ၵဵဝ်ႇလူၺ်ႈၶၵ်ႉၵၢၼ်ငမ်းယဵၼ်မိူင်းႁူမ်ႈတုမ်ႁဝ်းၶႃႈၼႆႉ ဢၼ်ပဵၼ်လူင်ပွင်ၸိုင်ႈ တပ်ႉမတေႃႇသိုၵ်းမၢၼ်ႈလႄႈ ဢိၵ်ႇလူၺ်ႈပႃးတင်းၸုမ်းၸၢဝ်းၶိူဝ်းယိပ်းၵွင်ႈၵၢင်ႇ တင်းမူတ်းတင်းသဵင်ႈ သိုဝ်ႈၽႂ်တၼ်းမၼ်း ႁူမ်ႈၵၼ်ၶတ်းၸႂ်ယူႇၼႆ ႁဝ်းၶႃႈတေႁၼ်ၵၼ်ယူႇ။ ၵူၺ်းၵႃႈ ၸိူဝ်းဢၼ်လူင်းလၢႆးမိုဝ်းၵိုတ်းတိုၵ်းယဝ်ႉၵေႃႈ လူင်းသေ၊ ၸိူဝ်းဢၼ်တိုၵ်ႉလူင်းလၢႆးမိုဝ်းပႆႇယဝ်ႉတူဝ်ႈသေယဝ်ႉ သမ်ႉတိုၵ်ႉၶတ်းၸႂ် ပိူဝ်ႈတႃႇၶိုပ်ႈၼႃႈလႆႈထႅင်ႈၼၼ်ႉၵေႃႈတေမီး၊ မၢင်ၸုမ်းၸိူဝ်းပႆႇလႆႈဢုပ်ႇၵၼ်လၢင်းလၢင်းၵေႃႈတေမီး။

ၼႂ်းၼင်ႇၼၼ် မိူၼ်ၸိူင်ႉပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးၼႆၵေႃႈ လႆႈလူင်းလၢႆးမိုဝ်း ပိူဝ်ႈတႃႇၵိုတ်းတိုၵ်းၵၼ် တင်းလူင်ပွင်ၸိုင်ႈ တင်းတပ်ႉမတေႃႇၼၼ်ႉ ၸဵမ်မိူဝ်ႈလိူၼ်ၵျႅၼ်ႊၼိဝ်ႊရီႊ ပီ 2012 ပုၼ်ႉ။ ၼႂ်းၶၢဝ်းဝၼ်းမိူဝ်ႈလဵဝ်ၼႆၵေႃႈ ယူႇတီႈၶွမ်ႊမသျိၼ်ႊလွင်ႈငမ်းယဵၼ် မိူင်းႁူမ်ႈတုမ်သေယဝ်ႉ လႆႈဢုပ်ႇဢူဝ်းတင်းၸုမ်း UNFC ၊ မိူဝ်ႈ UNFC မႃးႁူပ်ႉၵၼ်တင်းၶဝ်ၵမ်းတီႈ 6 ၶဝ်ႈတၢင်းၵၢၼ်ၼၼ်ႉလႄႈသင်၊ ၼႂ်းလိူၼ်ၼႆႉ ဢၼ်မႃးႁူပ်ႉၵၼ်ထႅင်ႈ ပၢင်ၵုမ်ၼွၵ်ႈလႅၵ်ႈမၼ်းၸိူဝ်းၼၼ်ႉလႄႈသင်၊ လႆႈႁၼ်ၽူႈတၢင်တူဝ်ၾၢႆႇ ပႃႇတီႇမႂ်ႇသုင်ၸိုင်ႈတႆး SSPP ၵေႃႈၶဝ်ႈႁူမ်ႈပႃး။

