ၵူၼ်းထုင်ႉပူင်း ၺႃးၵူၼ်းဢမ်ႇႁူႉၾၢႆႇ မႃးၶၢႆၼမ်ႉႁွမ်သေ လွၵ်ႇၵိၼ်ငိုၼ်း

ၵူၼ်းထုင်ႉပူင်း  ၺႃးၵူၼ်းဢမ်ႇႁူႉၾၢႆႇ 4 ၵေႃႉ မႃးလႄႇႁႃၶၢႆၼမ်ႉႁွမ်သေ လွၵ်ႇၵိၼ်ငိုၼ်းလႄႈ သုမ်းၸွမ်းၼမ်။

မိူဝ်ႈဝႃး ဝၼ်းတီႈ 4/6/2023 မီးၵူၼ်းဢမ်ႇႁူႉၾၢႆႇ 4 ၵေႃႉ မႃးလႄႇႁႃၶၢႆ ၼမ်ႉႁွမ် တီႈဝၢၼ်ႈၶႂၢင် ၼႂ်းထုင်ႉပူင်းၼၼ်ႉသေ ၵူၼ်းဝၢၼ်ႈၵမ်ႈၽွင်ႈ ၺႃးယွၵ်ႇလႅၼ်သေ သဵင်ႈငိုၼ်းတွင်းၸွမ်းတၢင်းၼမ်ၼႆယဝ်ႉ။

ၼၢင်းယိင်းထုင်ႉပူင်းဢၼ်ၺႃးယွၵ်ႇလႅၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ဝႃႈ ပေႃးသိုဝ်ႉၼမ်ႉႁွမ်ၵေႃႈ တေလႆႈၸူၵ်းမႄး ဝႂ်ၸၢမ်းၵၢမ်ႇပႃးၼႆဢေႃႈ။ဝႂ်ၸၢမ်းၵၢမ်ႇၼၼ်ႉ ဢမ်ႇလူဝ်ႇသဵင်ႈငိုၼ်းၸွမ်းၼႆၼၼ်ႉၼႃႇ။ယဝ်ႉၵေႃႈ ပေႃးမႄးဢမ်ႇပွၵ်ႈ ပေႃးဢမ်ႇထုၵ်ႇဝႂ်ၸၢမ်းၵၢမ်ႇၼၼ်ႉၼႆ တေၶိုၼ်းသႂ်ႇပၼ်ငိုၼ်းၾူၼ်းၶိုၼ်း 2 မိုၼ်ႇ ၼႆဝႃႇ။ၶႃႈၵေႃႈဝႃႈ ၶႃႈဢမ်ႇမီးငိုၼ်းၼႃႈ ဝႃႈၼႆသေ ၸူၵ်းဝႂ်ၸၢမ်းၵၢမ်ႇ 3 ဝႂ် ။ၵမ်းၼၼ်ႉသမ်ႉဝႃႈ ႁႂ်ႈၸၢႆႇပၼ် ဝႂ်ၸၢမ်းၵၢမ်ႇ ၼိုင်ႈဝႂ်လႂ် ငိုၼ်း 2 သႅၼ် ၼႆဢေႃႈ။ပေႃး ဢမ်ႇၸၢႆႇလႆႈၵေႃႈ 3 ဝႂ် ပၼ် 2 သႅၼ်ၵေႃႈလႆႈ ၼႆဢေႃႈ  ” – ဝႃႈၼႆ။

ၵူၼ်းဢၼ်ၺႃး ယွၵ်ႇလႅၼ်သဵင်ႈငိုၼ်းၸွမ်း ၼႆႉ မီး 4 ၵေႃႉသေ ၼိုင်ႈၵေႃႉလႂ် သုမ်းငိုၼ်း   190,000  ထိုင်  300,000 ပျႃးၼႆယဝ်ႉ။

ၼၢင်းယိင်းထုင်ႉပူင်းဢၼ်ၺႃးယွၵ်ႇလႅၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းတၢင်ႇဝၢၼ်ႈၵေႃႈ ၺႃးလႅၼ်ဢေႃႈ။ မိူၼ်ၼင်ႇ ၵူၼ်းဝၢၼ်ႈၽၵ်းၵုမ်ႇၼၼ်ႉၼႆ သဵင်ႈပဵၼ် 3 သႅၼ်ၶႃႈဝႃႇ ။ မၢင်ၸိူဝ်းၵေႃႈ သႅၼ်ပၢႆ ၵဝ်ႈမိုၼ်ႇၼႆႉၼႆဢေႃႈ။ၵူၼ်းလႅၼ်ၸိူဝ်းၼႆႉ လုၵ်ႉတၢင်းလႂ်မႃးၵေႃႈ ဢမ်ႇႁူႉ ။လူဝ်ႇလႆႈ ဝႆႉၾၢင်ႉလီလီၵူၺ်းယဝ်ႉ  ” -ဝႃႈၼႆ။

ၶၢဝ်းတၢင်းသိုၵ်းမၢၼ်ႈ ယိုတ်းမိူင်းမႃးၼႆႉ ၵူၼ်းဢမ်ႇႁူႉၾၢႆႇ ၸိူဝ်းလွၵ်ႇၵိၼ်ငိုၼ်း မီးမႃးၵူႈတီႈၵူႈတၢင်း မၢင်ၸိူဝ်း ၺႃးယွၵ်ႇလႅၼ် ၼိူဝ်ဢွၼ်ႊလၢႆးသေ မၢင်ၸိူဝ်းၺႃးၵူၼ်းလွၵ်ႇငိုတ်ႈၾၢႆႇၼွၵ်ႇသေ သုမ်းငိုၼ်းတွင်းၸွမ်း။