လုၵ်ႈႁဵၼ်းသင်ၶတႆး ပိုၼ်ၽၢဝ်ႇ ႁပ်ႉလုၵ်ႈႁဵၼ်းမႂ်ႇ ပီ 2023 တႃႇပၢင်သွၼ်လိၵ်ႈလၢႆး လၢႆၽႃႇသႃႇ ၵူႈဝၼ်းဢႃးတိတ်ႉ တႃႇၶၢဝ်းတၢင်း 10 လိူၼ်။
တႄႇဢဝ် ဝၼ်းတီႈ 24/4/2023 တေႃႇထိုင် 18/5/2023 ယူႇတီႈ လုၵ်ႈႁဵၼ်းသင်ၶတႆး ၸၼ်ႉၸွမ် မႁႃၸူးလႃးလူင်း ၵွၼ်း ဝဵင်းၵဵင်းမႆႇ ၸိုင်ႈထႆး ပိုတ်ႇႁပ်ႉသဵၼ်ႈမၢႆ လုၵ်ႈႁဵၼ်းမႂ်ႇ တႃႇပီၼႆႉ ပၼ်သဵၼ်ႈမၢႆ(လူင်းၸိုဝ်ႈ) လႆႈတီႈဝတ်ႉသူၼ် ၻွၵ်ႇလႄႈ ဝတ်ႉပႃႇပဝ်ႈ။ ပၢင်သွၼ်လိၵ်ႈလၢႆးၼႆႉ တေပူင်သွၼ်ပၼ် လိၵ်ႈတႆး၊ လိၵ်ႈထႆး၊ လိၵ်ႈဢိင်းၵလဵတ်း၊ လိၵ်ႈတႆးထမ်း(လိၵ်ႈၶိုၼ်)၊ လိၵ်ႈမၢၼ်ႈလႄႈ လိၵ်ႈၶႄႇ ၸိူဝ်းၼႆႉ။
ၸဝ်ႈၶူး လၢဝ်လႅင်း ႁူဝ်ပဝ်ႈ ၸုမ်းႁူမ်ႈတုမ်ပီႈၼွင်ႉၸၢဝ်းၶိူဝ်းတႆး လႄႈ ၸၼ်ႉၸွမ်မႁႃၸူးလႃးလူင်းၵွၼ်း ဝဵင်းၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ႁဝ်းၸဝ်ႈၶဝ် ပိုတ်ႇပၢင်သွၼ်လိၵ်ႈလၢႆးၼႆႉမႃး ပဵၼ်ပီထိ 17 ယဝ်ႉ။ ယိူင်းဢၢၼ်း တႃႇႁႅင်းၵၢၼ် ၸိူဝ်းမီး ၼႂ်းၵဵင်းမႆႇၼႆႉ သင်ဝႃႈ ၽႂ်ၶႂ်ႈႁဵၼ်းႁူႉၼႆၸိုင် ဢွၼ်ၵၼ်သူင်ႇသဵၼ်ႈၸိုဝ်ႈၶဝ်ႈမႃးၵၼ်ၶႃႈ။ မႃးႁဵၼ်းသွၼ်လၢႆလၢႆ ဢမ်ႇလႆႈသဵင်ႈငိုၼ်းသင်။ သင်ဝႃႈမႃးၼႆ ႁႂ်ႈဢဝ်ပႃးၶႅပ်းႁၢင်ႈၼိုင်ႈၼိဝ်ႉ ၼိုင်ႈၵေႃႉ သွင်ၶႅပ်း”- ဝႃႈ ၼႆ။
ယၢမ်းလဵဝ် မီးၵူၼ်းမႃးလူင်းၸိုဝ်ႈဝႆႉ တႃႇႁဵၼ်းလိၵ်ႈၼႆႉ မီး 60 ပၢႆယဝ်ႉ။ ပၢင်သွၼ်လိၵ်ႈလၢႆး လၢႆၽႃႇသႃႇၼႆႉ တေပူင်သွၼ်ၵႂႃႇ တႃႇၶၢဝ်းတၢင်း 10 လိူၼ် တေပူင်သွၼ်ပၼ် 1 ဝူင်ႈ 1 ဝၼ်း ။ တေပဵၼ်ဝၼ်းဢႃးတိတ်ႉ ယၢမ်းၵၢင်ၼႂ် 9 မူင်းထိုင် 4 မူင်း ဝၢႆးဝၼ်း ဢွင်ႈတီႈပူင်သွၼ် တေပဵၼ်တီႈဝတ်ႉသူၼ်ၻွၵ်ႇ ဝဵင်းၵဵင်းမႆႇ ၸိုင်ႈထႆး ။
သင်ဝႃႈ ၽူႈလႂ် သူၼ်ၸႂ် ၶႂ်ႈၶဝ်ႈႁဵၼ်း ဢမ်ႇၼၼ် ၶႂ်ႈဢဝ်လုၵ်ႈလၢၼ် မႃးၶဝ်ႈႁဵၼ်းၼႆၸိုင် မႃးပၼ်ၸိုဝ်ႈသဵင်လႆႈတီႈ ဝတ်ႉ သူၼ်ၻွၵ်ႇ ဢမ်ႇၼၼ် ဝတ်ႉပႃႇပဝ်ႈ ၵေႃႈလႆႈ တႄႇဢဝ် ယၢမ်းၵၢင်ၼႂ် 9 မူင်း တေႃႇထိုင် 5 မူင်း ႁူဝ်ၶမ်ႈ လႆႈၵူႈဝၼ်း။ ဢမ်ႇ ၼၼ် လူင်းၸိုဝ်ႈဝႆႉ တၢင်းဢွၼ်ႊလၢႆႊ(Online) ၵေႃႈလႆႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