ပဵၵ်ႉသမ်ႉဝႃႈ SSPP/SSA ၼႆႉ ယွၼ်းထွၼ်တူဝ်ဢွၵ်ႇဝႆႉၼႂ်း UNFC ၼႆသေတႃႉၵေႃႈ တႃႇတေႁပ်ႉဝႃႈၶဝ်ဢွၵ်ႇႁိုဝ် ဢမ်ႇဢွၵ်ႇလုမ်းလုမ်းဢၼ်ဝႃႈၼၼ်ႉ မိူဝ်ႈလႂ်ထိုင်ပၢင်ၵုမ်လူင်ၶွပ်ႈၶူပ်ႇမႃး ၸင်ႇတေၵွႆႈတႅပ်းတတ်းၼႆလႄႈ ႁၢၼ်ႉတေႃႇဝၼ်းမိူဝ်ႈၼႆႉတႄႉ ၶဝ်ဝႃႈပႃႇတီႇမႂ်ႇသုင်ၸိုင်ႈတႆးၼႆႉ တိုၵ်ႉမီးယူႇၼႂ်း UNFC ၵူၺ်းၼႆၵေႃႈဝႃႈလႆႈ။ ၵွပ်ႈပိူဝ်ႈၸိူင်ႉၼႆ သင်ၸိူဝ်ႉဝႃႈပဵၼ်မႃးလွင်ႈထုၵ်ႇမေႃပေႃးၵႂၢမ်းၵၼ်၊ လွင်ႈၶိုပ်ႈၼႃႈၼႆၵေႃႈ ယူႇတီႈပႃႇတီႇမႂ်ႇသုင်ၸိုင်ႈတႆးတႄႉ တေလႆႈၸၢမ်ႇပူၺ်ႈၼမ်ႉတွၼ်းၽွၼ်းလီမၼ်း လူၺ်ႈတင်း UNFC ယူႇ၊ ႁဝ်းၶႃႈႁၼ်ထိုင်ၼင်ႇၼၼ်။

ၵူၺ်းၵႃႈ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးလႄႈ တပ်ႉမတေႃႇသိုၵ်းမၢၼ်ႈၼႆႉသမ်ႉ ႁူမ်ႈဝႃႈမီးလွင်ႈ တူၵ်းလူင်းၵၼ်မႃး ၸၼ်ႉၸႄႈမိူင်း ၸၼ်ႉၸိုင်ႈမိူင်းႁူမ်ႈတုမ် တင်းသွင်ၸၼ်ႉသေတႃႉၵေႃႈ ထိုင်မႃးငဝ်းလၢႆး ဝၼ်းမိူဝ်ႈၼႆႉ သွင်ပႃႈသွင်ၾၢႆႇမီးလွင်ႈတုမ်ႉတိူဝ်ႉၵၼ်မႃး၊ မီးလွင်ႈၵိတ်ႇၶႂၢင်၊ မီးလွင်ႈတိုၵ်းတေႃးၵၼ်ၼၼ်ႉၵေႃႈ ႁဝ်းၶႃႈလႆႈႁူႉလႆႈႁၼ်ၸွမ်း။

ၵဵဝ်ႇလူၺ်ႈပၢင်တိုၵ်း မိူဝ်ႈလိူၼ်သႅပ်ႊထႅမ်ႊၿိူဝ်ႊ ဝၼ်းတီႈ 10 ပူၼ်ႉမႃးၼႆႉၼႆၸိုင် လႆႈႁၼ်ၸဝ်ႈသိုၵ်းလူင် ၼၢႆႇဝိၼ်းဢွင်ႇ ဢၼ်ပဵၼ်ၶုၼ်ၽွင်း ႁွင်ႈၵၢၼ်ၾၢႆႇႁူမ်ႇလူမ်ႈလႄႈၾၢႆႇလႅၼ်လိၼ်မိူင်းတႆး ဢွၵ်ႇလိၵ်ႈသၢၼ်ၶတ်းထိုင် SSPP ႁၢဝ်ႈႁၢဝ်ႈႁႅင်းႁႅင်း။ မိူဝ်ႈလိူၼ်သႅပ်ႊထႅမ်ႊၿိူဝ်ႊ ဝၼ်းတီႈ 23 ယူႇတီႈ ၸဝ်ႈသိုၵ်းလူင်ၼၢႆႇဝိၼ်းဢွင်ႇ ဢွၵ်ႇလိၵ်ႈဝႆႉဝႃႈ- ပူၼ်ႉမႃးၼႂ်းဝၼ်းတီႈ 10 ၼၼ်ႉ ၵၢင်ၼႂ် 7 မူင်းၶိုင်ႈ ၶမယ 325 