Friday, March 29, 2024

ၽူႈၵွၼ်းပလိၵ်ႈၸႄႈတွၼ်ႈမူႇၸေႊ ၵေႃႉၼိုင်ႈ ထုၵ်ႇယိုဝ်းတၢႆ

Must read

မိူဝ်ႈၼႆႉ ဝၼ်းတီႈ 22/2/2023 ယၢမ်းၵၢင်ၼႂ် 10 မူင်း ၽူႈၵွၼ်းပလိၵ်ႈၸႄႈတွၼ်ႈမူႇၸေႊ ၸိုဝ်ႈႁွင်ႉ တဵင်းသေႃႇထေး ဢႃယု 30 ပၢႆ ထုၵ်ႇၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ ယိုဝ်းတၢႆထင်တီႈ တီႈပွၵ်ႉႁွင်ႇ ဝဵင်းမူႇၸေႊ လႅၼ်လိၼ်တႆး – ၶႄႇ။

ၽူႈၵွၼ်းပလိၵ်ႈမၢၼ်ႈ ထုၵ်ႇယိုဝ်းတၢႆ
Photo by – ၵူၼ်းပိုၼ်ႉတီႈ/ ၽူႈၵွၼ်းပလိၵ်ႈၸႄႈတွၼ်ႈမူႇၸေႊ ထုၵ်ႇယိုဝ်းတၢႆ မိူဝ်ႈၼႆႉ 22/2/2023

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၽူႈၵွၼ်းပလိၵ်ႈၸႄႈတွၼ်ႈမူႇၸေႊ (ၼိုင်ႈတုမ်ႇ) ၸိုဝ်ႈႁွင်ႉ တဵင်းသေႃႇထေး ထုၵ်ႇယိုဝ်းတၢႆ ထင်တီႈ။ မၼ်းၸၢႆး တိူဝ်ႉၺႃးမၢၵ်ႇၵွင်ႈ 5 လုၵ်ႈ။ ယဝ်ႉၵေႃႈ မၢၵ်ႇ ၵွင်ႈသႅတ်ႈသႂ်ႇ ၸူႉမၼ်းၸၢႆး လႆႈမၢတ်ႇၸဵပ်း။ ပဵၼ်ၽွင်းၶဝ် ပႆၵႂႃႇၵိၼ်ၶဝ်ႈသွႆးၸွမ်းၵၼ် ပွၵ်ႈမႃး”- ဝႃႈၼႆ။

- Subscription -

ၽူႈၸၢႆးသွင်ၵေႃႉ ဢၼ်ၶီႇရူတ်ႉၶိူင်ႈမႃးယိုဝ်းၼၼ်ႉ ပဵၼ်ၽႂ် ၸုမ်းလႂ် ဢၼ်ဝႃႈၼၼ်ႉ ပႆႇႁူႉ။

ဝၢႆးသေ ၽူႈၵွၼ်းပလိၵ်ႈၸႄႈတွၼ်ႈမူႇၸေႊ ထုၵ်ႇယိုဝ်းတၢႆယဝ်ႉ ယူႇတီႈပလိၵ်ႈသိုၵ်းမၢၼ်ႈ မႃးပိၵ်ႉဢိုတ်း ၸွမ်း သဵၼ်ႈတႃႈသၢႆတၢင်း ၼႂ်းပွၵ်ႉႁွင်ႇၼၼ်ႉသေ ၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း။

ပူၼ်ႉမႃး မိူဝ်ႈဝၼ်းတီႈ 14/12/2022 ယၢမ်းဝၢႆးဝၼ်း 3 မူင်းပၢႆၼၼ်ႉၵေႃႉ ၸိုဝ်ႈႁွင်ႉ ၵူဝ်ႇၽူၼ်း ၵူၼ်းၵဵပ်းၶွၼ်ႇပၼ်သိုၵ်း မၢၼ်ႈ ထုၵ်ႇၵူၼ်းဢမ်ႇႁူႉၾၢႆႇ သွင်ၵေႃႉ သွၼ်ႉရူတ်ႉၶိူင်ႈလမ်းၸွမ်းတၢင်းလင် မၼ်းၸၢႆးသေ လၢၵ်ႈၵွင်ႈယိုဝ်းသႂ်ႇ မၼ်းၸၢႆး လူမ်ႉတၢႆထင်တီႈ ၵၢင်တၢင်းလူင် ႁိမ်းၶူဝ်ပၢင်ႇၶမ်း။ ဝၼ်းတီႈ 6/10/2022 ယၢမ်းႁူဝ်ၶမ်ႈၼၼ်ႉၵေႃႈ ၽူႈတတ်းသိၼ်တြႃး ထုၵ်ႇယိုဝ်းတၢႆထင်တီႈ ၵေႃႉၼိုင်ႈ တီႈပွၵ်ႉႁူဝ်မုၼ်ႇ ဝဵင်းမူႇၸေႊ။

ၼႂ်းပီ 2022 ၼႆႉ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵႆႉမီးလွင်ႈငွႆးယိုဝ်း ၶႃႈႁႅမ်ၵၼ်တၢႆ ၸိူင်ႉၼႆ မီးမႃး ဢမ်ႇယွမ်း 10 ပွၵ်ႈ ယဝ်ႉ ၵူၼ်းမူႇၸေႊလၢတ်ႈၼႄၼင်ႇၼႆ။

ဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်တႆး – ၶႄႇ ဝဵင်းၼိုင်ႈသေ ၵႆႉမီးလွင်ႈယိုဝ်းၵၼ်တၢႆ၊ ၸူၼ်ၵၼ်၊ လၵ်ႉ ၵၼ် ၸိူဝ်းၼႆႉ။ ယႃႈမဝ်းၵမ်ၵေႃႈ လိူင်ႇၽႄႈၼမ်။ သိုၵ်းလူင်ပွင်ၸိုင်ႈမၢၼ်ႈၵေႃႈ ၼွၵ်ႈသေ တပ်ႉဢၼ်ပၵ်းယူႇတႃႇသေႇ ယင်းမီး တပ်ႉမ 77 ၊ 88 ၸိူဝ်းၼႆႉ ၵႂႃႇမႃးတူင်ႉၼိုင်၊ ၸုမ်းယိပ်းၵွင်ႈၵၢင်ႇၵေႃႈၼမ်၊ ၸုမ်းပျီႇတူႉၸိတ်ႉၵေႃႈ ၼႂ်းၸႄႈတွၼ်ႈမူႇ ၸေႊ မီးဢမ်ႇယွမ်း 20 ၸုမ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း