Thursday, March 28, 2024

ပၢင်ၵုမ်သၽႃးမိူင်းတႆး ဢုပ်ႇၵုမ်ပႃးလွင်ႈၵူႈယိုမ်ငိုၼ်း ၼႂ်းပွၵ်ႉယွမ်ႇဝၢၼ်ႈဢိူင်ႇ ႁႂ်ႈၶဝ်ႈၸွမ်းပၵ်းပိူင်

Must read

ပၢင်ၵုမ်သၽႃးမိူင်းတႆး ၵမ်းထူၼ်ႈ 9 ၸတ်းႁဵတ်းတီႈဝဵင်းတူၼ်ႈတီး ဝၼ်းႁႅၵ်ႈ ဢုပ်ႇၵုမ်လွင်ႈငိုၼ်းၸႂ်ႉၸၢႆႇ။ လွင်ႈၵူႈယိုမ်ငိုၼ်း ၼႂ်းပွၵ်ႉယွမ်ႇဝၢၼ်ႈဢိူင်ႇ၊ လွင်ႈလူင်ပွင်ၸိုင်ႈမိူင်းတႆး မီးၽႅၼ်ယိူင်းဢၢၼ်း ႁဵတ်းသၢင်ႈၼႃႈၵၢၼ်ၵႂႃႇ ၸိူဝ်းၼႆႉ။

ပၢင်ၵုမ်သၽႃးမိူင်းတႆး

ပၢင်ၵုမ်သၽႃးမိူင်းတႆး ၵမ်းထူၼ်ႈ 9 ၼႆႉ တႄႇၸတ်းႁဵတ်း မိူဝ်ႈဝၼ်းတီႈ 26/03/2018 ပဵၼ်ဝၼ်းႁႅၵ်ႈ။ ၽွင်းတႅၼ်းသၽႃးၸႄႈမိူင်း ၸိူဝ်းမီးသုၼ်ႇၶဝ်ႈႁူမ်ႈတင်းမူတ်း 143 ၵေႃႉၼၼ်ႉ ၶိုၼ်ႈႁွတ်ႈၶဝ်ႈႁူမ်ႈ 126 ၵေႃႉ။ ၼႂ်းပၢင်ၵုမ်သၽႃးၼၼ်ႉ တၢင်ႇလၢတ်ႈဢုပ်ႇဢူဝ်း ၵဵဝ်ႇၵပ်းငိုၼ်းပၻ်ႊၵျႅတ်ႊတႃႇ 6 လိူၼ် (တင်ႈတႄႇလိူၼ် ဢေႊပရိူဝ်ႊၵႂႃႇထိုင်လိူၼ်သႅပ်ႊထႅမ်ႊၿိူဝ်ႊ)။ ၼႃႈၵၢၼ်တႃငၢၼ်း ဢၼ်လူင်ပွင်ၸိုင်ႈဢၢၼ်း ႁဵတ်းသၢင်ႈ ၼႂ်းၶၢဝ်းတၢင်း 6 လိူၼ် ဢိၵ်ႇ လွင်ႈၵၢၼ်ၵူႈယိုမ်ငိုၼ်း ၸွမ်းၼႂ်းပွၵ်ႉယွမ်ႇဝၢၼ်ႈဢိူင်ႇၸိူဝ်းၼႆႉ ႁႂ်ႈပေႃးမီးပၵ်းပိူင် ၶဝ်ႈတၢင်းၵၢၼ်-ၼႆယဝ်ႉ။

- Subscription -

ၽူႈတႅၼ်းသၽႃးၸႄႈမိူင်း၊ ၶဵတ်ႇလိူၵ်ႈတင်ႈမၢႆ 2 ၊ ၸႄႈဝဵင်းၵျွၵ်ႉမႄး ၸၢႆးထုၼ်းၺၢၼ်ႇ လၢတ်ႈဝႃႈ-“ပၢင်ၵုမ်သၽႃးဝၼ်းႁႅၵ်ႈ ဢုပ်ႇဢူဝ်းၵၼ်လွင်ႈၿတ်ႊၵျႅတ်ႊ/ ငိုၼ်းတွင်း တႃႇလူင်ပွင်ၸိုင်ႈၸႂ်ႉၸၢႆႇၵႂႃႇ တႃႇ6 လိူၼ်။ ၼႂ်းၶၢဝ်းတၢင်းႁူၵ်းလိူၼ်ၼႆႉ လူင်ပွင်ၸိုင်ႈမိူင်းတႆး တေၸႂ်ႉငိုၼ်းတွင်း ႁဵတ်းသၢင်ႈၼႃႈၵၢၼ်သင်။ ၼႂ်းၶၢဝ်းတၢင်း 6 လိူၼ်ၼႆႉ ၸွမ်းၼင်ႇလူင်ပွင်ၸိုင်ႈမိူင်းတႆး ၶဵၼ်ႇတႅမ်ႈဝႆႉၼၼ်ႉ မၼ်းမီးယိူင်းဢၢၼ်း တေႁဵတ်းသၢင်ႈ မိူၼ်ၼင်ႇၵၢၼ်ၽုၵ်ႇသွမ်ႈ၊ ၵၢၼ်ၵႃႉၶၢႆ၊ ၵၢၼ်ပူၵ်းပွင် ၶိုၼ်ႈယႂ်ႇမႂ်ႇသုင်ၸိူဝ်းၼႆႉ။ လွင်ႈၸိူဝ်းၼႆႉ ပဵၼ်လႆႈဢမ်ႇပဵၼ်လႆႈ တေဢုပ်ႇၵၼ်၊ တေထဵင်ၵၼ်သေ ၸင်ႇၵွႆႈမၵ်းမၼ်ႈ။ မၵ်းမၼ်ႈၵႂႃႇယဝ်ႉၵေႃႈ တေႁဵတ်းလႆႈၸွမ်းၵႃႈႁိုဝ်ပႆႇႁူႉ။ ၼၼ်ႉတႄႉ လူင်ပွင်ၸိုင်ႈၼိုင်ႈၸုမ်းၼႆႉ ပဵၼ်ၵၢၼ်မၼ်းလႄႈ မၼ်းတေလႆႈတမ်းဝၢင်းသေႁဵတ်းသၢင်ႈၵႂႃႇ”- ဝႃႈၼႆ။