ဢွၵ်ႇမိူဝ်းၵူတ်ႇထတ်းၼႃႈတီႈၼႆလႄႈ လႆႈၽႃႇၺႃးၵၼ်တင်းတပ်ႉသိုၵ်းဝၢၼ်ႈႁႆး၊ ဢၼ်ၼုင်ႈဝႆႉၶူဝ်းသိုၵ်း ယူႊၼီႊၾွမ်ႊသေ ပႃးတင်းၶိူင်ႈလၢၵ်ႈၼၢၵ်ႈၵွင်ႈၵၢင်ႇၸေးမိုဝ်း၊ မီးၵူၼ်းမွၵ်ႈ 10 ၵေႃႉ၊ လႆႈပဵၼ်ပၢင်တိုၵ်းၵၼ်သေယဝ်ႉ ၵမ်းလိုၼ်းမႃး ၾၢႆႇဝၢၼ်ႈႁႆးလႆႈၶိုၼ်းထွႆလင်ၵႂႃႇသေ ပၢင်တိုၵ်းၼၼ်ႉယဝ်ႉတူဝ်ႈၵႂႃႇမိူဝ်ႈမွၵ်ႈ 11 မူင်းပၢႆ 35 မိၼိတ်ႉၼၼ်ႉ ဝႃႈၼႆ။

ၼႂ်းလိၵ်ႈဢၼ်မၼ်းၸဝ်ႈတႅမ်ႈဝႆႉၼၼ်ႉ ဢမ်ႇလၢတ်ႈဝႃႈ ပဵၼ်တီႈလႂ်ၼႆၵေႃႈ ၸွမ်းၼင်ႇႁဝ်းၶႃႈလႆႈႁူႉတႄႉ ပဵၼ်ၼႂ်းၵႄႈဝၢၼ်ႈသႅင်ႉၵႅဝ်ႉတင်းဝၢၼ်ႈပၢၼ်း ၼႂ်းၸႄႈဝဵင်းသီႇပေႃႉ။ ၵဵဝ်ႇလူၺ်ႈပၢင်တိုၵ်း ဢၼ်ပဵၼ်ၵႂႃႇၼႆႉ သေယဝ်ႉ ယူႇတီႈၶုၼ်ၽွင်းၼၼ်ႉ သိုပ်ႇၸီႉၸမ်ႈဝႆႉဝႃႈ- 1.ၾၢႆႇတပ်ႉသိုၵ်းဝၢၼ်ႈႁႆးၼႆႉ ဢမ်ႇၸွမ်းၶေႃႈတူၵ်းလူင်း ၵၼ်မႃး။ ၶေႃႈတူၵ်းလူင်းဢၼ်လႂ်ၼႆ မိူဝ်ႈပီ 2012 ဢၼ်သွင်ပႃႈသွင်ၾၢႆႇလႆႈလူင်းလၢႆးမိုဝ်းၵၼ်မႃး တီႈဝဵင်းၵဵင်းတုင်ၼၼ်ႉ ယူႇတီႈၾၢႆႇဝၢၼ်ႈႁႆးဢမ်ႇၸွမ်း၊ ယူႇတီႈၾၢႆႇဝၢၼ်ႈႁႆးပူၼ်ႉပႅၼ်ၶေႃႈတူၵ်းလူင်းၵၼ်ၼၼ်ႉ ဝႃႈၼႆ။

တီႈၼႆႈႁဝ်းၶႃႈတေလႆႈႁၼ် ၶေႃႈတူၵ်းလူင်း ဢၼ်ယူႇတီႈဝၢၼ်ႈႁႆး လႆႈလူင်းလၢႆးမိုဝ်း ၸၼ်ႉၸႄႈမိူင်း ၸၼ်ႉမိူင်းႁူမ်ႈတုမ်ဢၼ်ဝႃႈၼၼ်ႉ ဢမ်ႇတွၼ်ႉမီးမႃးတီႈၵဵင်းတုင်၊ ၵူၺ်းလႆႈပဵၼ်မႃးတီႈတူၼ်ႈတီး ဢၼ်ဝႃႈၼၼ်ႉ ၽႂ်ၵေႃႈႁူႉၸွမ်းယူႇ။ ၶေႃႈတူၵ်းလူင်းဢၼ်ၼၼ်ႉ ပဵၼ်မႃးမိူဝ်ႈပီ 2012 လိူၼ်ၵျႅၼ်ႊၼိဝ်ႊရီႊ 28 ဝၼ်း၊ တီႈဢၼ်ၶဝ်ၸဝ်ႈသွင်ပႃႈသွင်ၾၢႆႇတူၵ်းလူင်းၵၼ်ၼၼ်ႉ ပေႃးႁဝ်းမႃးလဵပ်ႈႁဵၼ်းတူၺ်းၼႆ တေလႆႈႁၼ်မီးၶေႃႈတူၵ်းလူင်းၵၼ် 5 ၶေႃႈ။

