ၸဝ်ႈပၢႆးမွၼ်းတႆး ၸၢႆးသၢႆမၢဝ်း လႆႈၶဝ်ႈယူတ်းယႃတူဝ်ဝႆႉတီႈ ၵုင်းထဵပ်ႈ/ မိူင်းၵွၵ်ႇ ယွၼ်ႉတၢင်းပဵၼ်လၢႆလၢႆလွင်ႈသေ တိုၵ်ႉသိုပ်ႇယူတ်းယႃတူဝ်ဝႆႉယူႇ ဝႃႈၼႆ။
တႄႇဢဝ် ဝၼ်းတီႈ 01-06/04/2018 ၶၢဝ်းတၢင်း 6 ဝၼ်းမႃးၼႆႉ ၸဝ်ႈပၢႆးမွၼ်းတႆး ၸိုဝ်ႈသဵင်ယႂ်ႇ ၸၢႆးသၢႆမၢဝ်း လႆႈ ၶဝ်ႈယူတ်းယႃတူဝ်ဝႆႉတီႈ ႁူင်းယႃသူႇၶုမ်ဝိတ်ႉ(Sukumvit Hospital) ဝဵင်းလူင်ၵုင်းထဵပ်ႈ(မိူင်းၵွၵ်ႇ) ၸိုင်ႈထႆး။ လူၺ်ႈတၢင်းပဵၼ် တပ်း၊ တႂ်၊ သဵၼ်ႈလိူတ်ႈတၼ်လႄႈ လိူတ်ႈၶိုၼ်ႈ ၸိူဝ်းၼႆႉ ဝႃႈၼႆ။
ၸၢႆးသၢႆမၢဝ်း ၸဝ်ႈပၢႆးမွၼ်းတႆး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်တႄႉ တေလႆႈဝႃႈ ၶႅၼ်ႈၶိုၼ်းမႃးၵမ်ႈၽွင်ႈ ၶႃႈယဝ်ႉ။ လွင်ႈလူင်းႁူင်းယႃတႄႉ တေလူင်းမိူဝ်ႈလႂ် ဢၼ်ဝႃႈၼၼ်ႉပႆႇႁူႉ။ ၵႃႈႁူင်းယႃတႄႉ တေလႆႈဝႃႈၵႃႈယူႇ။ ပေႃးၶၢႆႉႁူင်းယႃထႅင်ႈၼႆ သမ်ႉတေလႆႈႁႃႁူင်းယႃတီႈမႂ်ႇထႅင်ႈ။ ၵွပ်းၼႆ တေဢမ်ႇၶၢႆႉယဝ်ႉ။ တေႃႈလဵဝ် ပႂ်ႉမေႃၶဝ် တေၽႃႇတတ်းပၼ်တႂ်၊ ၵူၺ်းၵႃႈ မေႃယႃၶဝ်သမ်ႉ ပႆႇလၢတ်ႈသင်မႃး” ဝႃႈၼႆ။
ၵဵဝ်ႇလူၺ်ႈလွင်ႈ ၸၢႆးသၢႆမၢဝ်း ၸဝ်ႈပၢႆးမွၼ်းတႆး လႆႈၶဝ်ႈယူတ်းယႃတူဝ်တီႈႁူင်းယႃ သူႇၶုမ်ဝိတ်ႉ ဝဵင်းလူင်ၵုင်းထဵပ်ႈ (မိူင်းၵွၵ်ႇ) ၼႆႉသေ မီးသင်ၶၸဝ်ႈ၊ ပီႈၼွင်ႉတႆး လႄႈ ႁႅင်းၵၢၼ်ယၢၼ်မိူင်းတႆး ၵႂႃႇသူႇၵႂႃႇၸႂ်း ပၼ်ႁႅင်းၸႂ် ႁူမ်ႈၵၼ် ၵမ်ႉၸွႆႈထႅမ် ၵႃႈယူတ်းၵႃႈယႃ ၸိူဝ်းၼႆႉ ဝႃႈၼႆ။
လိူဝ်ၼၼ်ႉ သင်ဝႃႈ ၵေႃႉလႂ် မူႇၸုမ်းလႂ် ၸဝ်ႈသင်ၶလႂ် ၶႂ်ႈၵမ်ႉထႅမ် ၸွႆႈၵႃႈယူတ်းၵႃႈယႃ ၸၢႆးသၢႆမၢဝ်း ၸဝ်ႈပၢႆး မွၼ်းတႆးၸိုင် သူင်ႇ/ဢူၼ်းၵႂႃႇလႆႈတီႈ မၢႆယေးငိုၼ်း Account No (บัญชีเลขที่) 005-7-13282-1 ။ ၸိုဝ်ႈယေးငိုၼ်း Bangkok Bank (ธนาคารกรุงเทพ)။ ၸိုဝ်ႈၸဝ်ႈၶွင်ယေးငိုၼ်း Account Name – MR. SAI SAING MAO ပဵၼ်ၸိုဝ်ႈ ၸၢႆးသၢႆမၢဝ်း ၵမ်းသိုဝ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