ၸၢႆးထုၼ်းၺၢၼ်ႇ သိုပ်ႇလၢတ်ႈထႅင်ႈဝႃႈ- “ထႅင်ႈဢၼ်ၼိုင်ႈ၊ ဢၼ်လူင်ပွင်ၸိုင်ႈတၢင်ႇမႃး လွင်ႈမီးၵူၼ်း ပၼ်ယိုမ်ၵူႈငိုၼ်း ၼႂ်းပွၵ်ႉယွမ်ႇဝၢၼ်ႈၼႂ်းၸိူဝ်းၼၼ်ႉ တေတၢင်ႇပၵ်းပိူင်မိူဝ်ႈၼႆႉ။ ၵူၺ်းၵႃႈလွင်ႈၼႆႉ ပေႃးပၢင်ၵုမ်သၽႃးၵမ်းထူၼ်ႈ 10 မႃးၸင်ႇတေၸၢင်ႈလႆႈဢုပ်ႇၵၼ်။ ၵဵဝ်ႇၵပ်းလွင်ႈၼႆႉ ၵွပ်ႈဝႃႈၼႂ်းဝၢၼ်ႈ ၼႂ်းသူၼ် ၼႂ်းပွၵ်ႉၼႂ်းယွမ်ႇၸိူဝ်းၼႆႉ ၵူၼ်းမီးငိုၼ်းၶဝ်ပၼ်ၵူႈယိုမ်ငိုၼ်း၊ ဢဝ်မွၵ်ႇမၼ်း 5 ပျႃးၼိုင်ႈၶၼ်ႁိုဝ်ႉ ၸိူဝ်းၼႆႉ။ လွင်ႈၼႆႉ မၼ်းဢမ်ႇမီးပၵ်းပိူင်။ ၵွပ်ႈၼႆ ပေႃးဝႃႈဢမ်ႇမီးပၵ်းပိူင် ပေႃးပဵၼ်ပၼ်ႁႃမႃး ဢမ်ႇလႆႈငိုၼ်း/ တွင်းမႃးၸိူဝ်းၼႆႉ ၵႂႃႇၵႄႈၶႆၼႂ်းလုမ်းတြႃးၵေႃႈ မၼ်းဢမ်ႇၶဝ်ႈပိူင်မၼ်း။ သမ်ႉထႅင်ႈမွၵ်ႇမၼ်းၵေႃႈ မၢင်တီႈဝႆႉၼၵ်းဢဝ်ၼမ်။ ပေႃးမီးပၵ်းမီးပိူင် ၼိုင်ႈ-လူင်ပွင်ၸိုင်ႈၵေႃႈ တေလႆႈဢဝ်ၶွၼ်ႇ။ သွင်-ၵႄႈၶႆၼႂ်းလုမ်းတြႃးၵေႃႈ တေၶဝ်ႈၸွမ်းပၵ်းပိူင်မႃး၊ ၾၢႆႇလူင်ပွင်ၸိုင်ႈဝူၼ်ႉဝႆႉၸိူင်ႉၼၼ်”- လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

လုမ်းပၢင်ၵုမ်သၽႃးမိူင်းတႆးၼႆႉ တင်ႈယူႇတီႈပွၵ်ႉတိတ်ႉတေႃး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။ ပၢင်ၵုမ်သၽႃးမိူင်းတႆး ၵမ်းထူၼ်ႈ 9 ၼႆႉ တႄႇၸတ်းႁဵတ်း မိူဝ်ႈဝၼ်းတီႈ 26/03/2018 ပဵၼ်ဝၼ်းႁႅၵ်ႈသေ ၵိုတ်းယင်ႉလိုဝ်ႈဝႆႉဝၼ်းလိုဝ်ႈၵၢၼ်၊ ဢၼ်ပဵၼ်ဝၼ်းလုၵ်ႉၽိုၼ်ႉ/ ဝၼ်းတပ်ႉသိုၵ်းမၢၼ်ႈ ၶွပ်ႈၶူပ်ႇ 73 ပီၼၼ်ႉသေ သိုပ်ႇၶိုၼ်းမိူဝ်ႈၼႆႉ ဝၼ်းတီႈ 28 ။ ယိူင်းဢၢၼ်းၸတ်းႁူမ်ႈၶၢဝ်းတၢင်း 4 ဝၼ်း- လႆႈႁူႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း