1.ၼႂ်းၵႄႈတပ်ႉမတေႃႇသိုၵ်းမၢၼ်ႈလႄႈ တင်းတပ်ႉသိုၵ်းၸိုင်ႈတႆး SSPP/SSA ၼႆႉ ႁူမ်ႈလႆႈၸႂ်ပိူဝ်ႈတႃႇ ၵိုတ်းတိုၵ်းၵၼ်ယဝ်ႉ။ 2.ယူႇတီႈတပ်ႉသိုၵ်းဝၢၼ်ႈႁႆးၼႆႉ တေလႆႈပၵ်းသဝ်းငဝ်ႈၸိုင်ႈတီႈဝၢၼ်ႈႁႆးသေ ၸိူဝ်းဢၼ်လႆႈၽႄဝႆႉလုၵ်ႈတပ်ႉမၼ်း ပၢင်သဝ်းမၼ်းၸိူဝ်းၼၼ်ႉၵေႃႈ တေလႆႈသိုပ်ႇယူႇၵႂႃႇၸူဝ်ႈၵႅပ်ႉၸူဝ်ႈၶၢဝ်း ၸွမ်းၼင်ႇငဝ်းလၢႆးယၢမ်းမိူဝ်ႈလဵဝ်ယူႇ။ 3.တေပိုတ်ႇလုမ်းၵပ်းသၢၼ်ၵၼ်ၵႂႃႇတီႈ တူၼ်ႈတီး၊ လႃႈသဵဝ်ႈ၊ ၶူဝ်လမ်ၸိူဝ်းၼႆႉသေယဝ်ႉ ၵပ်းသိုပ်ႇတိတ်းတေႃႇၵၼ်ၵႂႃႇ။ 4.ၸွမ်းၼင်ႇၼႂ်းၼႃႈတီႈ ဢၼ်တူၵ်းလူင်းၵၼ်ဝႆႉၼၼ်ႉသေ သင်ၸိူဝ်ႉဝႃႈမီးလွင်ႈတၢင်း လူဝ်ႇၶၢမ်ႈပူၼ်ႉၵႂႃႇၼႂ်းၼႃႈတီႈ ဢၼ်ဢမ်ႇတတ်းမၵ်းဝႆႉၼၼ်ႉၼႆၸိုင် သွင်ပႃႈသွင်ၾၢႆႇၼႆႉ တေလႆႈပွင်ႇၶၢဝ်ႇၵၼ်သေယဝ်ႉ တေလႆႈငူပ်ႉငီႉၵၼ်သေ ၸင်ႇၵွႆႈၵႂႃႇမႃး။ ဝႃႈတီႈသိုဝ်ႈ ပေႃးဝႃႈၾၢႆႇတပ်ႉမတေႃႇ တေၶဝ်ႈမႃးၼႂ်းၼႃႈတီႈ ဢၼ်ဝၢၼ်ႈႁႆးၵုမ်းၵမ်ၼၼ်ႉၼႆၵေႃႈ တေလႆႈပွင်ႇသေမႃး၊ ယူႇတီႈဝၢၼ်ႈႁႆး တေဢွၵ်ႇပူၼ်ႉၼွၵ်ႈၶွပ်ႇ ဢၼ်တတ်းမၵ်းဝႆႉၼၼ်ႉၼႆၵေႃႈ တေဢမ်ႇလႆႈပႃးၶိူင်ႈၵွင်ႈၵၢင်ႇလၢၵ်ႈၼၢၵ်ႈၼႆ တေမီးၶေႃႈတူၵ်းလူင်းၵၼ် ႁူဝ်ယွႆႈမၼ်းယူႇ။ 5.