝ်သေ ၸႂ်ႉမေႃသွၼ် ၸိူဝ်းႁဵတ်း CDM ၼၼ်ႉ ပူင်သွၼ်လိၵ်ႈၵႂႃႇ တႄႇဢဝ် ပီ 2022 ၼႆႉမႃး။ ယဝ်ႉ ၵေႃႈ ႁူင်းႁဵၼ်းၸၼ်ႉၵၢင် တီႈမိူင်းယူႉၼႆႉထႅင်ႈ လင်ၼိုင်ႈ ၼႆယဝ်ႉ။
ဢိူင်ႇမိူင်းယူႉၼႆႉ တေမီးမူႇဝၢၼ်ႈ မွၵ်ႈ 13 ဝၢၼ်ႈ မီးၼႂ်းၵႄႈၵူတ်ႇၶၢႆ – ၼမ်ႉၽၵ်းၵႃ ယၢၼ်ဝဵင်းၵူတ်ႉၶၢႆ မွၵ်ႈ 19 လၵ်း မီးဝႆႉ ၸဵင်ႇႁွင်ႇဝၼ်းတူၵ်း ဝဵင်းၵူတ်ႉၶၢႆ။ ယဝ်ႉၵေႃႈ မီးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း မိူၼ်ၼင်ႇ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA ၊ သိုၵ်းမၢၼ်ႈ ယိုတ်းမိူင်းလႄႈ သိုၵ်းတႆး SSPP ၸိူဝ်းၼႆႉ တူင်ႉၼိုင်ယူႇဝႆႉ။