ၸွမ်းၼင်ႇလႆႈတူၵ်းလူင်းၵၼ်ဝႆႉၼႆႉ ဢဝ်ၼႆႉၵႂႃႇမိူဝ်းၼႃႈ ၼင်ႇႁိုဝ်ၼႂ်းၼႃႈတီႈတေၼိမ်တဵင်ႈ၊ တေၸၢင်ႈပွင်သၢင်ႈလႆႈၵၢၼ်ပူၵ်းပွင်ၼႂ်းၼႃႈတီႈ၊ ၼင်ႇႁိုဝ်ၾၢႆႇလုၵ်ႈတပ်ႉဝၢၼ်ႈႁႆး တေၸၢင်ႈႁႃႁဵတ်းၵိၼ် လဵင်ႉတွင်ႉၵႂႃႇမိူဝ်းၼႃႈ။ လိူဝ်ၼၼ်ႉၵေႃႈ ၼင်ႇႁိုဝ်တေပဵၼ်မႃးလွင်ႈငမ်းယဵၼ် ၼိမ်မၼ်ႈတေႃႇၸူဝ်ႈၵႂႃႇၼၼ်ႉ တေသိုပ်ႇဢုပ်ႇၵုမ်ၵၼ်ၵႂႃႇယူႇၼႆ- လႆႈႁၼ်ၶဝ်တူၵ်းလူင်းၵၼ်ဝႆႉ ၼင်ႇၼႆ။

တီႈၸၼ်ႉၸႄႈမိူင်းၼၼ်ႉ ၸဝ်ႈသိုၵ်းလူင်ဢွင်ႇတူႇ ဢၼ်ပဵၼ်ၶုၼ်ၽွင်း မိူဝ်ႈယၢမ်းၼင်ႇၼၼ် ဢွၼ်ႁူဝ်သေလူင်းလၢႆးမိုဝ်းဝႆႉ။ ၾၢႆႇဝၢၼ်ႈႁႆးသမ်ႉ ၸဝ်ႈၶုၼ်သႅင် ၵေႃႉပဵၼ်ၽူႈဢွၼ်ႁူဝ်ၾၢႆႇၵၢၼ်မိူင်း ဝၼ်းမိူဝ်ႈၼၼ်ႉ ဢွၼ်ႁူဝ်လူင်းလၢႆးမိုဝ်းဝႆႉ။ ၵူၺ်းၵႃႈ ၼႂ်းဝၼ်းၼၼ်ႉၵူၺ်းၼင်ႇၵဝ်ႇ တီႈၸၼ်ႉၸိုင်ႈမိူင်းသမ်ႉ ၾၢႆႇလူင်ပွင်ၸိုင်ႈပဵၼ်ဢူးဢွင်ႇတွင်း၊ ဢၼ်ပဵၼ်ႁူဝ်ၼႃႈၾၢႆႇဢုပ်ႇၵုမ်လွင်ႈငမ်းယဵၼ် ထီႉ 1 လႄႈပႃးတင်း ဢူးတဵင်းၸေႃႇ ဢၼ်ပဵၼ်ႁူဝ်ၼႃႈထီႉ 2 လူင်းလၢႆးမိုဝ်း။ လိူဝ်ၼၼ်ႉမီးထႅင်ႈ ၸဝ်ႈဢွင်ႇမျၢတ်ႈ ဢၼ်ပဵၼ်ၸွမ်းၽွင်းမိူဝ်ႈယၢမ်းၼင်ႇၼၼ်။ လူင်းလၢႆးမိုဝ်းဝႆႉသေယဝ်ႉ ၾၢႆႇဝၢၼ်ႈႁႆးသမ်ႉ မီးၸဝ်ႈၶိူဝ်းတႆး ပဵၼ်ႁူဝ်ၼႃႈလူင်၊ ၸဝ်ႈၶေႇမိၼ်ႇ ၽူႈပွင်ၵၢၼ်သိုၵ်း ပႃးတင်းၸဝ်ႈၶုၼ်သႅင် ၶဝ်သၢမ်ၸဝ်ႈဢွၼ်ႁူဝ်လူင်းလၢႆးမိုဝ်းဝႆႉ။

တီႈၼႆႈ ပေႃးမႃးတူၺ်းလွင်ႈၶဝ်ၸဝ်ႈလႆႈလူင်းလၢႆးမိုဝ်းၵၼ်ဝႆႉၼၼ်ႉ သွင်ပႃႈသွင်ၾၢႆႇၼႆႉ မၼ်းမီးဝႆႉ လၵ်းၵၢၼ်မၼ်း ဢၼ်တေလႆႈႁဵတ်းၸွမ်းၼင်ႇၵၼ်။ ၵူၺ်းၵႃႈ ၸွမ်းၼင်ႇႁဝ်းၶႃႈမႃးထတ်းႁၼ်တႄႉ ပၢင်တိုၵ်းသိုၵ်းသိူဝ်ဢၼ်ယၢမ်ႈပဵၼ်မႃး ၸွမ်းၼႂ်းၵႄႈ SSPP တင်းတပ်ႉမတေႃႇၼႆႉ ပဵၼ်ပၢင်တိုၵ်းမိူဝ်ႈလႂ်ၵေႃႈ ၵူၺ်းပဵၼ်ၼႂ်းၼႃႈလိၼ်ဢၼ်ဝၢၼ်ႈႁႆး ၵုမ်းၵမ်မႃးၸဵမ်မိူဝ်ႈမိုၼ်ႉၵဝ်ႇသဝ်းႁိုင်။ မိူၼ်ၸိူင်ႉၼႃႈတီႈၼႂ်းဝၢၼ်ႈပၢၼ်း လႄႈသင်၊ ၼႂ်းသႅင်ၵႅဝ်ႉလႄႈသင် ပဵၼ်ၼႃႈတီႈသိုၵ်းတႆးၵုမ်းၵမ်မႃး ၸဵမ်မိူဝ်ႈပူၼ်ႉမႃး 6-7 ပီ ဢၼ်ဝႃႈၼၼ်ႉ ပေႃးလဵပ်ႈႁဵၼ်းပိုၼ်း ၽႂ်ၵေႃႈႁူႉႁၼ်ၸွမ်းယူႇ။ ၵွပ်ႈပိူဝ်ႈၸိူင်ႉၼႆ ဢၼ်ဝႃႈယူႇတီႈၾၢႆႇတပ်ႉသိုၵ်းဝၢၼ်ႈႁႆး ပူၼ်ႉပႅၼ်မႃးဢၼ်ဝႃႈၼၼ်ႉတႄႉ တေဢမ်ႇၸႂ်ႈ။

ၾၢႆႇၼိုင်ႈတၢင်းၼိုင်ႈ ယူႇတီႈလူင်ပွင်ၸိုင်ႈဝၼ်းမိူဝ်ႈၼႆႉ ပဵၵ်ႉသမ်ႉဝႃႈမၼ်းပဵၼ်လူင်ပွင်ၸိုင်ႈ ဢၼ်ၾၢႆႇၼူၵ်ႉယုင်းၵုမ်းၵမ်ၼႆသေတႃႉၵေႃႈ ႁွင်ႈၵၢၼ်ၾၢႆႇႁူမ်ႇလူမ်ႈလႄႈလႅၼ်လိၼ် ၶွင်မိူင်းတႆးၼႆႉ မၼ်းၵူၺ်းမီးတႂ်ႈတပ်ႉသိုၵ်းၵုမ်းၵမ်ၵမ်းသိုဝ်ႈ၊ ၼႂ်းဢၼ်တပ်ႉသိုၵ်းၵုမ်းၵမ်ယူႇ ႁွင်ႈၵၢၼ်ၶုၼ်ၽွင်းလူင် 3 ႁွင်ႈၵၢၼ်ၼၼ်ႉ တိုၼ်းမီးတႂ်ႈၸဝ်ႈပွင်ၵၢၼ်သိုၵ်းၼၼ်ႉ ၵုမ်းၵမ်ၵမ်းသိုဝ်ႈလႄႈ ပဵၵ်ႉသမ်ႉဝႃႈ တူဝ်ၶုၼ်ၽွင်းလူင်မၼ်းလႅၵ်ႈလၢႆႈၵႂႃႇသေတႃႉၵေႃႈ ႁွင်ႈၵၢၼ်ဢၼ်ၼႆႉ ယူႇတႂ်ႈတပ်ႉသိုၵ်းၵုမ်းၵမ်ယူႇ လုမ်းလုမ်းၵူၺ်း၊ မိူဝ်ႈၼၼ်ႉလႄႈမိူဝ်ႈၼႆႉ ပဵၼ်ဢၼ်လဵဝ်ၵၼ်ယူႇသေတႃႉၵေႃႈ ၸိူဝ်းဢၼ်မႃးသိုပ်ႇ ႁဵတ်းၵၢၼ်ၵေႃႇသၢင်ႈ ၽေႃႇၼမ်ႉၼႄတူဝ် လွင်ႈငမ်းယဵၼ်ၼၼ်ႉ ယူဝ်ၸိူဝ်းဢၼ်ၵူၼ်းမိူဝ်ႈၵဝ်ႇႁဵတ်းၵႂႃႇ ဢၼ်ပူၼ်ႉဢွၼ်ၼၼ်ႉ ဢိၵ်ႇတင်း ၵူၼ်းမိူဝ်ႈလဵဝ် ဢၼ်သႅၼ်းမႂ်ႇမႃးသိုပ်ႇႁဵတ်းၵၢၼ်ၼႆႉ တေဢမ်ႇမႅၼ်ႈႁွႆႈၵၼ်ႁိုဝ် ႁဝ်းၶႃႈလႆႈထတ်းႁၼ်ထိုင်ဝႆႉ။

မိူၼ်ၸိူင်ႉ SSPP ၼႆႉ ငဝ်ႈငုၼ်းမၼ်းပၵ်းသဝ်းၼႂ်းဝၢၼ်ႈႁႆး မီးၼႂ်းၸႄႈဝဵင်းၵေးသီးၼႆ ၽူႈလႂ်ၽႂ်ၵေႃႈႁူႉၸွမ်းယူႇ။ ၵူၺ်းၵႃႈ လွင်ႈၸဝ်ႈသိုၵ်းလူင်ၼၢႆႇဝိၼ်းဢွင်ႇ မႃးဢွၵ်ႇလိၵ်ႈသမ်ႉဝႃႈ- ဢၼ်တူၵ်းလူင်းၵၼ်မႃးတီႈၵဵင်းတုင် (ၵႂႃႇမီးတၢင်းပွတ်းဢွၵ်ႇၶူင်းပုၼ်ႉ) ဢၼ်ဝႃႈၼႆႉ မၼ်းပဵၼ်ဢၼ်လႆႈလူင်းလၢႆးမိုဝ်းၵၼ်မႃးတင်း ၶွင်ႇသီႇဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဢၼ်ဝႃႈၼၼ်ႉ ယူႇတီႈလူင်ပွင်ၸိုင်ႈမိူင်း ဢမ်ႇႁူႉဢၼ်ဝႃႈၼၼ်ႉ တိုၼ်းဢမ်ႇထုၵ်ႇလီပဵၼ်။ ပဵၵ်ႉသမ်ႉဢမ်ႇႁူႉတႄႉၼႆၵေႃႈ ဢၼ်ၼႆႉတေႁဵတ်းႁိုဝ်မၼ်ႈၸႂ်လႆႈ ပိူဝ်ႈတႃႇၵေႃႇသၢင်ႈလွင်ႈငမ်းယဵၼ်ၵႂႃႇၼႆ လွင်ႈၼႆႉလီငမ်းငဝ်းၵၼ်ဝႆႉၼႆ ႁဝ်းၶႃႈထတ်းႁၼ်ၸိူင်ႉၼင်ႇၼၼ်။

မိူၼ်လိူင်ႈၸိူင်ႉၼင်ႇၼႆၼင်ႇၵဝ်ႇ၊ ၼႂ်းလိူၼ်ပူၼ်ႉၼႆႉၵူၺ်း ၽူႈတႅၼ်းၽွင်းၼႂ်းၸႄႈဝဵင်းမိူင်းယႆ တၢင်ႇလၢတ်ႈ ၵႂႃႇဝႃႈ- ပျီႇတုၸိတ်ႉမၢၼ်ႈပၢင်ႇ ဢၼ်မီးယူႇၼႂ်းၵႄႈတၢင်ႉယၢၼ်း လႄႈမိူင်းယႆၼၼ်ႉ ၵဵပ်းၵူၼ်းမႂ်ႇႁၢဝ်ႈႁႅင်း ၼႃႇလႄႈ ႁႂ်ႈလႆႈဢဝ်လိူင်ႈပၼ်။ မိူဝ်ႈၼၼ်ႉၵေႃႈ ယူႇတီႈၸဝ်ႈသိုၵ်းလူင်ၼၢႆႇဝိၼ်းဢွင်ႇၼႆႉၵူၺ်းၼင်ႇၵဝ်ႇ ဢွၵ်ႇလိၵ်ႈထိုင်ၵႂႃႇတီႈတၢင်း မပၶ ဢၼ်ပဵၼ်တိူင်းသိုၵ်းပွတ်းႁွင်ႇ တီႈတၢင်းမျိတ်ႉၵျီးၼႃး၊ ၼၼ်ႉၵေႃႈပိူင်ႈၽိတ်း မႃးယဝ်ႉပွၵ်ႈၼိုင်ႈ။ မိူဝ်ႈလဵဝ်သမ်ႉသိုပ်ႇပိူင်ႈထႅင်ႈယူႇ၊ ဢၼ်ၼႆႉတႄႉ မိူၼ်တင်းဝႃႈတပ်ႉသိုၵ်း ဢမ်ႇၼၼ် တပ်ႉမတေႃႇၼႆႉ ဢမ်ႇၼၼ် လူင်ပွင်ၸိုင်ႈမိူင်းတႆးၼႆႉ ဢမ်ႇဝႆႉၼၵ်းတေႃႇလွင်ႈၵၢၼ်သၢင်ႈလွင်ႈငမ်းယဵၼ်ႁိုဝ်၊ ၼႆႉႁဝ်းၶႃႈတေလႆႈထတ်းထၢမ်ၵၼ်ဢၼ်ၼိုင်ႈယဝ်ႉ။

ၾၢႆႇၼိုင်ႈတၢင်းၼိုင်ႈၵေႃႈ ယူႇတီႈၽွင်းတႅၼ်းသၽႃးၶဝ်ထၢမ်ထိုင်သေယဝ်ႉ ယူႇတီႈၾၢႆႇလူင်ပွင်ၸိုင်ႈ မႃးတွပ်ႇၵႄႈၶိုၼ်းၼၼ်ႉ မၼ်းၽိတ်းမၼ်းပိူင်ႈဝႆႉ ဢၼ်ဝႃႈၼၼ်ႉ ယူႇတီႈၽူႈတႅၼ်းၽွင်းၶဝ် ဢမ်ႇၸၢင်ႈၶိုၼ်းတုမ်ႉတွပ်ႇသိုပ်ႇသွႆႈသေ ထၢမ်ထႅင်ႈႁႃႉ ဢမ်ႇၼၼ်ၵေႃႈ ယူႇတီႈႁူဝ်ၼႃႈတႅၼ်းၽွင်းၼၼ်ႉ ဢမ်ႇဢဝ်ပုၼ်ႈၽွၼ်း ပိူဝ်ႈတႃႇၶိုၼ်းတုမ်ႉတွပ်ႇ ႁႂ်ႈၾၢႆႇလူင်ပွင်ၸိုင်ႈၵႄႈလိတ်ႈႁႃႉ ဢၼ်ဝႃႈၼၼ်ႉ ၽႂ်ၸုတ်ႈဝႆႉပုၼ်ႈၽွၼ်း၊ ဢၼ်မီးပုၼ်ႈၽွၼ်းတႄႉတႄႉပဵၼ်ၽႂ်ဢၼ်ဝႃႈၼၼ်ႉ ၼႂ်းၵႄႈလူင်ပွင်ၸိုင်ႈမိူင်းတႆးလႄႈ ၼႂ်းၵႄႈတႅၼ်းၽွင်းမိူင်းတႆး တၵ်းတေလႆႈမီးလွင်ႈပုတ်းၶၢတ်ႇၸႅင်ႈလႅင်းယဝ်ႉၼႆ ႁဝ်းယွၼ်းထတ်းသၢင်ၼင်ႇၼႆ။

သင်ၸိူဝ်ႉဝႃႈ ဢမ်ႇမီးလွင်ႈပုတ်းၶၢတ်ႇၸႅင်ႈလႅင်းတႄႉတႄႉၼႆၸိုင် ၼႃႈၵၢၼ်ၶၵ်ႉၵၢၼ်လွင်ႈငမ်းယဵၼ် ဢၼ်လူင်ပွင်ၸိုင်ႈလႄႈ တပ်ႉမတေႃႇ ဢွၼ်ႁူဝ်ၼမ်းၼႃႈသေ ႁဵတ်းသၢင်ႈယူႇၼၼ်ႉ ယူႇတီႈပေႃႈမႄႈၵူၼ်းမိူင်း တၵ်းတေထၢင်ႇထိူမ်ငမ်းငဝ်းၵႂႃႇမိူဝ်းၼႃႈယႂ်းယႂ်းသေယဝ်ႉ ပိူဝ်ႈတႃႇတေႁၼ်လွင်ႈငမ်းယဵၼ် ၸိုၼ်ႈၸၢင်ႇမၼ်ႈၵိုမ်း တႄႉတႄႉဢၼ်ဝႃႈၼၼ်ႉၵေႃႈ ႁဝ်းၶႃႈတၵ်းတေလႆႈမုင်ႈမွင်း ဢဝ်ၶၢဝ်းယၢမ်းထႅင်ႈတႄႉတႄႉၼမ်ၼမ်ယူႇၼႆ ယွၼ်းထတ်းႁၼ်ၼင်ႇၼႆသေ တူင်ႉတၵ်ႉမႂ်ႇသုင်ၵၼ်ၵူႈၵေႃႉၶိင်းၵူၼ်းၶႃႈ။